އިޒްރޭލުން ކޮންމެ ދުވަހަކު ފަލަސްތީނުގެ ސްކޫލުތަކާއި ގެތަކަށް ހަމަލާދީ ކުޑަކުދިންނާއި އަންހެނުން މަރައިގެން ހިންގަނީ ޓެރަރިޒަމް ކަމަށާއި އެ ކަންކަމަށް އިޒްރޭލު ބައިނަލްއަގުވާމީ މައިދާނުގައި ޖަވާބުދާރީ ކުރުވަންޖެހޭ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
އެ މަނިކުފާނު މިރޭ ވަނީ އދ.ގެ އާންމު މަޖިލީހުގައި ތަގުރީރުކުރައްވާފައެވެ. މިއީ، އެ މަނިކުފާނު އދ.ގެ އާންމު މަޖިލީހުގައި ތަގުރީރުކުރައްވާ ފުރަތަމަ ފަހަރެވެ.
އދ. ގެ 79 ވަނަ އާންމު މަޖިލީހުގައި ތަގުރީރުކުރައްވަމުން ރައީސް މުއިއްޒު ވިދާޅުވީ، އިންސާނިއްޔަތު އޮތީ ވަރަށް ދެރަ ހާލުގައި ބޮޑު ކާރިސާއެއްގެ ތެރޭގައި ކަމަށެވެ. ބަނޑުހައިހޫނުކަމާއި ހަނގުރާމަތަކާއި ދިރިއުޅުމުގެ ޚަރަދު އިންތިހާއަށް ބޮޑުވުން ފަދަ އެތައް ކަމެއްގެ ސަބަބުން މީހުން ވަރަށް ދެރަ، ދަތި ހާލުގައި އުޅެމުން އަންނަކަން އެ މަނިކުފާނު ފާހަގަކުރެއްވިއެވެ.
"ހައްގުތައް ހިމާޔަތްކުރެވޭނީ އިޚުތިރާމުކުރާ ސަގާފަތެއް އުފައްދައިގެން،" ދުނިޔެއަށް އެ މަނިކުފާނު ގޮވައިލެއްވިއެވެ.
އދ.ގެ އާންމު މަޖިލީހުގައި ރައީސް: އެ މަނިކުފާނު ވަނީ ފަލަސްތީނުގެ ހައްގުގައި ވަކާލާތުކުރައްވާފައި -- ފޮޓޯ/ ރައީސް އޮފީސް
ރައީސް މުއިއްޒު ވިދާޅުވީ، އިޒްރޭލުން ފަލަސްތީނުގެ ކުށެއް ނެތް އަންހެނުންނާއި ކުޑަކުދިން މަރަމުން އެ ހިންގަނީ ޓެރަރިޒަމް ކަމަށެވެ. އެ ކަންކަމަށް ބައިނަލްއަގުވާމީ މައިދާނުގައި އިޒްރޭލު ޖަވާބުދާރީ ކުރުވަންޖެހޭ ކަމަށް ރައީސް ވިދާޅުވިއެވެ.
"ތަކުރާރުކޮށް ގެތަކާއި ހޮސްޕިޓަލްތަކާއި ސްކޫލުތަކާއި އިންސާނީ ޚިދުމަތްދޭ ތަންތަން ސުންނާފަތިކުރަނީ. ތަކުރާރުކޮށް، ފިރިހެނުންނާއި އަންހެނުންނާއި ކުޑަކުދިންނާއި ތުއްތު ކުދިން މަރަނީ،" އެ މަނިކުފާނު ހަރުއަޑުން ވިދާޅުވިއެވެ.
ރައީސް ވިދާޅުވީ، އިޒްރޭލުން ފަލަސްތީނުގައި އެތައް ހާސް މީހުންނެއް މަރަމުން އަންނައިރު ދުނިޔެއަށް އެކަން އިހުސާސް ނުކުރެވިގެން އުޅެނިކޮށް ލުބުނާންގައި އަނެއްކާ އިޒްރޭލުން ސަތޭކަ އެތައް މީހުންނެއް މަރައިލާފައިވާ ކަމަށެވެ.
"އެ މީހުންގެ ރުއިމުން އިންސާނިއްޔަތުކަން ހުރި ކޮންމެ މީހަކަށް ވެސް އަސަރުކުރާނެ. އެ މީހުންގެ ކަރުނަތައް ޟަމީރަށް ހިތި،" އެ މަނިކުފާނު ފަލަސްތީނުގެ ހައްގުގައި ވަކާލާތުކުރައްވަމުން ވިދާޅުވިއެވެ.
މީގެ އިތުރުން، ހަނގުރާމަ ކަވަރުކުރަން އުޅޭ ނޫސްވެރިންނާ އަމާޒުކޮށްގެން އިޒްރޭލުން ހަމަލާތައްދޭކަން ފާހަގަކުރައްވައި ރައީސް ވިދާޅުވީ، އެ ގޮތަށް އެކަންކުރަނީ ދުނިޔެއަށް ހަގީގަތް ފޮރުވަން ކަމަށެވެ.
"މި ޓެރަރިޒަމްގެ އަމަލުތަކަށް އިޒްރޭލު ޖަވާބުދާރީ ކުރުވަންޖެހޭ،" އެ މަނިކުފާނު ޖޯޝާ އެކު ވިދާޅުވިއެވެ.
ރައީސް މުއިއްޒު އދ.ގައި ތަަގުރީރު ކުރައްވަނީ: އެ މަނިކުފާނު ވަނީ އިޒްރޭލު ޖަވާބުދާރީ ކުރުވަން ގޮވާލައްވާފައި -- ފޮޓޯ/ ރައީސް އޮފީސް
އެ މަނިކުފާނު ވަނީ 1967 ގައި ކުރެހި ބޯޑަރުގެ ތެރެއިން ފަލަސްތީނުގެ މިނިވަންކަން ބަލައިގަންނަންޖެހޭ ކަމަށެވެ. ފުރަތަމަ ފަހަރަށް ފަލަސްތީނުން އދ.ގެ އާންމު މަޖިލީހަށް އާދެވުނުކަން ފާހަގަކުރައްވައި ރައީސް ވަނީ އެ ގައުމަށް އދ.ގެ ފުރިހަމަ މެންބަރުކަން ދޭން ގޮވާލައްވައިފައެވެ.
މިދިޔަ އޮކްޓޫބަރު މަހުގެ ހަތްވަނަ ދުވަހު ފަލަސްތީނުގެ މިނިވަންކަމަށް ހަނގުރާމަކުރާ ހަމާސް ޖަމާއަތުން އިޒްރޭލަށް ދިން ކުއްލި ހަމަލާއަށް ފަހު އިޒްރޭލުން ހިންގަމުންދާ ގަތުލުއާންމުގައި ފަލަސްތީނުގެ 41،000 އަށްވުރެ ގިނަ މީހުން ވަނީ ޝަހީދުކޮށްލާފައެވެ.
ފަލަސްތީނުގެ ހައްގުގައި ރައީސް މުއިއްޒު ވަނީ މުހިންމު ފިޔަވަޅުތަކެއް އަޅުއްވައިފައެވެ. އެގޮތުން، ފަލަސްތީނަށް ދެމުން އައި އެހީ 5،000 ޑޮލަރުން 50،000 ޑޮލަރަށް ބޮޑު ކުރައްވަން ވެސް ނިންމެވިއެވެ. އަދި، އިޒްރޭލު މީހުންނަށް ރާއްޖެ ނާދެވޭ ގޮތަށް އިޒްރޭލު ޕާސްޕޯޓު މަނާކުރަން ވެސް އެ މަނިކުފާނު އިއުލާނުކުރެއްވިއެވެ. އެކަމަކު، އެ މަސައްކަތް މަޖިލީހުގައި މަޑުޖެހިފައި އޮންނަތާ ދުވަސްކޮޅެއް ވެއްޖެއެވެ.
އެކަމަކު، ސަރުކާރުން ވަނީ އިޒްރޭލު ޕާސްޕޯޓު މަނާކުރުމުގެ މަސައްކަތް ނުހުއްޓި ކުރިއަށްދާނެ ކަމަށް ވިދާޅުވެފައެވެ.