ދިވެހިރާއްޖެއާއި ސްރީ ލަންކާއާ ދެމެދު އޮތް ތާރީޚީ ގާތް ގުޅުން ދަމަހައްޓަން އެކުގައި މަސައްކަތް ކުރައްވާނެ ކަމަށް އެ ގައުމުގެ އައު ރައީސް އަނޫރާ ކުމާރާ ޑިސަނަޔަކަ މިއަދު ވިދާޅުވެއްޖެއެވެ.
ޑިސަނަޔަކަ އެފަދައިން ވިދާޅުވީ، ހޮނިހިރު ދުވަހު ބޭއްވި ސްރީ ލަންކާގެ ރިޔާސީ އިންތިޚާބު އޭނާ ކާމިޔާބުކުރެއްވުމުން މަރުހަބާ ދަންނަވާ ރައީސް ޑރ. މުހައްމަދު މުއިއްޒު އެކްސްގައި ކުރެއްވި ޕޯސްޓަށް ޖަވާބުދެއްވައެވެ.
ރައީސް އެކްސްގައި ކުރެއްވި ޕޯސްޓެއްގައި ވަނީ، ގާތް އަވައްޓެރި ގައުމެއްގެ ހައިސިއްޔަތުން ލަންކާއާއެކު މަސައްކަތްކޮށް، ދެ ގައުމުގެ ދެމެދުގައި އޮތް ޒަމާންވީ ގުޅުންތައް އިތުރަށް ވަރުގަދަ ކުރަން ބޭނުންފުޅުވާ ކަމަށް ވިދާޅުވެފައެވެ.
އެ ޕޯސްޓު ޝެއާކުރައްވާ ޑިސަނަޔަކަ ވަނީ ކިޔުއްވި މަރުހަބާއަށް ޝުކުރު ދަންނަވާފައެވެ. އަދި ދެ ގައުމުގެ ދެމެދުގައި އޮތް ތާރީޚީ ގުޅުން އިތުރަށް ބަދަހިކޮށް، އެކުގައި މަސައްކަތްކުރައްވާނެ ކަމަށް ވިދާޅުވިއެވެ.
ސްރީ ލަންކާގެ އިގްތިސާދު މީގެ ދެ އަހަރު ކުރިން ބަނގުރޫޓުވެ އާންމު ދިރިއުޅުން ދަތިވެފައިވަނިކޮށް ބޭއްވި ފުރަތަމަ ރިޔާސީ އިންތިޚާބު ކާމިޔާބު ކުރެއްވީ ނެޝަނަލް ޕީޕަލްސް ޕާޓީ (އެންޕީޕީ) އެލަޔަންސްގެ ކެންޑިޑޭޓް ޑިސަނަޔަކައެވެ.
އުމުރުން 55 އަހަރުގެ ޑިސަނަޔަކަ ވަނީ އޭނާއާ އެންމެ ގާތުން ވާދަކުރި އިދިކޮޅު ލީޑަރު ސަޖިތު ޕްރެމަދާސާއަށްވުރެ މިލިއަނަކަށްވުރެ ގިނަ ވޯޓު ހޯއްދަވާފައެވެ.
ރައީސް ކަމަށް އިންތިޚާބުވެވަޑައިގަތުމުން ގާނޫނު ހަދާ މަޖިލީހުގައި ޑިސަނަޔަކަ ފުރުއްވި ގޮނޑި ދެން ފުރުއްވާނީ އެންޕީޕީގެ މެންބަރު ލަކްޝްމަން ނިޕުނާރްޗީއެވެ.
ރިޔާސީ ސެކްރެޓޭރިއަޓުގައި މިއަދު ބޭއްވި ރަސްމިއްޔާތެއްގައި ޑިސަނަޔަކަ ވަނީ ލަންކާގެ ނުވަ ވަނަ ރައީސް ކަމުގެ ހުވާ ކުރައްވާފައެވެ.