މިހާތަނަށް ބިދޭސީންނަށް ދޫކުރި ހުއްދަތަކުގެ ފީތަކާއި ޖޫރިމަނާގެ ގޮތުގައި ދައްކަންޖެހޭ ނަމަވެސް ނުދައްކާ ހުރި ފައިސާގެ އަދަދު، 253 މިލިއަނަށްވުރެ ގިނަ ރުފިޔާއަށް އަރާ ކަމަށް ހޯމްލޭންޑް މިނިސްޓްރީން މިއަދު އާއްމުކުރި ތަފާސްހިސާބުތަކުން ދައްކައިފިއެވެ.
ހޯމް މިނިސްޓްީގެ ތަފާސްހިސާބުތަކުން ދައްކާ ގޮތުގައި އެކްސްޕެޓް ސިސްޓަމުން ސަސްޕެންޑު ކުރި ފަރާތްތަކުގެ އަދަދު 7،501 އަރައެވެ. އަދި، އެއް އަހަރު ދުވަހަށް ބަހާލައިގެން ފައިސާ ދައްކަން އެދުނު ފަރާތްތަކުގެ އަދަދު 3،692 އަރައެވެ.
ހަމައެއާ އެކު ބިދޭސީންނަށް ދޫކުރި ހުއްދަތަކުގެ ފީތަކާއި ޖޫރިމަނާގެ ގޮތުގައި ދައްކަންޖެހޭ ނަމަވެސް ނުދައްކާ ހުރި ފައިސާގެ އަދަދު 253،545،982 (ދުއިސައްތަ ފަންސާސް ތިން މިލިއަން، ފަސް ލައްކަ ސާޅީސް ފަސްހާސް، ނުވަސަތޭކަ އަށްޑިހަ ދެ) ރުފިޔާއަށް އަރާ ކަމަށް އެ މިނިސްޓްރީން ބުންޏެވެ. އެއީ:
- ވޯކް ޕާމިޓް ފީ: 187،506،900 ރުފިޔާ
- ކޯޓާ ފީ: 63،287،082 ރުފިޔާ
- ކެންސަލޭޝަން ފީ: 2،752،000 ރުފިޔާ
ހޯމް މިނިސްޓްރީން އަންނަނީ، ބިދޭސީ މަސައްކަތްތެރިންނަށް ދޫކޮށްފައިވާ ހުއްދަތަކާ ގުޅިގެން، ވަޒީފާދޭ ފަރާތްތަކުން ދައުލަތަށް ދައްކަން ޖެހޭ ފައިސާ ހޯދުމަށް މަސައްކަތްތަކެއް ކުރަމުންނެވެ. ނަމަވެސް، ރާއްޖެއަށް ބިދޭސީން ގެންނަ މީހުންގެ އަތުން ނަގާ އެއްވެސް ފީއެއް ބޮޑުކުރުމުގެ ވިސްނުމެއް ނެތް ކަމަށް ހޯމް މިނިސްޓަރު އަލީ އިހުސާން މީގެ ކުރިން ވިދާޅުވިއެވެ.
އެގޮތަށް ނިންމީ ބިދޭސީންނަށް ވަޒީފާ ދޭ ފަރާތްތަކުގެ އަތުން ފައިސާ ހޯދުމުގެ ފިޔަވަޅުތައް މީގެ ކުރިން ތަންފީޒުނުކޮށް އޮތުމަށް ފަހު މިހާރު ގިނަ އަދަދަކަށް ފައިސާ ދައްކަން އެންގުމުން، ވަޒީފާ ދޭ ފަރާތްތަކަށް ދަތިވާނެކަން ގަބޫލުކުރައްވާތީ ކަމަށް ވިދާޅުވިއެވެ.
އެހެންވެ، އެ ފައިސާ އަހަރެއްހާ ދުވަހަށް ބަހާލައިގެން ދެއްކުމުގެ ފުރުސަތު ދޭނެ ކަމަށް ވެސް އިހުސާން ވިދާޅުވިއެވެ.
ނުގަވައިދުން އުޅޭ ބިދޭސީން އަތުލައިގަތުމަށް އިމިގްރޭޝަނުން ބޯޓެއް ކައިރީ ހަރަކާތްތެރިވަނީ -- ފޮޓޯ/ އިމިގްރޭޝަން
މިހާރު ވަޒީފާއާ ބެހޭ ގާނޫނުގައި ބަޔާންކޮށްފައި އޮންނަ ގޮތުން ބިދޭސީ މަސައްކަތްތެރިން ވޯކް ޕާމިޓުގެ ގޮތުގައި 350 ރުފިޔާ ދައްކަންޖެހެއެވެ. އަދި، ކޯޓާ ފީގެ ގޮތުގައި އަހަރަކު 2،000 ރުފިޔާ ދައްކަންޖެހެއެވެ.
ހަމައެއާ އެކު ނުގަވައިދުން ރާއްޖޭގައި އުޅޭ ބިދޭސީން އަތުލައިގަނެ، އެ ބިދޭސީން ޑީޕޯޓުކޮށްލުމުގެ އޮޕަރޭޝަންތައް ހޯމް މިނިސްޓްރީއާއި، އިމިގްރޭޝަން އަދި ފުލުހުންގެ އިދާރާއާ ގުޅިގެން ފުޅާ ދާއިރާއެއްގައި އަންނަނީ ހިންގަމުންނެވެ.
އެގޮތުން، މިދިޔަ އަހަރުގެ ނޮވެމްބަރު 17އިން ފެށިގެން މި މަހުގެ 17 ވަނަ ދުވަހާ ހަމައަށް ގަވާއިދާ ޚިލާފުވެގެން ފޮނުވާލި ބިދޭސީންގެ އަދަދު 4،054 އަށް އަރައެވެ. އެއީ:
- ނޮވެމްބަރު 2023: 90 ބިދޭސީން
- ޑިސެމްބަރު 2023: 202 ބިދޭސީން
- ޖެނުއަރީ: 237 ބިދޭސީން
- ފެބްރުއަރީ: 309 ބިދޭސީން
- މާޗު: 332 ބިދޭސީން
- އެޕްރިލް: 240 ބިދޭސީން
- މެއި: 337 ބިދޭސީން
- ޖޫން: 690 ބިދޭސީން
- ޖުލައި: 461 ބިދޭސީން
- އޮގަސްޓް: 453 ބިދޭސީން
- ސެޕްޓެމްބަރު: 663 ބިދޭސީން
ރާއްޖޭގައި ގަވައިދާ ޚިލާފަށް އުޅޭ ބިދޭސީންގެ މައްސަލަ ތިން އަހަރު ތެރޭ ހައްލު ކުރުމަށް މި ސަރުކާރުން ވަނީ އަމާޒު ހިފައިފައެވެ. އެ މަސައްކަތުގެ ތެރެއިން، ރާއްޖޭގައި އުޅޭ ހުރިހާ ބިދޭސީންގެ މައުލޫމާތު އެއްކޮށް، ގަވާއިދާ ޚިލާފަށް އުޅޭ މީހުން ގަވައިދަށް ފެއްތުމުގެ މަސައްކަތްތައް ވެސް އަންނަނީ ކުރަމުންނެވެ.