މާލޭގެ ސްކޫލަކަށް ވަދެ، އަޑުގަދަކޮށް ބައެއް ޓީޗަރުންނަށް ބިރުދެއްކިކަމުގެ ތުހުމަތުގައި މިދިޔަ މަހު ކުރީކޮޅު ހައްޔަރުކުރި މީހާއާ ދެކޮޅަށް ދައުވާކުރަން ޕްރޮސެކިއުޓާ ޖެނެރަލްގެ އޮފީހަށް އިއްޔެ ފޮނުވައިފިއެވެ.
މި ހާދިސާ ހިނގީ މިދިޔަ މަހު ހައެއްގައެވެ. އެ މައްސަލައިގައި ފުލުހުން ވަނީ 41 އަހަރުގެ ދިވެހި ފިރިހެނަކު ހައްޔަރުކޮށްފައެވެ.
އެ މީހާގެ ބަންދަށް ކްރިމިނަލް ކޯޓުން ފުރަތަމަ ދިނީ 30 ދުވަހެވެ. އޭގެ ފަހުން ވެސް ބަންދުކުރުމަށް ފަހު އިއްޔެ އަނެއްކާ ވެސް އެ މީހާގެ ބަންދަށް އިތުރު 15 ދުވަސް ވަނީ ޖަހައިފައެވެ.
ކޯޓުގައި ވާހަކަދައްކަމުން އިއްޔެ ފުލުހުން ބުނީ، އެ މީހާއާ ދެކޮޅަށް ދައުވާކުރަން އިއްޔެ ޕްރޮސެކިއުޓާ ޖެނެރަލްގެ އޮފީހަށް ފޮނުވާނެ ކަމަށެވެ. އެހެންވެ، މައްސަލައިގައި ދައުވާކުރުމާ މެދު އެ އޮފީހުން ގޮތެއް ނިންމުމުން އެ މީހާ ޝަރީއަތް ނިމެންދެން ބަންދުކުރުމާ މެދު ގޮތެއް ނިންމުމަކީ އެންމެ ރަނގަޅު ގޮތްކަމަށް އަމުރުގައި ގާޒީ އާއިޝަތު ނުޒުހާ ވަނީ ފާހަގަކޮށްފައެވެ.
ކޯޓު އަމުރުން އެނގޭ ގޮތުގައި އެ މީހާ ސްކޫލު ތެރެއަށް ވަދެ، ބައެއް ޓީޗަރުންނަށް ބިރުދެއްކި ކަމަށް އެ ސްކޫލުގައި މަސައްކަތްކުރާ ބައެއް މުވައްޒަފުން ވަނީ ހެކިބަސް ދީފައެވެ. އެކަމަކު، އެއްވެސް މީހެއްގެ ގައިގައި އަތްލާފައިނުވާ ކަމަށް އެ މީހުން ވަނީ ބުނެފައެވެ.
އެ މީހާ ބައެއް ޓީޗަރުންނަށް ބިރުދައްކާފައިވަނީ ސްކޫލު ދަރިވަރުންގެ ވެސް ކުރިމަތީގައެވެ.
ކޯޓު އަމުރުގައި ވަނީ މި މައްސަލައިގައި ބަންދުކުރި މީހާއަކީ ބިރުދެއްކުމުގެ މައްސަލަތަކުގެ ކުށުގެ ރިކޯޑު އޮތް މީހެއްކަން ފާހަގަކުރައްވައިފައެވެ.
އެހެންވެ، އޭނާ އިތުރު 15 ދުވަހުގެ މުއްދަތަކަށް ބަންދުކުރަން އިއްޔެ ކްރިމިނަލް ކޯޓުން ވަނީ އަމުރުކޮށްފައެވެ.