ދުނިޔޭގެ ފުރަތަމަ 3ޑީ ޕްރިންޓް ކުރެވޭ ހޮޓާ އެމެރިކާގެ ޓެކްސަސްގައި އިމާރާތްކުރަން ފަށައިފިއެވެ.
ޓެކްސަސް ސްޓޭޓުގެ މާފާ ސިޓީގައި ހުންނަ އެލް ކޮސްމިކޯ ހޮޓެލާއި ކޭމްޕް ގްރައުންޑްގައި ދުނިޔޭގެ ފުރަތަމަ 3ޑީ ޕްރިންޓް ކުރެވޭ ހޮޓެލް އިމާރާތްކުރުމުގެ މަސައްކަތް ފަށައިފައިވާއިރު، މި މަޝްރޫއުގެ ދަށުން 43 އައު ހޮޓެލް ޔުނިޓާއި 18 ރެސިޑެންޝަލް ގެ 40 އޭކަރުގެ ސަރަހައްދެއްގައި އިމާރާތްކުރެވޭނެއެވެ.
އެލް ކޮސްމިކޯގެ ވެރިފަރާތް ކަމުގައިވާ ލިޒް ލެމްބަޓް ބުނާ ގޮތުގައި މި ޓެކްނޮލޮޖީގެ ސަބަބުން ކުރިން ނުކުރެވޭވަރުގެ އީޖާދީ ކަންތައްތަކެއް ކުރެވޭނެއެވެ. އާންމު އިމާރާތްތަކާ ޚިލާފަށް މި ޓެކްނޮލޮޖީ ބޭނުންކޮށްގެން އުސްމިނުގައި 12 ފޫޓު ހުންނަ އިމާރާތްތައް ކުރެވޭނެއެވެ.
މި މަސައްކަތް ކުރަނީ އައިކޮން (ICON) ނަމަކަށް ކިޔާ 3ޑީ ޕްރިންޓިން ކުންފުންޏަކުންނެވެ. މި މަސައްކަތް ކުރަނީ އެ ކުންފުނީގެ 46.5 ފޫޓު ފުޅާމިނުގައި ހުންނަ "ވަލްކަން" ޕްރިންޓަރު ބޭނުންކޮށްގެންނެވެ. މި ޕްރިންޓަރުގައި ބޭނުންކުރަނީ "ލަވަކްރީޓް" ނަމަކަށް ކިޔާ ޚާއްސަ ސިމެންތި އެކެވެ.
އައިކޮންގެ ސީއީއޯ ޖޭސަން ބަލާޑް ބުނާ ގޮތުގައި މޫސުމަށް އަންނަ ބަދަލުތަކާ ގުޅިގެން މި މަސައްކަތް ރޭވިފައިވާ ގޮތްތަކަށް އެކިކަހަލަ ބަދަލުތައް ގެންނަން ޖެހެއެވެ. މިގޮތުން ވައިގެ ތެތްކަމާއި، ހޫނުމިނާއި، އަވީގެ ގަދަމަޑުމިނަށް ބަދަލު އަންނަ ވަރަކުން މި މަސަކަތުގެ ސްޓްރަކްޗާއަށް ވެސް ބަދަލު ގެންނަން ޖެހެއެވެ.
މި މަޝްރޫއުގެ މަސައްކަތް 2026 ގައި ނިމޭނެ ކަމަށް ބެލެވެއެވެ. އަދި ހޮޓެލް ޔުނިޓްތަކުގެ އަގު ރެއަކަށް 200 ޑޮލަރާއި 450 ޑޮލަރާ ދެމެދު ހުންނާނެ ކަމަށް ބެލެވެއެވެ.
އޮސްޓްރޭލިއާގެ ޗާލްސް ޑާވިން ޔުނިވާސިޓީގެ ލެކްޗަރާ މިލާދް ބަޒްލީ ބުނާ ގޮތުގައި މި ޓެކްނޮލޮޖީގެ ސަބަބުން ދުރު ރާސްތާގައި ބައެއް ފަންނީ މަސައްކަތްތެރިންގެ ވަޒީފާތަކަށް ނޭދެވޭ އަސަރުކުރުން އެކަށީގެންވެއެވެ.