އަންނަ އޮކްޓޫބަރު 19ގައި ބޭއްވުމަށް ނިންމި ސަރުކާރު ހިންގާ ޕާޓީ، ޕީއެންސީގެ ދާއިރާތަކުގެ އިންތިޚާބު ނޮވެންބަރު ނުވަޔަކަށް ފަސްކޮށްފިއެވެ.
ޕީއެންސީން ބުނީ މި އިންތިޚާބަށް ކުރިމަތިލުމުގެ ޝައުގުވެރިކަން ހުރި ޕާޓީގެ މެންބަރުންނަށް އެ ކަމަށް އެދި ހުށަހެޅުމަށް ދީފައިވާ މުއްދަތު ވެސް އޮކްޓޫބަރު 24ވާ ބުރާސްފަތި ދުވަހުގެ އިރުއޮއްސި ހަޔަކާ ހަމަޔަށް އިތުރުކޮށްފައިވާ ކަމަށެވެ.
އެ ޕާޓީން ބުނީ ދާއިރާތަކުގެ އިންތިޚާބަށް ކުރިމަތިލުމުގެ މުއްދަތާއި، އިންތިޚާބު ބާއްވާ ތާރީޚު ފަސްކުރީ، މަގާމުތަކަށް ޝައުގުވެރިވާ ގިނަ ފަރާތްތަކުން އެ ކަމަށް އެދެމުން ގެންދާތީ ކަމަށެވެ.
ޕީއެންސީން މަގާމުތަކުގެ ގޮތުގައި އިންތިޚާބުކުރަނީ:
- ދާއިރާތަކުގެ ރައީސުންނާއި ނައިބު ރައީސުން
- ޒުވާނުންގެ ހަރަކާތުގެ ރަށު ރައީސުންނާއި އަންހެނުންގެ ހަރަކާތުގެ ރައީސުން
- ސްޓިއަރިން ކޮމިޓީގެ މެންބަރު
އިލެކްޝަންސް ކޮމިޝަނުން އާންމުކޮށްފައިވާ މައުލޫމާތުގައިވާ ގޮތުން، މި ހިނގާ ސެޕްޓެންބަރުގެ 19ވަނަ ދުވަހުގެ ނިޔަލަށް 28،983 މެންބަރުން ޕީއެންސީގައި އެބަ ތިއްބެވެ. އެއާ އެކު އެ ޕާޓީއަކީ މިހާރު ރާއްޖޭގެ ތިންވަނައަށް އެންމެ ބޮޑު ޕާޓީއެވެ.
އެ ޕާޓީގެ އަމާޒަކީ މި އަހަރުގެ ނޮވެންބަރުގެ ނިޔަލަށް 75،000 މެންބަރުން ހަމަކޮށް، ރާއްޖޭގެ އެންމެ ބޮޑު ސިޔާސީ ޕާޓީއަށްވުމެވެ.