ސްރީ ލަންކާގެ ފަތުރުވެރިކަމުގެ އަވަށެއް ކަމަށްވާ އަރޫގަމް ބޭގެ އެކި ސަރަހައްދުތަކަށް ޓެރަރިޒަމް ހަމަލާ ތަކެއް ދީފާނެ ކަމުގެ ޖާސޫސީ މައުލޫމާތު ލިބިފައިވާ ކަމަށް ލަންކާގައި ހުންނަ އެމެރިކާގެ އެމްބަސީން ބުނެފިއެވެ.
އެހެންވެ، ރައްކާތެރިކަމުގެ ފިޔަވަޅެއްގެ ގޮތުން ވަކި ގޮތެއް އަންގަންދެން އަރޫގަމް ބޭއަށް ދަތުރުކުން އެމްބަސީން ވަނީ މަނާކޮށްފައެވެ.
އެމެރިކާގެ ރައްޔިތުން ވެސް މިވަގުތު އެ ސަރަހައްދުން ދަތުރުނުކުރަން އެމްބަސީން ވަނީ އިލްތިމާސްކޮށްފައެވެ. ޝައްކު ކުރެވޭ ކަމެއް ނުވަތަ ކުއްލި ހާލަތެއް ދިމާވެއްޖެނަމަ 119އަށް ގުޅައިގެން އެހީ ހޯދުމަށާއި ރިޕޯޓު ކުރުމަށް އެމްބަސީން ބުނެއެވެ.
އެމްބަސީން ނެރުނު އެޑްވައިޒަރީގައި ވަނީ ވަށައިގެންވާ މާހައުލަށް ސަމާލުވުމާއި ހޭލުންތެރިވުމުގެ މުހިންމުކަމަށް އަލިއަޅުވާލައި ރައްކާތެރިކަން ނެތް ކަމަށް އިހުސާސް ކުރެވޭ ކޮންމެ ހާލަތަކުން އަވަހަށް ނުކުތުމަށް ވެސް އިލްތިމާސްކޮށްފައިވެއެވެ.
އަދި ފޯނު ފަދަ މުވާސަލާތީ ވަސީލަތްތައް އަތްފޯރާފަށުގައި ބެހެއްޓުމަށް ވެސް ލަފާދީފައިވެއެވެ.