މާލޭގެ ހެންވޭރުގައި ހުރި ގެސްޓް ހައުސްއެއްގެ ތެރޭގައި ދިވެހި ފިރިހެން މީހަކު ޒަޚަމުކޮށްލާފައި އޮތް މައްސަލައިގައި ދެމީހަކު ހައްޔަރުކޮށް، ޝަރީއަތް ނިމެންދެން ބަންދުކުރަން ކްރިމިނަލް ކޯޓުން މިއަދު އަމުރުކޮށްފައިވާ ކަމަށް ފުލުހުން މިއަދު ބުނެފިއެވެ.
ގެސްޓު ހައުސްތެރެއިން އެ ފިރިހެން މީހާ ޒަޚަމުތަކާއެކު ފެނުނީ މިދިޔަ ހޯމަ ދުވަހުއެވެ.
މި މައްސަލައިގައި ހައްޔަރުކޮށްފައި ވަނީ ކ. ތުލުސްދޫ، ޕެރިސް، ފައުޒާން ޒަރީރް (23އ) އަދި މާލެ، މއ. ވޮއްކޮޅުގެ، އަހުމަދު މާޒިން އިބްރާހީމް (23އ) އެވެ.
މި މައްސަލައާ ގުޅިގެން މީޑިއާތަކަށް މައުލޫމާތުދެމުން ފުލުހުން ބުނީ ސެޕްޓެމްބަރު ނުވަ ވަނަ ދުވަހު މާލޭ ގެސްޓު ހައުސެއްގައި ޒަޚަމްތަކަކާއެކު އޮއްވައި ފެނުނު މީހާއާ މެދު މާރާމާރީ ހިންގިކަމުގެ ތުހުމަތުގައި އެ ދެމީހުން ކޯޓު އަމުރެއްގެ ދަށުން އިއްޔެ ހައްޔަރުކޮށްފައިވާ ކަމަށެވެ.
އެ މައްސަލައާ ގުޅިގެން މި ދެ މީހުންގެ ބަންދާމެދު ގޮތެއް ނިންމުމަށް މިއަދު ކްރިމިނަލް ކޯޓަށް ހާޒިރުކުރުމުން ޝަރީއަތް ނިމެންދެން ބަންދުކުރުމަށް އަމުރުކޮށްފައިވާ ކަމަށް ވެސް ފުލުހުން ބުންޏެވެ.
އަދި މި މައްސަލަ ފުލުހުން ތަހުގީގުކުރަމުން އަންނަ ކަމަށް މައުލޫމާތުދިނެވެ.
ހޯމަ ދުވަހު ފުލުހުން ބުނީ، ހެންވޭރުގައި ހުރި ގެސްޓް ހައުސްއެއްގެ ކޮޓަރިއެއްގައި އުޅޭ މީހެއްގެ ޚަބަރެއް ނުވާ ކަމަށް ލިބުނު މައުލޫމާތަކާ ގުޅިގެން ފުލުހުން ކޮޓަރިއަށް ވަދެ ބެލިއިރު، އެ މީހާ ޒަޚަމުތަކަކާ އެކު އޮތް ކަމަށެވެ. އެއާއެކު އެ ދުވަހު އޭނާއަށް ވަނީ އައިޖީއެމްއެޗް އައިސީޔޫގައި ބާއްވައިގެން ފަރުވާދޭން ފަށާފައެވެ.
'ސަން'އަށް މައުލޫމާތުދެއްވާ އައިޖީއެމްއެޗްގެ މީޑިއާ އޮފިޝަލަކު މިއަދު ވިދާޅުވީ، ޒަޚަމްވި މީހާއަށް އަދިވެސް ފަރުވާދެމުން އަންނަނީ އައިސީޔޫގައި ކަމަށެވެ. ނަމަވެސް، އޭނާގެ ހާލަތާ ގުޅޭގޮތުން އިތުރު މައުލޫމާތެއް ހިއްސާކޮށްފައެއް ނުވެއެވެ.