ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)އަށް ދަނޑުތަކެއް އަޅައިދިން ކޮރެއާ ކުންފުންޏަކަށް 3.3 މިލިއަން ޑޮލަރު ދައްކަން ސިވިލް ކޯޓުން ހުކުމްކޮށްފިއެވެ.
މި މައްސަލައަކީ ވިލިމާލެއާއި ހުޅުމާލޭގައި ފުޓުބޯޅަ ދަނޑެއް ތަރައްގީކުރުމަށް 2021ވަނަ އަހަރު އެފްއޭއެމް އާއި ކޮރެއާގެ ޓީކުއިން ކޮންސްޓްރަކްޝަން ކޯ ލިމިޓޭޑާ ދެމެދު ސޮއިކުރެވުނު އެއްބަސްވުމާ އެއްގޮތަށް އެފްއޭއެމްއިން ފައިސާ ނުދައްކައިގެން، އެ ކުންފުނިން ކޯޓަށް ހުށަހެޅި މައްސަލައެވެ.
މައްސަލައިގެ ދައުވާގައި ބުނެފައިވަނީ އެއްބަސްވުމުގައި ބަޔާންކޮށްފައިވާ ގޮތަށް އެފްއޭއެމުން ފައިސާ ދައްކާފައިނުވާ ކަމަށާއި، ފައިސާ ދެއްކުމުގައި ލުއިތަކެއް ދިނުމަށް އެ އެސޯސިއޭޝަނުން އެދުމުން، ދެވުނު ލުއިތަކާ އެއްގޮތަށް ވެސް ފައިސާ ދައްކާފައިނުވާ ކަމަށެވެ.
އެހެން ކަމުން ޓީކުއިން ކޮންސްޓްރަކްޝަނުން ވަނީ އެ ކުންފުންޏަށް ލިބެން ޖެހޭ ފައިސާއާއި، ފައިސާ ނުލިބުމުން ލިބުނު ގެއްލުމުގެ ބަދަލުގެ އިތުރުން، މި މައްސަލަ ޝަރީއަތަށް ހުށަހެޅުމުން އެކަމަށް ހިންގި ޚަރަދު ވެސް އެއްފަހަރާ ހޯދުމަށް އެދިފައެވެ.
ޓީކުއިން ކޮންސްޓްރަކްޝަނުން ކޯޓުގައި އެދިފައިވަނީ ޖުމްލަ 5.9 މިލިއަން ޑޮލަރު އެފްއޭއެމްގެ އަތުން އެއްފަހަރާ ނަގައިދިނުމަށް އަމުރުކޮށްދިނުމަށެވެ. އެއީ:
- ގެއްލުމުގެ ބަދަލުގެ ގޮތުގައި ދެ މިލިއަން ޑޮލަރު
- ޝަރީޢަތުގެ ޚަރަދުގެ ގޮތުގައި 500،000 ޑޮލަރު
- މަސައްކަތުގެ އަގަށްވާ 3.3 މިލިއަން ޑޮލަރު
އެފްއޭއެމްއާއި ޓީކުއިން ކޮންސްޓްރަކްޝަނާ ދެމެދު ހަދާފައިވާ އެއްބަސްވުމުގައި ގެއްލުމުގެ ބަދަލުދިނުމާ ގުޅޭ އެއްވަސް މާއްދާއެއް ބަޔާންކޮށްފައިނުވާތީ ކޯޓުން ނިންމީ އެ ފައިސާ ނަގައިދެވެން ނެތް ކަމަށެވެ.
އަދި ޝަރީއަތުގެ ޚަރަދުގެ ގޮތުގައި ޓީކުއިން ކޮންސްޓްރަކްޝަނުން 500،000 ޑޮލަރު ޚަރަދުކުރީ، ކޮންމެހެން ކުރަން ޖެހިގެން، އެކަށީގެންވާ ހާލަތެއްގައި ނުވަތަ ނޫންތޯ އެނގޭނެ ފަދަ އެއްވެސް ލިޔެކިޔުމެއް އެ ކުންފުނީގެ ފަރާތުން ހުށަހަޅާފައިނުވާތީ، އެ ފައިސާ ވެސް ނަގައިދެވެން ނެތް ކަމަށް ކޯޓުން ވަނީ ނިންމައިފައެވެ.
އެހެން ކަމުން މި މައްސަލައިގައި ސިވިލް ކޯޓުން ހުކުމް ކުރީ، ޓީކުއިން ކޮންސްޓްރަކްޝަނުން އެފްއޭއެމްގެ މައްޗަށް ހުށަހަޅާފައިވާ ދައުވާ ސާބިތުވާތީ، އެ އެސޯސިއޭޝަނުން ޓީކުއިން ކޮންސްޓްރަކްޝަނަށް ދައްކަން ޖެހޭ 3.3 މިލިއަން އެމެރިކާ ޑޮލަރު އެއްމަސްދުވަހުގެ ތެރޭގައި ދައްކައި ޚަލާސްކުރުމަށެވެ.
މި މައްސަލަ ބެއްލެވީ ސިވިލް ކޯޓުގެ ޣާޒީ އަލީ އަބްދުﷲއެވެ.
އެފްއޭއެމްގެ ކުރީގެ ރައީސް ބައްސާމް އަދީލް ޖަލީލަށް ތުހުމަތުކުރެވޭ ކޮރަޕްޝަންގެ ގިނަ މައްސަލަތަކެއް ފުލުހުން އަންނަނީ ތަހުގީގުކުރަމުންނެވެ.
އެގޮތުން، އެފްއޭއެމްގެ ފައިސާއިން ބައްސާމް ގަތްކަމަށް ބުނާ ދެ އެޕާޓްމަންޓް މާދަމާގެ ކުރިން ފުލުހުންނަށް ހަވާލުކުރުމަށް ވެސް މިދިޔަ ހަފުތާގައި ފުލުހުން ވަނީ ނޯޓިސްފޮނުވައިފައެވެ.