ނިއު ރޭޑިއެންޓްގެ އެކެޑަމީތައް އާބާދީ ބޮޑު ސަރަހައްދުތަކުގައި ފަށަން ނިންމައިފައިވާ ކަމަށާއި ފުރަތަމަ އެކެޑަމީ ހަދާނީ ހުޅުމާލޭގައި ކަމަށް އެ ކްލަބުން ބުނެފިއެވެ.
މި ކަން ހާމަކުރެއްވީ ނިއު ރޭޑިއެންޓްގެ ބޯޑުން މިއަދު ބޭއްވި ނޫސްވެރިންގެ ބައްދަލުވުމުގައި އެ ކްލަބުގެ ޗެއާމަން އަހުމަދު މުބީނެވެ.
އޭނާ ވިދާޅުވި ގޮތުގައި ކުރިޔަށް އޮތް ދޮޅު މަހެއްގެ ތެރޭގައި ޓީމު އެކުލަވާލައި، ޕްރެކްޓިސް ފެށުމަށް ނިއުއިން އަންނަނީ މަސައްކަތް ކުރަމުންނެވެ. އެ ގޮތުން ރާއްޖޭގައި ތިބި ހުނަރުވެރި ފުޓުބޯޅަ ކުޅުންތެރިންނަށް އެ ކްލަބުން ފުރުސަތު ހުޅުވައިލަން ނިންމާފައިވާއިރު، ކުޅުންތެރިންނަށް އެ ކަމަށް އެދެވޭނެ ގޮތްތައް ކުރިޔަށް އޮތް ތަނުގައި ހާމަކުރަމުން ދާނެ ކަމަށް މުބީން ވިދާޅުވިއެވެ.
އޭނާ ވިދާޅުވީ މަސައްކަތް ކުރަމުން ގެންދަނީ އަޑިއަޅާލާފައިވާ ދިވެހި ފުޓުބޯޅަ ނަގައި ކޮޅަށް ޖެހުމަށް ކަމަށެވެ. ދިވެހި ފުޓުބޯޅަ ޑޮމިނޭޓު ކުރި ކްލަބުތައް ކަމަށްވާ ނިއުރޭޑިއެންޓް، ވިކްޓަރީ އަދި ވެލެންސިއާ ފަދަ ކްލަބުތަކާ ނުލައި، ދިވެހި ފުޓުބޯޅަ ކުރިއަރާނެ ކަމަށް ނުބެލެވޭ ކަމަށް ވިދާޅުވިއެވެ.
ނިއުގެ އައު ބޯޑު އެކުލަވައިލުމަށް އިންތިޚާބު ބޭއްވީ، މި މަހުގެ 20ވަނަ ދުވަހުގައެވެ. އައު ބޯޑުގެ ފަރާތުން ފުރަތަމަ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޗެއާ، މުބީން ވިދާޅުވީ އެ ކްލަބުން ހިންގާ އެކެޑަމީތައް ރާއްޖޭގެ އާބާދީ ބޮޑެތި ސަރަހައްދުތަކުގައި ފެށުމަށް ނިންމާފައިވާ ކަމަށެވެ. އެ ގޮތުން އެންމެ ފުރަތަމަ އެކެޑަމީ ފެށުމަށް ނިންމާފައިވަނީ ހުޅުމާލޭގައެވެ.
މުބީން ވިދާޅުވި ގޮތުގައި ބޮޑެތި އާބާދީތަކަށްފަހު، އަތޮޅު ތެރޭގެ ރަށްތަކުގެ ޖަމިއްޔާތަކާއި ކުޅިވަރުގައި ހަރަކާތްތެރިވާ ފަރާތްތަކާ ގުޅިގެން، ނިއުގެ އެކެޑަމީތައް މުޅި ރާއްޖޭގައި ހިންގުމުގެ މަސައްކަތް އެ ކްލަބުން ކުރާނެއެވެ.
ރާއްޖޭގެ ފަސްޓް ޑިވިޝަނުގައި ކުޅެމުންދަނިކޮށް، މުސާރައިގެ މައްސަލައިގައި ފީފާ އޭއެފްސީގެ ޓްރާންސްފާ ބޭންއާއި އެފްއޭއެމްގެ ސަސްޕެންޝަނަކާ އެ ކްލަބަށް ކުރިމަތިލާން ޖެހުނެވެ. އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)އިން ނިންމީ ރާއްޖޭގެ ހުރިހާ ކުޅިވަރު ހަރަކާތްތަކަކުން ނިއުރޭޑިއެންޓު ސަސްޕެންޑު ކުރުމަށެވެ. އެއާއެކު އެފްއޭއެމުން އެ ކްލަބުގެ ރަސްމީ މުއާމަލާތުގެ ހުރިހާ ޚިދުމަތެއް ވެސް ކަނޑައިލިއެވެ.
ރާއްޖޭގެ ފުޓުބޯޅަ ކްލަބުތަކަށް ފައިސާގެ ދަތިކަން ވަރަށް ބޮޑަށް އޮވެއެވެ. އެގޮތުން މުސާރައިގެ މައްސަލައަކީ ހުރިހާ ކްލަބަކުން ކަހަލަ ގޮތަކަށް ކުރިމަތިލާންޖެހޭ މައްސަލައެކެވެ. މުސާރަ ނުދެވި އެހެން ކްލަބުތަކެއް ވެސް ވަނިކޮށް، ނިއުއާ މެދު ފިޔަވަޅު އެޅުމަކީ ޒާތީ ތައައްސުބު އިސްކޮށްގެން ކުރި ކަމެއް ކަމަށް އެ ކްލަބުން ދެކެއެވެ.
ނިއުއިން މިއަދު ބުނީ، ކްލަބާ މެދު އެފްއޭއެމުން ކަންކޮށްފައި އޮތީ ވަރަށް ބޭއިންސާފުން ކަމަށެވެ. އޭގެ ނަތީޖާއަކަށްވީ ދިވެހި ފުޓުބޯޅައަށް ލޯބިކުރާ މީހުންނަށް ބޮޑު ނިކަމެތި ކަމެއް ލިބުން ކަމަށް އެ ކްލަބުން ދެކެއެވެ.
ނިއުރޭޑިއެންޓް ސްޕޯޓްސް ކްލަބުގެ ނަމުގައި ވާދަ ކުރެވެން ނެތުމުގެ ސަބަބުން އެ ކްލަބުން ރޭޑިއެންޓުގެ ނަމުގައި ވެސް ނިކުންނަން މަސައްކަތްތަކެއް ކުރިއެވެ. އެހެން ނަމަވެސް އެފްއޭއެމުން އެ ކަމަށް ވެސް ހުރަސް އެޅިއެވެ.
އެހެން ނަމަވެސް ފަހުން ލުއިތަކެއް ދީގެން ނިއުރޭޑިއެންޓުގެ ނަމުގައި ދެވަނަ ޑިވިޝަނުގެ ދެ މުބާރާތެއް ކުޅުމުގެ ހުއްދަ ދިނެވެ.
މިދިޔަ ދުވަސްތަކުގައި އެ ކްލަބުން ކުރި މަސައްކަތަކީ ޓީމު އެކުލަވައިލުމެވެ. އެ ގޮތުން ނިއުރޭޑިއެންޓު މިހާ ހިސާބަށް ގެނެސްދިން ފަރާތްތަކުގެ ޚިޔާލާ މަޝްވަރާ ހޯދައިގެން ކްލަބު އަލުން ވަރުގަދަކޮށް، އަޑިއަޅާލާފައިވާ ދިވެހި ފުޓުބޯޅަ ނަގައި ކޮޅަށް ޖެހުމުގެ މަސައްކަތް ކުރަމުންގެންދާނެ ކަމަށް ބުންޏެވެ.
އެ ކްލަބާއި ކްލަބުގެ ސަޕޯޓަރުންގެ ހައްގުގައި ކުރަންޖެހުނު ކޮންމެ މަސައްކަތެއް ވެސް ކުރާނެ ކަމުގެ ޔަގީންކަން މިއަދު ދިނެވެ.