ފީފާއިން އެފްއޭއެމަށް ފޮނުވި ފައިސާއަށް ޚިޔާނާތްތެރިވި މައްސަލައިގައި އެ އެސޯސިއޭޝަނުގެ ކުރީގެ ރައީސް، ބައްސާމް އަދީލް ޖަލީލުގެ މައްޗަށް އިތުރު ދައުވާތަކެއް މިއަދު އުފުލައިފިއެވެ.
މިއީ ބައްސާމް އެފްއޭއެމްގެ ރައީސްގެ މަގާމުގައި ހުރިއިރު، އެ އެސޯސިއޭޝަނަށް ބޭރުގެ ފަރާތްތަކުން އެހީގެ ގޮތުގައި އެމެރިކާ ޑޮލަރުން ލިބޭ ފައިސާ، އެ އެސޯސިއޭޝަންގެ އިސްވެރިންނާއި އެސޯސިއޭޝަނާ ގުޅުން އޮންނަ ފަރާތްތަކާއި، ކުންފުނިތަކުގެ އެކައުންޓްތަކަށް ޖަމާކޮށް، ނަހަމަގޮތުގައި ބޭނުންކޮށް މަނީލޯންޑްރިންގެ ޢަމަލުތަކެއް ހިންގިކަމަށް ތުހުމަތު ކުރާ މައްސަލައެވެ.
ޕްރޮސެކިއުޓާ ޖެނެރަލް (ޕީޖީ)ން ބުނީ ބައްސާމްގެ މައްޗަށް ކޮށްފައިވަނީ އިތުރު ދެ ދައުވާއެއް ކަމަށެވެ. އޭގެ ތެރޭގައި އަމީން އެވެނިއުއިން އެޕާޓްމަންޓެއް ގަތުމަށް ފައިސާ ޖަމާކުރުމަށްޓަކައި، ފުޓްބޯލް އެސޯސިއޭޝަން އޮފް މޯލްޑިވްސްގެ 1,200,000 އެމެރިކާ ޑޮލަރަށް ޚިޔާނާތްތެރިވެފައިވާތީ ކުރާ ދައުވާއެއް ހިމެނެއެވެ.
ޚިޔާނާތުގެ މި ދައުވާ އޭނާގެ މައްޗަށް ސާބިތުވެއްޖެނަމަ، އެއް އަހަރާ ހަތް މަހާއި ހަ ދުވަހުގެ ޖަލު ހުކުމެއް އަންނާނެއެވެ.
ދެވަނަ ދައުވާއަކީ އަމީން އެވެނިއުގެ ބްލޮކް Aގެ 12 އަދި 13 ވަނަ ފަންގިފިލާގެ އަށް ކޮޓަރިއާއި 10 ފާހަނައިގެ އެޕާޓްމަންޓް ގަތުމަށް އެއްބަސްވުމެއްގައި ސޮއިކޮށް، އެ އެއްބަސްވުމުގެ ދަށުން، އަމީން ކޮންސްޓްރަކްޝަނަށް ޖީއެސްޓީ ހިމެނޭ ގޮތަށް ދައްކަންޖެހޭ ޖުމްލަ -/25,000,000 ރުފިޔާގެ ތެރެއިން ބުކިން ފީ އާއި ކޮމިޓްމަންޓް ފީ ހިމެނޭ ގޮތަށް އެ ތަނުގެ އަގަށްވާ ފައިސާގެ ގޮތުގައި އެފްއޭއެމްގެ ޑޮލަރު އެކައުންޓުން އެކިއެކި ކުންފުނިތަކަށް ފައިސާ ފޮނުވައި، އެ ފައިސާ އަމީން ކޮންސްޓްރަކްޝަނަށް ދައްކާފައިވާތީއެވެ.
މި މައްސަލައިގައި އޭނާގެ މައްޗަށް ކުރަނީ މަނީ ލޯންޑްރިންގެ ކުށުގެ ދައުވާއެވެ. މި ދައުވާ ސާބިތުވެއްޖެނަމަ، 100,000 ރުފިޔާއާއި 1,000,000 ރުފިޔާއާއި ދެމެދުގެ އަދަދަކުން ޖޫރިމަނާ ކުރުމާއެކު ފަސް އަހަރާއި 15 އަހަރާއި ދެމެދުގެ މުއްދަތުގެ ޖަލު އަދަބެއް އަންނާނެއެވެ.
މި ދައުވާތަކާ ގުޅިގެން ޕީޖީން ވަނީ، މި ޚިޔާނާތުގެ ސަބަބުން އެފްއޭއެމްއަށް ލިބުނު ގެއްލުމުގެ ބަދަލުގެ ގޮތުގައި ޖުމްލަ 1,200,000 އެމެރިކާ ޑޮލަރު ބައްސާމުގެ އަތުން ނަގައިދިނުމަށް އެދިފައެވެ. އަދި ލޯންޑާ ކޮށްފައިވާ މި ފައިސާ ބޭނުންކޮށްގެން ބައްސާމު ބޭނުންކުރަމުން ގެންދިޔަ އަމީން އެވެނިއުގެ ދެ އެޕާޓްމަންޓު ދައުލަތަށް ނަގައިދިނުމަށް ވެސް އެދިފައިވެއެވެ.
ޕީޖީން ބުނީ، މި ޢަމަލުތަކުގައި ބައިވެރިވި އެފްއޭއެމްގެ މުވައްޒަފުންގެ މައްޗަށް ދައުވާ ކުރުމަށްޓަކައި މިހާރު ތައްޔާރުވަމުން އަންނަ ކަމަށެވެ. މި މައްސަލައަކީ ދިވެހި ފުލުހުންގެ ޚިދުމަތުން ތަހުގީގު ކުރަމުންދާ މައްސަލައެކެވެ. އެހެން ކަމުން ތަހުގީގަށް ކުރިއެރުން ލިބޭ ވަރަކުން، ހެކި ގަރީނާ ވަޒަންކޮށް، މައްސަލައިގައި އިތުރު ދައުވާތައް ކޯޓަށް ހުށަހަޅަމުން ގެންދާނެ ކަމަށް ޕީޖީން ބުންޏެވެ.
އެފްއޭއެމްގެ ފައިސާއަށް ޚިޔާނާތްވީ މައްސަލައިގައި ބައްސާމްގެ މައްޗަށް ދައުވާކޮށްފައިވަނީ މި އަހަރުގެ ޖެނުއަރީ 21ގައެވެ. އެ މައްސަލައިގެ އަޑުއެހުންތައް ކްރިމިނަލް ކޯޓުގައި ކުރިޔަށް އެބަދެއެވެ.