ހަށިގަނޑުގައި ރައްކާކޮށްގެން މަސްތުވާތަކެތި ގެންދަން އުޅުނު ޒުވާނާގެ ބަންދަށް ކްރިމިނަލް ކޯޓުން އިތުރު 30 ދުވަސް މިއަދު ޖަހައިފިއެވެ.
މި މައްސަލައިގައި ފުލުހުން ހައްޔަރުކޮފައި ވަނީ ށ. ނޫމަރާ ހަވީރީގޭ، އުމުރުން 24 އަހަރުގެ އަބްދުﷲ ފަސީހެވެ. ފުލުހުން އޭނާ ހައްޔަރު ކޮށްފައި ވަނީ މިމަހުގެ ހަތެއްވީ ހޯމަ ދުވަހުގައެވެ.
މި މައްސަލައިގައި އޭރު ކްރިމިނަލް ކޯޓުން ވަނީ އޭނާގެ ބަންދަށް ފަސް ދުވަސް ޖަހާފައެވެ. ފަސްދުވަހުގެ ބަންދުގެ މުއްދަތު ހަމަވުމުން މިއަދު އެ ކޯޓުން ވަނީ އަނެއްކާ އޭނާ 30 ދުވަހުގެ މުއްދަތަށް ބަންދުކުރުމަށް އަމުރުކޮށްފައެވެ.
މިއަދު އެ ކޯޓުން ނެރެފައިވާ އަމުރުގައި ވަނީ ފަސީހު ކުށް ކުރިކަމަށް ތުހުމަތުކުރެވޭ ވަރަށް ހެކި ހުށަހަޅާފައި ވާކަމަށާއި އޭނާގެ ގައިގައި މަސްތުވާތަކެތި ހަރުކޮށްގެން ޑޮމެސްޓިކް އެއާޕޯޓުން ފުރަން މަސައްކަތް ކޮށްފައި ވާކަމަށެވެ.
އޭނާ ބަންދުގައި ބަހައްޓަންޖެހޭ ސަބަބެއްގެ ގޮތުގައި އެ ކޯޓުން ބުނެފައި ވަނީ މުޖްތަމައުގެ ސަލާމަތާއި ރައްކާތެރިކަމަށްޓަކައި ޝަރީއަތް ކުރުމާބެހޭ ޖިނާއީ އިޖުރާތު ގަވާއިދުގެ 13ވަނަ މާއްދާގެ ދަށުންނެވެ. އަދި އެ ކަމަކީ އިންތިޒާމުވެގެން ގިނަ ބަޔަކުވެގެން ކުރި ކަމެއް ކަމަށް ބެލެވޭ ކަމަށްވެސް ކޯޓު އަމުރުގައި ވަނީ ބުނެފައެވެ.
މި މައްސަލައާއި ގުޅުވާ މީގެ ކުރިން ފުލުހުން ބުނެފައި ވަނީ ފަސީހު ހައްޔަރު ކުރީ މަސްތުވާތަކެތި ކަމަށް ބެލެވޭ ތަކެތި އޭނާގެ ހަށިގަނޑުން ފެނިފައި ވުމުން ކަމަށެވެ. އަދި އެ ތަކެތީގެ ވަގުތީ ބަރުދަނުގައި 340 ގްރާމް ހުރިކަމަށް ވެސް ފުލުހުން އޭރު ވަނީ ބުނެފައެވެ.
ދާދި ފަހުން ވެސް ކްރިމިނަލް ކޯޓުން ވަނީ ރާއްޖެއަށް މަސްތުވާތަކެތި އެތެރެކުރަން މަސައްކަތްކުރި މެލޭޝިއާގެ ދެ މީހަކު ބަންދުކޮށް ޝަރީއަތް ނިމެންދެން ބަންދުކުރުމަށް އަމުރުކޮށްފައެވެ.