ބާރަ ޕިކަޕް ބެޓެރި ވަގަށްނެގި ކަމަށް ތުހުމަތުކޮށް، ދެ ފިރިހެނުން މިއަދު ހައްޔަރުކޮށްފިއެވެ.
މީޑިއާތަކާ ހިއްސާކުރި މެސެޖެއްގައި ފުލުހުން ބުނީ، މިއަދު 6:54 ހާއިރު ފަރީދީ މަގާއި ޗާންދަނީ މަގު ގުޅޭ ހިސާބުން ޕިކަޕެއް ދުއްވާފައި ދިޔަ ބަޔަކާމެދު ތުހުމަތުކުރެވިގެން ޕިކަޕު ހުއްޓުވައިގެން ބަލާ ފާސްކުރި ކަމަށެވެ.
އެގޮތުން، ބަލާފާސްކުރުމުގެ ތެރެއިން ވަގަށް ނަގާފައިވާ ކަމަށް ތުހުމަތުކުރެވޭ 12 ޕިކަޕް ބެޓެރި ފެނުނު ކަމަށް ފުލުހުން ބުނެފައިވެއެވެ.
މި މައްސަލާގައި ހައްޔަރުކޮށްފައި ވަނީ އުމުރުން 43 އަހަރުގެ ސ. ފޭދޫ، އަނަސް، މުހައްމަދު ނާޒީދުއާއި އުމުރުން 32 އަހަރުގެ ސ. މަރަދޫފޭދޫ، މާކަރީ ލައިޓް، އަލީ އަހުސަނެވެ.
މި މައްސަލަ ފުލުހުން އަންނަނީ އިތުރަށް ތަހުގީގު ކުރަމުންނެވެ.
އެކި ގޮތްގޮތުން މަކަރާއި ހީލަތް ހަދައިގެން ފޭރުމުގެ މައްސަލަތައް މީގެ ކުރިން ވަނީ ސޯޝަލް މީޑިއާއަށް ފެންމަތިވެފައެވެ. އެގޮތުން މިފަހުން އުމުރުން ދުވަސްވީ މީހުންނަށް އަމާޒުކޮށްގެން ހިންގާ ހީލަތުގެ މައްސަލަތައް އިތުރުވެފައިވާ ކަމަށް ފުލުހުން ބުނެފައިވެއެވެ.