ނުބައި ޒޯނެއްގައި ރަޖިސްޓަރުކޮށްފައި އޮތް ކާރެއް، ލައިސެންސް ވެސް ނެތި ބާރު ސްޕީޑުގައި ދުއްވައި ފިލަން އުޅުނު ކަމަށް ތުހުމަތުކޮށް ހުޅުމާލެއިން ފިރިހެނަކު ހައްޔަރުކޮށްފިއެވެ.
މި މައްސަލާގައި ހައްޔަރުކޮށްފައި ވަނީ ރ. އަލިފުށި، ސިތުރާ އުމުރުން 38 އަހަރުގެ ޙަސަން ސައީދެވެ.
މި މައްސަލާގައި ފުލުހުން ބުނީ، ހުޅުމާލޭގައި ރޭ ދަންވަރު ފުލުހުންގެ ވީސީޕީ ހަރަކާތްތެރިވަމުން ދިޔައިރު ބާރު ސްޕީޑުގައި ދުއްވި ކާރެއް ހުއްޓުވައި ބެލި ކަމަށެވެ. އެ ކާރު ބެލިއިރު އެއި ސީ ޒޯނަށް ރަޖިސްޓްރީކޮށްފައިވާ ކާރެއް ކަން އެނގިފައިވާ ކަމަށް ފުލުހުން މައުލޫމާތު ދީފައިވެއެވެ.
އިތުރަށް ފުލުހުން ބުނީ ލައިސަންސް ނެތި ދުއްވުމާއި ސައްހަ ނޫން ނަންބަރު ޕްލޭޓެއް ކާރުގައި ހަރުކޮށްފައިވާތީ ފުލުހުން ކާރު ޓޯ ކުރަން އުޅުމުން ފުލުހުންނަށް އެއްބާރުލުން ނުދޭނެ ކަމަށާއި ކާރުން ނުފައިބާނެކަމަށް ސައީދު ބުނި ކަމަށެވެ.
ކާރު ނުފައިބާނެ ކަމަށް ބުނެ ފުލުހުންގެ ދައުރު އަދާކުރުމަށް ހުރަސް އަޅައި ފިލަން މަސައްކަތްކުރުމުން ބާރުގެ ބޭނުންކޮށްގެން ސައީދު ހައްޔަރު ކުރި ކަމަށް ފުލުހުން ބުނެފައިވެއެވެ.
މި މައްސަލަ ފުލުހުން އަންނަނީ ތަހުގީގު ކުރަމުންނެވެ.
މާލޭ ސަރަހައްދަށް ރަޖިސްޓަރުނުކުރާ ކާރާއި ޕިކަޕު މާލޭގެ މަގުތަކުގައި ދުއްވާ މައްސަލަ ވަނީ ވަރަށް ބޮޑުވެފައެވެ. މި ފަހުން އެއް ނަންބަރެއްގެ އެއްގޮތް ރަޖިސްޓްރޭޝަން ޕްލޭޓުތަކެއް އެކި ކާރުތަކުން ފެންނަން ފެށި މައްސަލަތަކެއް ވެސް ވަނީ ފެންމަތިވެފައެވެ.