ސްރީ ލަންކާގެ ރައީސް ކަމަށް ސެޕްޓެމްބަރު މަހު އިންތިޚާބުވި އަނޫރާ ކުމާރަ ޑިސެނަޔަކަގެ ޕާޓީއަށް އެ ގައުމުގެ މަޖިލީހުގެ އިންތިޚާބުން ބޮޑު ކާމިޔާބީއެއް ލިބިއްޖެއެވެ.
އިއްޔެ ބޭއްވި ގާނޫނުހަދާ މަޖިލީހުގެ އިންތިޚާބަށްފަހު، މިއަދު ހެދުނު ވޯޓު ކަރުދާހުގެ ދެބައިކުޅަ އެއްބައި ގުނާފައިވާއިރު، ޑިސެނާޔަކޭގެ ނޭޝަނަލް ޕީޕަލްސް ޕަވާ (އެންޕީޕީ) އިން އިދިކޮޅު އިއްތިހާދު ސަމާގީ ޖަނާ ބަލަވޭގަޔާ (އެސްޖޭބީ) ގެ މައްޗަށް ބޮޑު ކާމިޔާބީއެއް ހޯދާފައިވާ ކަމަށް އެ ގައުމުގެ އިލެކްޝަންސް ކޮމިޝަނުގެ ނަތީޖާތަކުން ދައްކައެވެ.
ދުއިސައްތަ ފަންސަވީސް މެންބަރުންގެ މަޖިލީހުން އެންޕީޕީން 97 ގޮނޑި ނަގާފައިވާއިރު، އެސްބީޖޭއަށް ލިބިފައި ވަނީ 26 ގޮނޑި ގޮނޑިއެވެ. ބާވީސް އިންތިޚާބީ ދާއިރާގެ ތެރެއިން އެއް ދާއިރާ ފިޔަވައި އެހެން ހުރިހާ ދާއިރާއެއްގައި އެންޕީޕީ ކުރީގައި އޮތް ކަމަށް ނަތީޖާތަކުން ދައްކައެވެ.
އިންތިޚާބުގައި ވޯޓުލީ މީހުންގެ އަދަދަކީ ގާތްގަނޑަކަށް 65 އިންސައްތަ ކަމަށް އިލެކްޝަންސް ކޮމިޝަނުން ބުނިއިރު، ސެޕްޓެމްބަރު މަހު ބޭއްވި ރިޔާސީ އިންތިޚާބުގައި ވޯޓުލުމުގެ ހައްގު ލިބިފައިވާ މީހުންގެ 80 އިންސައްތަ މީހުން ވޯޓުލާފައިވެއެވެ.
ޑިސެނަޔަކަ ވެރިކަމަށް އިންތިޚާބުވިއިރު އެ ޕާޓީއިން މަޖިލީހުގައި ތަމްސީލު ކުރަމުން އައީ އެންމެ ތިން ގޮނޑިއެވެ. އެހެންވެ ރައީސްކަމާ ހަވާލުވެވަޑައިގަތުމަށްފަހު ޑިސެނަޔަކަ ވަނީ އެ ގައުމައި އޭރު އޮތް މަޖިލިސް އުވާލައްވައިފައެވެ.
ގާނޫނު ހަދާ މަޖިލީހުގެ އަޣުލަބިއްޔަތު ލިބޭނެ ކަމަށް އުންމީދު ކުރައްވާ ކަމަށް ޑިސަނާޔަކޭ މީގެކުރިން ވަނީ ވިދާޅުވެފައެވެ.
ޑިސެނަޔަކަ ވެރިކަމަށް ވަޑައިގަތީ ލަންކާއަށް އިގްތިސާދީ ކާރިސާއެއް ކުރިމަތިވުމުން އުފެދުނު ހަމަނުޖެހުންތަކުގައި އޭރުގެ ރައީސް ގޯޓާބަޔަ ރާޖަޕަކްސަ މަގާމުން އިސްތިއުފާ ދެއްވިތާ ދެ އަހަރު ފަހުން ބޭއްވި އިންތިޚާބުގައެވެ. އޭނާ ވަނީ ކޮރަޕްޝަނާ ދެކޮޅަށް މަސައްކަތްކޮށް، ވަގަށް ނަގާފައިވާ މުދާ އަނބުރާ ހޯދާނެ ކަމަށް ވައުދުވެ ވަޑައިގެންފައެވެ.