ސްރީ ލަންކާގައި އިއްޔެ ބޭއްވި ރިޔާސީ އިންތިޚާބު ކާމިޔާބުކުރެއްވި އަނޫރާ ކުމާރާ ޑިސަނަޔަކައަށް، ރައީސް ޑރ. މުޙައްމަދު މުއިއްޒު މަރުހަބާ ވިދާޅުވެއްޖެއެވެ.
ރައީސް އެކްސްގައި ކުރެއްވި ޕޯސްޓެއްގައި ވަނީ، ގާތް އަވައްޓެރި ގައުމެއްގެ ހައިސިއްޔަތުން ލަންކާއާއެކު މަސައްކަތްކޮށް، ދެ ގައުމުގެ ދެމެދުގައި އޮތް ޒަމާންވީ ގުޅުންތައް އިތުރަށް ވަރުގަދަ ކުރަން ބޭނުންފުޅުވާ ކަމަށް ވިދާޅުވެފައެވެ.
ރައީސްވަނީ މިފެށޭ ރިޔާސީ ދައުރަކީ ލަންކާގެ ރައްޔިތުން އެދޭފަދަ ކާމިޔާބު ދައުރަކަށް ވާނެކަމަށް އުއްމީދުކުރައްވާކަން ހާމަކުރައްވާ، ކާމިޔާބަށް އެދިވަޑައިގެންފައެވެ.
ލަންކާގެ އިންތިޚާބު ޑިސަނަޔަކަ ކާމިޔާބު ކުރައްވައިފައި ވާކަން އެގައުމުގެ އިލެކްޝަންސް ކޮމިޝަނުން ވަނީ ރަސްމީކޮށް އިއުލާނުކޮށްފައެވެ. ޑިސަނަޔަކެ ވަނީ ލަންކާގެ ގާނޫނު ހަދާ މަޖިލީހުގައި 20 އަހަރު ޚިދުމަތް ކުރައްވައިފައެވެ.
ލަންކާގެ އިންތިޚާބީ ރައީސް ޑިސަނަޔަކަ --
ރިޔާސީ އިންތިޚާބުގައި ޑިސަނަޔަކަ ވާދަކުރެއްވީ ސިޔާސީ ގޮތުން ނުފޫޒުގަދަ، ބާރުގަދަ އާއިލާތަކަށް ނިސްބަތްވެވަޑައިގަންނަވާ ބޭފުޅުންނާއެވެ. އޭނާއާ އެންމެ ގާތުން ވާދަކުރެއްވީ ކުރީގެ ރައީސް ރަނަސިންހަ ޕްރެމަދާސަގެ ދަރިފުޅު ސަޖިތު ޕްރެމަދާސައެވެ.
މިހާތަނަށް އާންމުކޮށްފައިވާ ނަތީޖާއިން ދައްކާ ގޮތުގައި ޑިސަނަޔަކަށް
42.31 ޕަސެންޓް ވޯޓު ލިބިވަޑައިގެންނެވިއިރު ޕްރެމަދާސަ 32.76 ޕަސެންޓު ވޯޓު ހޯއްދެވިއެވެ.
މިހާރުގެ ރައީސް ރަނިލް ވިކްރަމަސިންހައަށް ލިބިވަޑައިގަތީ 17.27 ޕަސެންޓު ވޯޓު ކަމަށްވާއިރު، ރާޖަޕަކްސަ އާއިލާއަށް ނިސްބަތްވެވަޑައިގެންނަވާ ނާމަލް އަށް ތަރުހީބު ވަރަށް ކުޑައެވެ. އެގޮތުން މިހާތަނަށް އޭނާއަށް ލިބިފައިވާ ކަމަށް ދައްކަނީ އެންމެ 2.57 ޕަސެންޓް ވޯޓެވެ.