ހުޅުމާލެ ދެވަނަ ފިޔަވަހީގެ ވިނަރެސް ފުލެޓުތައް ކައިރީ އެމްޓީސީސީގެ ދެ ބަސް މިއަދު ހަވީރު އެކްސިޑެންޓުވެއްޖެއެވެ.
މިކަމާ ގުޅިގެން ފުލުހުންގެ މީޑިއާ އޮފިޝަލް 'ސަން'އަށް ވިދާޅުވީ މީގެ ކުޑަ އިރުކޮޅެއް ކުރިން ވިނަރެސް ފުލެޓުތައް ކައިރީ އެމްޓީސީސީގެ ދެބަސް ޖެހިގެން އެކްސިޑެންޓެއް ހިނގާފައިވާ ކަމުގެ ރިޕޯޓުލިބިފައިވާ ކަމަށެވެ.
އެ ހާދިސާގައި އެއްވެސް މީހަކަށް އަނިޔާއެއް ނުވާ ކަމަށް އޮފިޝަލް ވިދާޅުވެފައިވެއެވެ.
ނަމަވެސް، އެ ހާދިސާ ހިނގަން މެދުވެރިވި ސަބަބެއް މިހާތަނަށް ސާފުވެފައެއް ނުވެއެވެ.
ފާއިތުވި ހަފުތާއެއްހާ ދުވަހުގެ ތެރޭގައި މާލެ އާއި ހުޅުމާލޭގައި ނުރައްކާތެރި އެކްސިޑެންޓުތައް ހިނގައިފައިވެއެވެ. އެގޮތުން މިދިޔަ ބުދަ ދުވަހުގެ ރޭ މާލޭ ބޮޑުތަކުރުފާނު މަގުގައި ކާރަކާއި ސައިކަލެއް ޖެހި 21 އަހަރުގެ ޒުވާނަކަށް އަނިޔާވެ، އޭނާއަށް ފަރުވާ ދެމުން ދަނިކޮށް ހޮނިހިރު ދުވަހުގެ ރޭ ނިޔާވެފައިވެއެވެ.
މިދިޔަ ހުކުރު ދުވަހުގެ ދަންވަރު ހުޅުމާލޭ ސެންޓްރަލް ޕާކު ކައިރީގައި ބާރު ސްޕީޑުގައި ދުއްވާފައި ދިޔަ ކާރެއް ސައިކަލެއްގައި ޖެހި، ސައިކަލު ދުއްވަން އިން ޒުވާނާ ނިޔާވެފައިވެއެވެ.
އެއަށް ފަހު ހޮނިހިރު ދުވަހާއި އިއްޔެ ތިން އެކްސިޑެންޓެއް ހިނގައިފައިވެއެވެ. އެ އެކްސިޑެންޓުތަކުގައި ޖުމްލަ ހަ މީހަކަށް އެކި ވަރުގެ އަނިޔާތައް ލިބިފައިވެއެވެ.
މީގެ އިތުރުން މިދިޔަ ޖުލައި މަހުގެ 30 ވަނަ ދުވަހު ވިނަރެސް ކައިރިން ބާރު ސްޕީޑުގައި ދުއްވާފައި ދިޔަ ކާރެއް، ސައިކަލެއްގައި ޖެހި، ސައިކަލުގައި އިން މީހާ ވިއްސައިގެން ގޮސް އޭނާއަށް އަނިޔާތަކެއް ލިބިފައިވެއެވެ.
އެހެންވެ، ފުލުހުން ވަނީ އާންމު މިންވަރަށް ވުރެ އިތުރަށް މަގުތަކުގައި ހަރަކާތްތެރިވާން ފަށައިފައެވެ.