އެމެރިކާގެ ޑޭޓާ ސެންޓަރުތަކުގެ ކަރަންޓު ބޭނުންވާ މިންވަރު ކުރިއަށް އޮތް ތިން އަހަރުތެރޭ ތިން ގުނަ އިތުރުވެދާނެކަމަށް ރިޕޯޓެއްގައި ބުނެފިއެވެ.
ރޮއިޓާސްއިން ހާމަކޮށްފައިވާ، އަދި ޝާއިޢުނުކުރާ އެމެރިކާގެ އެނާޖީ ޑިޕާޓްމަންޓުން ތައްޔާރުކޮށްފައިވާ ރިޕޯޓެއްގައި ބުނެފައިވާ ގޮތުގައި، އާޓިފިޝަލް އިންޓެލިޖެންސް (އޭއައި) ގެ ސަބަބުން އެމެރިކާގެ ޑޭޓާ ސެންޓަރުތަކުގެ ކަރަންޓު ބޭނުންވާ މިންވަރު އަންނަ ތިން އަހަރުތެރޭ ތިން ގުނަ އިތުރުވެ، އެ ޤައުމުގެ ޖުމުލަ ކަރަންޓު ބޭނުންވާ މިންވަރު 12 އިންސައްތައަށް އަރައިދާނެއެވެ.
ލޯރެންސް ބާކްލީ ނެޝަނަލް ލެބޯޓަރީން ތައްޔާރުކޮށްފައިވާ މި ރިޕޯޓު ވަރަށް އަވަހަށް ޝާއިޢުކުރުމަށް ވަނީ ހަމަޖެހިފައެވެ. މި ރިޕޯޓު ޝާޢިއުކުރަން ހަމަޖެހިފައި ވަނީ އެމެރިކާގެ ކަރަންޓު އިންޑަސްޓްރީއާއި ސަރުކާރުގެ އިދާރާތަކުން ޓެކްނޮލޮޖީ ދާއިރާގެ ބޮޑެތި ކުންފުނިތަކުގެ ޑޭޓާ ސެންޓަރުތަކުގެ ކަރަންޓު ބޭނުންކުރާ މިންވަރު ކުއްލިއަކަށް އިތުރުވުމުން ކަރަންޓު ވިއުގައަށާއި، ކަރަންޓު ބިލުތަކަށާއި، މޫސުމަށް ކުރާނެ އަސަރު ދެނެގަތުމަށް މަސައްކަތްކުރަމުންދާ ދަނޑިވަޅެއްގައެވެ.
ބާކްލީ ލެބުގެ ރިޕޯޓުގައި ބުނެފައިވާ ގޮތުގައި 2028ވަނަ އަހަރާ ހަމައަށް ޑޭޓާ ސެންޓަރުތަކުގެ އަހަރީ ކަރަންޓު ބޭނުންކުރާ މިންވަރު 74އާއި 132 ގިގަވޮޓުގެ ދެމެދުގެ އަދަދަކަށް އަރައިދާނެއެވެ. މިއީ އެމެރިކާގެ ޖުމުލަ ކަރަންޓު ބޭނުންކުރާ މިންވަރުގެ 6.7 އިންސައްތައާއި 12 އިންސައްތައާ ދެމެދުގެ އަދަދެކެވެ. މިހާރު ޑޭޓާ ސެންޓަރުތަކުން ބޭނުންކުރަނީ އެ ޤައުމުގެ ޖުމުލަ ކަރަންޓުގެ ހަތަރު އިންސައްތައެވެ.
އެނާޖީ ޑިޕާޓްމަންޓުގެ އިންޑަސްޓްރިއަލް އެފިޝެންސީ އެންޑް ޑީކާބަނައިޒޭޝަން އޮފީހުގެ ޑިރެކްޓަރު އަވީ ޝުލްޓްޒް ވިދާޅުވީ މި ރިޕޯޓުން އެމެރިކާގައި ކަރަންޓު ބޭނުންކުރާ މިންވަރު އިތުރުވަމުންދާ މިސްރާބު ދައްކުވައިދޭ ކަމަށެވެ.
2010 ގެ އަހަރުތަކުގެ ކުރީކޮޅާއި މެދުތެރޭގައި ޑޭޓާ ސެންޓަރުތަކުގެ ކަރަންޓު ބޭނުންކުރާ މިންވަރު ހުރީ އެއް މިންވަރެއްގައެވެ. ނަމަވެސް އޭގެ ފަހުން އައި ޓެކްނޮލޮޖީގެ ކުރިއެރުންތަކާއި، ކުދި ޑޭޓާ ސެންޓަރުތަކުގެ ބަދަލުގައި ބޮޑެތި ކްލައުޑް-ބޭސްޑް ސެންޓަރުތަކަށް ބަދަލުވުމުގެ ސަބަބުން ކަރަންޓު ބޭނުންކުރާ މިންވަރު ވަނީ މަދުވެފައެވެ.
ރިޕޯޓުގައި ބުނެފައިވާ ގޮތުގައި 2017ވަނަ އަހަރުން ފެށިގެން ޖީޕީޔޫ އެކްސެލެރޭޓެޑް ސާވަރުތައް ބޭނުންކުރަން ފެށުމާއެކު، ހަ އަހަރުގެ ތެރޭގައި މި ދާއިރާގެ ކަރަންޓު ބޭނުންކުރާ މިންވަރު ދެ ގުނައަށްވުރެ އިތުރުވެފައިވެއެވެ.
އާޓިފިޝަލް އިންޓެލިޖެންސް (އޭއައި)އަށް ބޭނުންވާ ވަރުގަދަ ޗިޕްތަކާއި ފިނިކުރުމުގެ ނިޒާމުތަކަކީ ޑޭޓާ ސެންޓަރުތަކުގެ ކަރަންޓު ބޭނުންކުރާ މިންވަރު އިތުރުވާނެކަމަށް ލަފާކުރެވޭ މައިގަނޑު ސަބަބެވެ.
2016ވަނަ އަހަރު ނެރުނު ރިޕޯޓުގައި ބުނެފައިވާ ގޮތުގައި އޭރު ޑޭޓާ ސެންޓަރުތަކުގެ އޭއައި ސާވަރުތަކުން ބޭނުންކުރަނީ ޖުމުލަ ސާވަރުތަކުގެ ކަރަންޓު ބޭނުމުގެ ދެ އިންސައްތައެވެ.
މި ރިޕޯޓުގެ މައިގަނޑު ދިރާސާކުރާ ފަރާތްކަމުގައިވާ ބާކްލީ ލެބުގެ ސްޓާފް ސައިންޓިސްޓު އާމަން ޝެހާބީ ވިދާޅުވީ 2016ވަނަ އަހަރާ އަޅާބަލާއިރު މިހާރު މި ދާއިރާއަށް ވަރަށް ބޮޑު ބަދަލެއް އައިސްފައިވާ ކަމަށެވެ.
ޝެހާބީއާއި އޭނާގެ ޓީމުން ހުށަހަޅާފައި ވަނީ ޑޭޓާ ސެންޓަރުތަކުގެ ޓްރެންޑުތައް ގާތުން ބެލުމަށްޓަކައި މި ރިޕޯޓު އަހަރަކު އެއްފަހަރު ނުވަތަ ދެ އަހަރަކުން އެއްފަހަރު ޝާއިޢުކުރުމަށެވެ.
ރިޕޯޓުގައިވާ އަންދާޒާތައް ބިނާކޮށްފައިވަނީ ޖީޕީޔޫތަކާއި އެހެނިހެން ޑޭޓާ ސެންޓަރު އައިޓީ އާލާތްތަކުން ބޭނުންކުރާ ކަރަންޓުގެ މިންވަރު ހިސާބުކޮށްގެންނެވެ. މި ހިސާބުތައް ހެދުމުގައި ބޭނުންކޮށްފައި ވަނީ އާންމުކޮށް ލިބެންހުރި މަޢުލޫމާތާއި، މާކެޓް ރިސާޗް ކުންފުނިތަކުގެ މަޢުލޫމާތާއި، ކަރަންޓު ދާއިރާއާއި ޑޭޓާ ސެންޓަރުތަކުގެ އިސްވެރިންގެ ރިވިއުތަކެވެ.
ދިރާސާކުރި ފަރާތްތަކުން ހުށަހަޅާފައި ވަނީ މި ދާއިރާއާ ގުޅޭ މަޢުލޫމާތު ހާމަކުރުން އިތުރުކުރުމަށެވެ. މީގެ ތެރޭގައި ކަރަންޓު ބޭނުންކުރާ މިންވަރާއި، ކޮމްޕިއުޓް ކުރުމުގެ ޤާބިލުކަމާއި، މަސައްކަތުގެ ބާވަތްތަކުގެ މަޢުލޫމާތު ނަން ހާމަނުކޮށް އެއްކުރުން ހިމެނެއެވެ. މިހާރު މި މަޢުލޫމާތުތަކަކީ ސިއްރު މަޢުލޫމާތުގެ ގޮތުގައި ބެލެވެއެވެ.
ޝެހާބީ ވިދާޅުވީ ކަރަންޓު ބޭނުންކުރާ މިންވަރާއި، މީގެ އިތުރުން ކަރަންޓު ބޭނުންކުރާ ވަރު އިތުރުވާ ސަބަބުތައް ދެއްކުމުން، ކަރަންޓު ބޭނުންކުރުން ހަރުދަނާކުރުމަށް ހުރި ފުރުސަތުތަކާމެދު ވިސްނުމަށް މަގުފަހިވާނެ ކަމަށެވެ.