ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)އިން ގިނަ އަދަދެއްގެ ފައިސާއަށް ޚިޔާނާތްތެރިވި މައްސަލައިގައި އަމީން ކޮންސްޓްރަކްޝަން ކުންފުނީގެ މައްޗަށް ދައުވާކޮށް، އެއް މިލިއަން ޑޮލަރު ނަގައިދޭން ޕްރޮސެކިއުޓާ ޖެނެރަލް (ޕީޖީ) އޮފީހުން އެދިއްޖެއެވެ.
އެފްއޭއެމްގެ ޚިޔާނާތުގެ މައްސަލައިގައި އެ އެސޯސިއޭޝަނުގެ ކުރީގެ ރައީސް، ބައްސާމް އަދީލް ޖަލީލުގެ މައްޗަށް ދައުވާތަކެއްކޮށްފައިވާއިރު، މިއަދު ޕީޖީ އޮފީހުން އާންމުކޮށްފައިވާ މައުލޫމާތުގައިވާ ގޮތުން އެ މައްސަލައިގައި އިތުރު ދެ މީހަކަށާއި ކުންފުންޏަކަށް ދައުވާކުރުމަށް މިދިޔަ އާދިއްތަ ދުވަހު ވަނީ ކްރިމިނަލް ކޯޓަށް ފޮނުވައިފައެވެ.
އޭގެ ތެރެއިން އަމީން ކޮންސްޓްރަކްޝަންގެ މައްޗަށް ކޮށްފައިވަނީ މަނީ ލޯންޑްރިން އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނުގެ ދަށުން، މަނީ ލޯންޑާކުރުމަށް އެހީތެރިވުމުގެ ކުށުގެ ދައުވާއެވެ.
އެ ދައުވާކުރާ ސަބަބު ކަމަށް ބުނެފައިވަނީ ބައްސާމް 2016 ވަނަ އަހަރުން ފެށިގެން އެފްއޭއެމްގެ ރައީސްގެ މަގާމުގައި ހުރެ، އަމީން އެވެނިއުގެ އެޕާޓްމެންޓް ގަތުމަށް އޭނާ ދިން ފައިސާއަކީ އެފްއޭއެމްގެ ފައިސާކަން އެނގޭ އިރުވެސް އެ ފައިސާ ބަލައިގަތުމުންނެވެ. އެގޮތުން، އެ އެސޯސިއޭޝަންގެ އެކައުންޓުގެ ޗެކު، އޭޕްރީލް 8، 2021 ދުވަހު ތައްޔާރުކުރުވައި، ޗެކުގައި އޭނާ ސޮއިކޮށް، އޭޕްރީލް 14، 2021 ދުވަހު ފީފާއިން އެފްއޭއެމްގެ އެކައުންޓަށް 1.92 މިލިއަން ޑޮލަރު ޖަމާކުރުމުން، އަމީން އެވެނިއުގެ އެޕާޓްމަންޓް ގަތުމަށްޓަކައި، އެ ފައިސާގެ ތެރެއިން އެއް މިލިއަން ޑޮލަރު ނެގޭ ގޮތަށް ބައްސާމް ޗެކު ހަވާލުކުރި ކަމަށް ދައުވާގައިވެއެވެ.
މީގެ އިތުރުން އެ ފައިސާއަކީ ޑޮލަރު ގަތުމުގެ މުއާމަލާތެއްކަމަށް ބަޔާންކޮށް، ބޭންކް އޮފް ސިލޯނަށް ސިޓީ ފޮނުވައި، އޭޕްރީލް 14، 2021ގައި އަމީން ކޮންސްޓްރަކްޝަންގެ އެކައުންޓަށް އެ ފައިސާ ޖަމާކޮށް، އެ ފައިސާއަށްވާ ދިވެހި ރުފިޔާ އެފްއޭއެމަށް އަނބުރާ ދެއްކުމަކާ ނުލައި، އެ ފައިސާއަށްވާ ދިވެހި ރުފިޔާ އެފްއޭއެމަށް ނަގުދު ފައިސާއިން ދީފައިވާކަން ދެއްކުމުގެ ގޮތުން އަމީން ކޮންސްޓްރަކްޝަންގެ ނަމުގައި ކޭޝް ވައުޗަރުތަކެއް ތައްޔާރުކޮށް، މަނީ ލޯންޑާކުރުމަށް އަމީން ކޮންސްޓްރަކްޝަންއިން ބައްސާމަށް އެހީވި ކަމަށް ވެސް ދައުވާގައިވެއެވެ.
އެހެންވެ، އޭގެ ސަބަބުން އެފްއޭއެމްއަށް ލިބުނު ގެއްލުމުގެ ބަދަލުގެ ގޮތުގައި ޖުމްލަ އެއް މިލިއަން ޑޮލަރު އަމީން ކޮންސްޓްރަކްޝަންއިން ނަގައިދިނުމަށާއި، ބައްސާމްގެ އެޕާޓްމަންޓް A1205 އަދި A1206 ދައުލަތަށް ނަގައިދިނުމަށް ޕީޖީން އެދިފައިވެއެވެ.
އަމީން ކޮންސްޓްރަކްޝަންގެ އިތުރުން ޕީޖީން ވަނީ އެފްއޭއެމްގެ އެކައުންޓްސް ޑިޕާޓްމަންޓްގެ ހެޑްގެ ގޮތުގައި މަސައްކަތްކުރި ގއ. ގެމަނަފުށި، ފެހިކުރި، މުހައްމަދު އަގީލާއި އެ އެސޯސިއޭޝަންގައި އެކި މަގާމުތައް އަދާކުރަމުން އައި މ. ހިރިނައިދޫ، ހަސަން ވަހީދުގެ މައްޗަށް ދައުވާކޮށްފައެވެ.
އެ ދެ މީހުންގެ މައްޗަށް ވެސް އުފުލައިފައި ވަނީ މަނީ ލޯންޑާކުރުމަށް އެހީތެރިވުމުގެ ކުށުގެ ދައުވާއެވެ.
އަގީލްގެ ދައުވާގައި ވަނީ، ބައްސާމް އަމީން އެވެނިއުގެ އެޕާޓްމެންޓް ގަތްއިރު އެފްއޭމްގެ ފައިސާއިން ފައިސާ ދެއްކުމަށް އޭނާ ޗެކު ތައްޔާރުކޮށްދީފައިވާ ކަމަށެވެ. އަދި އެ ކުންފުންޏަށް އެއް މިލިއަން ޑޮލަރު ދިނުމުން އެއީ ޑޮލަރު ވިއްކުމުގެ މުއާމަލާތެއްކަމުގައި ދެއްކުމުގެ ގޮތުން ޖުމްލަ 15.4 މިލިއަން ރުފިޔާ ލިބުނުކަމަށް އޭނާ ސްޓޭމްޕް ޖަހައި ސޮއިކޮށް، އެ ލިޔުން ވެސް ތައްޔާރުކޮށްފައިވާ ކަމަށް ޕީޖީން ބުންޏެވެ.
މީގެ އިތުރުން ހަސަން ވަހީދުގެ ދައުވާގައި ވެސް ވަނީ ބައްސާމްގެ އެޕާޓްމެންޓް ގަންނަންް އަމީން ކޮންސްޓްރަކްޝަނަށް ފައިސާ ދައްކަން އޭނާ އެހީވި ކަމަށް ބުނެފައެވެ.
އެގޮތުން އެފްއޭއެމްގެ އެކައުންޓުގެ ޗެކެއް މެދުވެރިކޮށް ޖެނުއަރީ 19، 2021 ދުވަހު ޗެކްމާކް ކުންފުންޏަށް އެއްލައްކަ ޑޮލަރު ދޫކުރުމުގެ ކަންކަން އިންތިޒާމްކޮށް، އެ ފައިސާއަށްވާ 1.54 މިލިއަން ރުފިޔާ އެފްއޭއެމަށް ދެއްކުމުގެ ގޮތުން ޗެކްމާކް ކުންފުންޏާއި އައިއެސް އެންޓަޕްރައިޒަސްއިން ދޫކުރި ޗެކުތަކުގައިވާ ފައިސާ އަމީން ކޮންސްޓްރަކްޝަންއަށް ޖަމާކުރުމަށް ބޭންކް އޮފް ސިލޯނަށް އިރުޝާދުދީ، އެ ފައިސާ އަމީން ކޮންސްޓްރަކްޝަންއަށް ޖަމާކުރުމަށް އެހީތެރިވެދީފައިވާ ކަމަށް ދައުވާގައިވެއެވެ.
ހަމަ އެ ދުވަހު، އެފްއޭއެމްގެ އެކައުންޓުގެ ޗެކު މެދުވެރިކޮށް ޕްރޯ ސިނަޖީ މެޑިކަލް ސިސްޓަމްސްއަށް އެއް ލައްކަ ޑޮލަރު ދޫކުރުމުގެ ކަންކަން އިންތިޒާމްކޮށް، އެ ފައިސާއަށްވާ 1.54 މިލިއަން ރުފިޔާ އެފްއޭއެމަށް ދެއްކުމުގެ ގޮތުން ޕްރޯ ސިނާޖީ މެޑިކަލް ސިސްޓަމްސްއިން ދޫކުރި ޗެކުގައިވާ ފައިސާ އަމީން ކޮންސްޓްރަކްޝަނަށް ޖަމާކުރުމަށް ބޭންކް އޮފް ސިލޯނަށް އިރުޝާދުދީ، އެ ފައިސާ އަމީން ކޮންސްޓްރަކްޝަނަށް ޖަމާކުރުމަށް އެހީތެރިވެދިން ކަމަށް ވެސް ހަސަން ވަހީދުގެ މައްޗަށް ތުހުމަތުކޮށްފައިވެއެވެ.
އެފްއޭއެމްގެ މައްސަލައިގައި ބައްސާމްގެ މައްޗަށް ޚިޔާނާތައި މަނީ ލޯންޑަރިންގެ ދައުވާކޮށްފައި ވަނިކޮށް މިދިޔަ ޑިސެމްބަރު މަހު އޭނާގެ މައްޗަށް ވަނީ އިތުރު ދައުވާތަކެއް ކޮށްފައެވެ.
އޭގެ ތެރޭގައި އަމީން އެވެނިއުއިން އެޕާޓްމަންޓެއް ގަތުމަށް ފައިސާ ޖަމާކުރުމަށްޓަކައި، ފުޓްބޯލް އެސޯސިއޭޝަން އޮފް މޯލްޑިވްސްގެ 1,200,000 އެމެރިކާ ޑޮލަރަށް ޚިޔާނާތްތެރިވެފައިވާތީ ކުރާ ދައުވާއަކާއި އަމީން އެވެނިއުގެ ބްލޮކް Aގެ 12 އަދި 13 ވަނަ ފަންގިފިލާގެ އަށް ކޮޓަރިއާއި 10 ފާހަނައިގެ އެޕާޓްމަންޓް ގަތުމަށް އެއްބަސްވުމެއްގައި ސޮއިކޮށް، އެ އެއްބަސްވުމުގެ ދަށުން، އަމީން ކޮންސްޓްރަކްޝަނަށް ޖީއެސްޓީ ހިމެނޭ ގޮތަށް ދައްކަންޖެހޭ ޖުމްލަ -/25,000,000 ރުފިޔާގެ ތެރެއިން ބުކިން ފީ އާއި ކޮމިޓްމަންޓް ފީ ހިމެނޭ ގޮތަށް އެ ތަނުގެ އަގަށްވާ ފައިސާގެ ގޮތުގައި އެފްއޭއެމްގެ ޑޮލަރު އެކައުންޓުން އެކިއެކި ކުންފުނިތަކަށް ފައިސާ ފޮނުވައި، އެ ފައިސާ އަމީން ކޮންސްޓްރަކްޝަނަށް ދައްކާފައިވާތީ ކުރި މަނީ ލޯންޑްރިންގެ ކުށުގެ ދައުވާއެވެ.
މި ދައުވާތަކާ ގުޅިގެން ޕީޖީން ވަނީ، މި ޚިޔާނާތުގެ ސަބަބުން އެފްއޭއެމްއަށް ލިބުނު ގެއްލުމުގެ ބަދަލުގެ ގޮތުގައި ޖުމްލަ 1,200,000 އެމެރިކާ ޑޮލަރު ބައްސާމުގެ އަތުން ނަގައިދިނުމަށް އެދިފައެވެ.