ހުޅުމާލޭގައި ކާރަކާއި ސައިކަލެއް ޖެހި ހިނގި އެކްސިޑެންޓެއްގައި ސައިކަލުގައި އިން މީހަކު ނިޔާވުމާ ގުޅިގެން، ކާރު ދުއްވަން އިން މީހާއަށް ދައުވާކޮށްފިއެވެ.
ޕްރޮސެކިއުޓާ ޖެނެރަލް (ޕީޖީ) އޮފީހުން "ސަން"އަށް ބުނީ، އެ މައްސަލައަކީ މިދިޔަ އޭޕްރިލް މަހުގެ 14 ވަނަ ދުވަހުގެ ރޭ 23:18ހާއިރު ހުޅުމާލޭ އުރީދޫ ބިލްޑިންގް ކައިރީ ހިނގި އެކްސިޑެންޓެއްގެ މައްސަލަ ކަމަށެވެ. އެ ހާދިސާ ހިނގި ވަގުތު ކާރު ދުއްވަން އިނީ ކ. ކާށިދޫ، ކެތި، މައުސޫމް ހަލީމެވެ.
ސައިކަލުގައި ތިބީ ބަންގްލަދޭޝްއަށް ނިސްބަތްވާ ޝެއިހް ޝުވައިބް އާއި މަސްއޫދު ރަނާ އެވެ.
ޕީޖީން ބުނެފައިވާ ގޮތުގައި، އެ ހާދިސާ ހިނގީ އުރީދޫ ބިލްޑިންގުން ހުޅަނގަށް އޮންނަ މަގުން ކާރު ދުއްވާފައި ދިޔައިރު ކަނާއަތަށް ސިގްނަލް ނުދީ ގޯޅިއެޅި ވަގުތު، ކާރު އޯވަޓޭކް ކުރަން އުޅުނު ސައިކަލުގައި ޖެހުމުންނެވެ. އެ އެކްސިޑެންޓުގައި ޝުވައިބް އާއި ރަނާ ކާރު ދަށުގައި ތާށިވެފައި އޮއްވައި، މައުސޫމް ބާރު ސްޕީޑުގައި ކާރު ފަހަތަށް ޖެހުމުން ދެ މީހުންނަށް ވެސް ބޮޑެތި އަނިޔާތަކެއް ލިބުނު ކަމަށް އެ އޮފީހުން ބުންޏެވެ.
އޭގެ ތެރެއިން ރަނާއަށް ލިބުނު އަނިޔާތަކުގެ ސަބަބުން އޭނާ ނިޔާވެފައިވާކަން ޕީޖީން ފާހަގަކޮށްފައިވެއެވެ. އެ މައްސަލައާ ގުޅިގެން މައުސޫމްގެ މައްޗަށް ވަނީ ތިން ދައުވާއެއް ކޮށްފައެވެ. އެއީ:
1. މީހަކު މަރުވެދިއުމުގެ ފަރުވާ ކުޑަ އަމަލެއް ކުރުން:
އެ ދައުވާ ކުރީ، ކާރު ދަށުގައި ރަނާ ތާށިވެފައިވަނިކޮށް، މައުސޫމް އޭނާގެ ހަށިގަނޑު މަތިން ބާރު ސްޕީޑްގައި ކާރު ފަހަތަށް ޖެހުމުގެ ސަބަބުން އޭނާއަށް ލިބުނު އަނިޔާތަކުގެ ސަބަބުން ރަނާ ނިޔާވެފައިވާތީ.
2. އަނިޔާއެއް ދިނުން:
އެ ދައުވާ ކުރީ ޝުވައިބް ކާރު ދަށުގައި ތާށިވެފައިވަނިކޮށް، އޭނާގެ ހަށިގަނޑު މަތިން ބާރު ސްޕީޑްގައި ކާރު ފަހަތަށް ޖެހުމުގެ ސަބަބުން އޭނާއަށް ބޮޑެތި އަނިޔާތަކެއްވެފައިވާތީ.
3. މުދަލަށް ގެއްލުން ދިނުން:
އެ އެކްސިޑެންޓުގައި ކާރު ކޮންޓްރޯލް ނުކުރެވުމުގެ ސަބަބުން އެސަރަހައްދުގައި ޕާކުކޮށްފައި އޮތް އެެހެން ކާރެއްގައި ޖެހުމުގެ ސަބަބުން އެކާރަށް ގެއްލުންވެފައިވާތީ.
ހުޅުމާލެ ސެންޓްރަލް ޕާކު ކައިރިން މީގެ ކުރިން ވެސް ނުރައްކާތެރި އެކްސިޑެންޓުތަކެއް ހިނގައިފައި އެބަހުއްޓެވެ. އެގޮތުން މި މަހުގެ ހަ ވަނަ ދުވަހުގެ ދަންވަރު އުރީދޫ ބިލްޑިންގު ކައިރިން ބާރު ސްޕީޑުގައި ދުއްވާފައި ދިޔަ ކާރެއް ސައިކަލެއްގައި ޖެހި، ސައިކަލު ދުއްވަން އިން 23 އަހަރުގެ ޒުވާނާ ނިޔާވެފައިވެއެވެ.
އެ މައްސަލައިގައި ހައްޔަރުކުރި 26 އަހަރުގެ މީހާ ވަނީ ޝަރީއަތް ނިމެންދެން ބަންދުކޮށްފައެވެ.
މާލެ ސަރަހައްދުގައި އެކްސިޑެންޓުތައް ގިނަވުމާ ގުޅިގެން ފުލުހުން މަގުތަކުގައި ހަރަކާތްތެރިވާ މިންވަރު އިތުރުކޮށް، ޓްރެފިކް ކޮންޓްރޯލް ކުރުމަށް ޚާއްސަ ފިޔަވަޅުތަކެއް އަންނަނީ އަޅަމުންނެވެ.