ސްރީލަންކާގެ ރިޔާސީ އިންތިޚާބު ނެޝަނަލް ޕީޕަލްސް ޕާޓީ (އެންޕީޕީ) އެލަޔަންސްގެ ކެންޑިޑޭޓް އަނޫރާ ކުމާރަ ޑިސަނަޔަކަ ކާމިޔާބުކުރައްވައިފިއެވެ.
ލަންކާގައި އިއްޔެ ބޭއްވި ރިޔާސީ އިންތިޚާބުގައި ވޯޓުލުމުގެ ހައްގު ލިބިފައިވާ 17.1 މިލިއަން މީހުންގެ ތެރެއިން 76 ޕަސެންޓު ވޯޓުލާފައިވެއެވެ.
އެ އިންތިޚާބުގައި 38 ކެންޑިޑޭޓުން ވާދަކުރެއްވިއިރު އެއްވެސް ކެންޑިޑޭޓަކަށް 50 ޕަސެންޓް ވޯޓު ލިބިފައިނުވެއެވެ. އެހެންވެ، އިލެކްޝަންސް ކޮމިޝަނުން ވަނީ ދެވަނަ ބުރަށް ވޯޓު ގުނައިފައެވެ. މިއީ ލަންކާގެ ތާރީޚުގައި ވެސް، ދެވަނަ ބުރަށް ވޯޓު ގުނަން ޖެހުނު ފުރަތަމަ ފަހަރެވެ.
ލަންކާގައި ރިޔާސީ އިންތިޚާބުގައި ވޯޓުލާއިރު، ތިން ކެންޑިޑޭޓަކު ޚިޔާރު ކުރެވޭނެއެވެ. އެގޮތުން އެންމެ ކަމުދާ ކެންޑިޑޭޓެއްގެ ނަމުގެ ކައިރީގައި 1، ދެވަނައަށް އެންމެ ކަމުދާ ކެންޑިޑޭޓެއްގެ ނަމުގެ ކައިރީގައި 2 އަދި ތިން ވަނަ ކެންޑިޑޭޓުގެ ނަމުގެ ކައިރީގައި 3 ޖެހޭނެއެވެ.
ދެވަނަ ބުރުގައި ވޯޓު ގުނިއިރު ބަލައިފައިވަނީ، އެންމެ ކަމުދާ ކެންޑިޑޭޓުގެ ގޮތުގައި އެހެން ކެންޑިޑޭޓުން ޚިޔާރުކޮށްފައިވާ ވޯޓު ކަރުދާސްތަކުގައި ދެވަނައަށް ނުވަތަ ތިންވަނައަށް އެންމެ ކަމުދާ ކެންޑިޑޭޓުގެ ގޮތުގައި, ފުރަތަމަ ބުރުން ކުރި ހޯއްދެވި ޑިސަނަޔަކަ ނުވަތަ ދެވަނަ ހޯއްދެވި ސަޖިތު ޕްރަމަދާސަ ޚިޔާރުކޮށްފައިވޭތޯއެވެ. އެގޮތުން ޚިޔާރުކޮށްފައިވާ ނަމަ އެއީ އެ ކެންޑިޑޭޓަކަށް ލިބޭ ވޯޓެއްގެ ގޮތުގައި ގުނައެވެ.
އެގޮތަށް ވޯޓު ގުނުމަށް ފަހު ލަންކާގެ އިލެކްޝަންސް ކޮމިޝަނުން މިހާރު ވަނީ ރިޔާސީ އިންތިޚާބު ކާމިޔާބު ކުރެއްވީ ޑިސަނަޔަކަ ކަން އިއުލާންކޮށްފައެވެ. އަދި މާދަމާ އޭނާ ވެރިކަމުގެ ހުވާކުރައްވާނެ ކަމަށް ބައެއް ރިޕޯޓުތަކުގައިވެއެވެ.
ދެހާސް ނަވާރަ ވަނަ އަހަރުގެ ރިޔާސީ އިންތިޚާބުގައި ވެސް ޑިސަނަޔަކަ ވާދަކުރެއްވި ނަމަވެސް އޭނާއަށް ލިބިވަޑައިގަތީ ތިން ޕަސެންޓް ވޯޓެވެ. އަދި ގާނޫނު ހަދާ މަޖިލީހުން އެ ޕާޓީއަށް ނިސްބަތްވަނީ ތިން ގޮނޑިއެވެ.
ރިޔާސީ އިންތިޚާބުގައި ޑިސަނަޔަކަ ވާދަކުރެއްވީ ސިޔާސީ ގޮތުން ނުފޫޒުގަދަ، ބާރުގަދަ އާއިލާތަކަށް ނިސްބަތްވެވަޑައިގަންނަވާ ބޭފުޅުންނާއެވެ. އެގޮތުން އޭނާއާ އެންމެ ގާތުން ވާދަކުރެއްވި ޕްރެމަދާސައަކީ ކުރީގެ ރައީސް ރަނަސިންހަ ޕްރެމަދާސަގެ ދަރިފުޅެވެ.
މިހާތަނަށް އާންމުކޮށްފައިވާ ނަތީޖާއިން ދައްކާ ގޮތުގައި ޑިސަނަޔަކަށް
42.31 ޕަސެންޓް ލިބިވަޑައިގެންނެވިއިރު ޕްރެމަދާސަ 32.76 ޕަސެންޓު ވޯޓު ހޯއްދެވިއެވެ.
މިހާރު ރައީސް ރަނިލް ވިކްރަމަސިންހައަށް ލިބިވަޑައިގަތީ 17.27 ޕަސެންޓު ވޯޓު ކަމަށްވާއިރު، ރާޖަޕަކްސަ އާއިލާއަށް ނިސްބަތްވެވަޑައިގެންނަވާ ނާމަލް އަށް ތަރުހީބު ވަރަށް ކުޑައެވެ. އެގޮތުން މިހާތަނަށް އޭނާއަށް ލިބިފައިވާ ކަމަށް ދައްކަނީ އެންމެ 2.57 ޕަސެންޓް ވޯޓެވެ.
ލަންކާގެ މި ރިޔާސީ އިންތިޚާބަކީ އެގައުމަށް ކުރިމަތިލާން ޖެހުނު އެންމެ ބޮޑު އިގުތިސާދީ ކާރިސާއަށް ފަހު ބޭއްވި ފުރަތަމަ އިންތިޚާބެވެ. ގައުމު އެހާލަތަށް ދިޔައީ ކުރީގެ އެތައް ސަރުކާރަކުން ގައުމު ހިންގުމުގައި އިހުމާލުވުމުގެ ސަބަބުންނާއި ކޮރަޕްޝަނުގެ ސަބަބުން ރައްޔިތުން ދެކެއެވެ.
އެހެންވެ، ރިޔާސީ އިންތިޚާބުގެ ކެމްޕެއިންގެ ތެރެއިން ކެންޑިޑޭޓުން އެންމެ ބޮޑަށް އިސްކަންދީފައި ވަނީ އިގުތިސާދީ އިސްލާހުތަކާއި ކޮރަޕްޝަން ނައްތާލުމަށް އަޅާނެ ފިޔަވަޅުތަކަށެވެ.