ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިންޑިއާއަށް މިވަގުތު ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން، މިއަދު އެ ގައުމުގެ ބެންގަލޫރަށް ވަޑައިގެންފިއެވެ.
ބެންގަލޫރުން ރައީސް މުއިއްޒުގެ ދެކަނބަލުންނަށް ވަނީ ހޫނު މަރުހަބާއެއް ކިޔައިފައެވެ. އެތަނުގައި އިންޑިއާއިން ރާއްޖެއަށް ކަނޑައަޅުއްވާފައިވާ ސަފީރު މުނޫ މަހާވަރު ވެސް އެމަނިކުފާނަށް މަރުހަބާ ކިޔުއްވަން ހުންނެވިއެވެ.
ބެންގަލޫރަށް ވަޑައިގެން އެމަނިކުފާނު އެ ތަނުގައި ބާއްވާ ބިޒްނަސް ފޯރަމްގައި ބައިވެރިވެވަޑައިގަތުމަށް ވަނީ ހަމަޖެހިފައެވެ.
އިންޑިއާއަށް އެމަނިކުފާނު ކުރައްވާ ދަތުރުފުޅަކީ އިންޑިއާގެ ރައީސް ދުރްޕަތީ މުރްމޫގެ ދައުވަތަކަށް ކުރައްވާ ދަތުރުފުޅެކެވެ.
އިންޑިއާއަށް ކުރައްވާ ދަތުރުފުޅުގައި ރައީސް ބެންގަލޫރަށް ވަޑައިގަތުމުގެ ތެރެއިން -- ފޮޓޯ/ ރައީސް އޮފީސް
އެމަނިކުފާނު ވަނީ އެ ދަތުރުފުޅުގެ ތެރެއިން އިއްޔެ މުމްބާއީއަށް ވަޑައިގެންފައެވެ. އަދި ރާއްޖޭގައި ހުރި އިންވެސްޓުމެންޓުގެ ފުރުސަތުތަކާ ބެހޭ މައުލޫމާތު ހިއްސާކުރުމަށް އެ ތަނުގައި ބާއްވާ ބިޒްނަސް ފޯރަމްގައި ބައިވެރިވެވަޑައިގެންފައެވެ. އޭގެ އިތުރުން ރާއްޖޭގެ ފަތުރުވެރިކަން އިޝްތިހާރު ކުރުމަށްޓަކައި އިންޑިއާގެ ފިލްމީ ތަރިންނާއި އިންފުލުއެންސަރުންނާ އެކު އިވެންޓެއްގައި ބައިވެރިވެވަޑައިގަތެވެ.
އެ ދަތުރުފުޅުގެ ތެރެއިން ރައީސް މުއިއްޒު ވަނީ، އިންޑިއާގެ ރައީސްގެ އިތުރުން ބޮޑުވަޒީރު ނަރެންދްރަ މޯދީއާއި އިންޑިއާ ސަރުކާރުގެ މުހިންމު ބައެއް ބޭފުޅުންނާ ބައްދަލުކުރައްވާފައެވެ. އަދި އިންޑިއާގެ ނިއުދިއްލީގައި ބޭއްވި އިންޑިއާ މޯލްޑިވްސް ބިޒްނަސް ފޯރަމުގައި ވެސް ބައިވެރިވެވަޑައިގެންފައިވެއެވެ.
އަންނަ އަހަރަކީ ރާއްޖެއާއި އިންޑިއާއާ ދެމެދު ޚާރިޖީ ގުޅުން ރަސްމީ ސިފައެއްގައި ގާއިމްކުރިތާ 60 އަހަރު ފުރޭ އަހަރު ކަަމަށް ވުމުން އެ މަނިކުފާނު ވަނީ އެ މުނާސަބާ ފާހަގަކުރުމަށް ރާއްޖެ ވަޑައިގަތުމަށް މޯދީއަށް ދައުވަތު އަރުވައިފައެވެ. އަދި މޯދީ ވަނީ އެ ދައުވަތު ގަބޫލުފުޅު ވެސް ކުރައްވާފައެވެ.
ހަމައެއާއެކު މި ދަތުރުފުޅުގައި ރުޕޭ ކާޑު ތައާރަފްކުރުމާއި، ހަނިމާދޫ އެއާޕޯޓުގެ ރަންވޭ އިފްތިތާހުކުރުމުގެ އިތުރުން މުހިންމު ބައެއް އެއްބަސްވުންތައް ދެ ގައުމު ދެމެދު ބަދަލުކޮށްފައިވެއެވެ.
ރައީސްގެ މި ދަތުރުފުޅު ނިންމަވާލައްވާނީ މާދަމާއެވެ.