މާލޭގެ ސްކޫލަކަށް ވަދެ، އަޑުގަދަކޮށް ބައެއް ޓީޗަރުންނަށް ބިރުދެއްކިކަމުގެ ތުހުމަތުގައި މިދިޔަ އޮގަސްޓު މަހުގެ ކުރީކޮޅު ހައްޔަރުކުރި މީހާ އިއްޔެ ބަންދުން ދޫކޮށްލައިފިއެވެ.
މި ހާދިސާ ހިނގީ އޮގަސްޓް މަހު ހައެއްގައެވެ. އެ މައްސަލައިގައި ފުލުހުން ވަނީ 41 އަހަރުގެ ދިވެހި ފިރިހެނަކު ހައްޔަރުކޮށްފައެވެ.
އޭގެ ފަހުން އިއްޔެއާ ހަމައަށް އޭނާ ބަންދުގައި ހުރިއިރު، އޭނާގެ މައްޗަށް ދައުވާކުރަން އެދި މިދިޔަ މަހު 16 ގައި ފުލުހުން ވަނީ ޕްރޮސެކިއުޓާ ޖެނެރަލް (ޕީޖީ)ގެ އޮފީހަށް ފޮނުވައިފައެވެ.
އެކަމަކު، އޭނާގެ މައްޗަށް ދައުވާކުރުމާ ގުޅޭ ގޮތުން މިހާތަނަށް ޕީޖީ އޮފީހުގެ ބަހެއް ލިބިފައެއް ނުވެއެވެ.
އެންމެ ފަހުން އެ ދުވަހު އޭނާގެ ބަންދަށް ކްރިމިނަލް ކޯޓުން ދިން 15 ދުވަސް ހަމަވެގެން އިއްޔެ ކޯޓަށް ހާޒިރުކުރުމުން އޭނާ ބަންދުން ދޫކޮށްލަން ދައުލަތުން އިންކާރުނުކުރާތީއާއި މި ވަގުތު އޭނާ ބަންދުގައި ބަހައްޓަން ޖެހޭ ހާލަތެއް ނެތް ކަމަށް ނިންމައި ބަންދުން ދޫކޮށްލަން ވަނީ ނިންމައިފައެވެ.
ކުރީގެ ކޯޓު އަމުރުތަކުން އެނގޭ ގޮތުގައި އެ މީހާ ސްކޫލު ތެރެއަށް ވަދެ، ބައެއް ޓީޗަރުންނަށް ބިރުދެއްކި ކަމަށް އެ ސްކޫލުގައި މަސައްކަތްކުރާ ބައެއް މުވައްޒަފުން ވަނީ ހެކިބަސް ދީފައެވެ. އެކަމަކު، އެއްވެސް މީހެއްގެ ގައިގައި އަތްލާފައިނުވާ ކަމަށް އެ މީހުން ވަނީ ބުނެފައެވެ.
އެ މީހާ ބައެއް ޓީޗަރުންނަށް ބިރުދައްކާފައިވަނީ ސްކޫލު ދަރިވަރުންގެ ވެސް ކުރިމަތީގައެވެ.
ކޯޓު އަމުރުގައި ވަނީ މި މައްސަލައިގައި ބަންދުކުރި މީހާއަކީ ބިރުދެއްކުމުގެ މައްސަލަތަކުގެ ކުށުގެ ރިކޯޑު އޮތް މީހެއްކަން ފާހަގަކޮށްފައެވެ. ކުރިން އޭނާ ބަންދުގައި ބަހައްޓާފައި ހުރީ ވެސް އެ ފަދަ ކަމެއް ތަކުރާރުވުމުގެ ފުރުސަތު އޮތުމުންނެވެ.