އަންހެން ކުއްޖަކު ރަހީނުކޮށްގެން އެ މައްސަލައިގައި ފުލުހުންގެ ބެލުމުގެ ދަށުގައި ދޫނިދޫ ޖަލުގައި ހުރި އާދަމް އަތުހަރު ހުރި ޖަލު ގޮޅީގައި ދަންޖެހިފައި ހުއްޓައި ފެނުމާއި އޭނާ އައިޖީއެމްއެޗް ހޮސްޕިޓަލަށް ގެންދިއުމާ ދޭތެރޭ ހޭދަވީ 23 މިނެޓު ކަމަށް ފުލުހުން މިއަދު ބުނެފިއެވެ.
ބުރާސްފަތި ދުވަހުގެ ރޭ އަންހެން ކުއްޖަކު ރަހީނުކޮށްގެން ސައިކަލުގައި ފިލަން މަސައްކަތްކުރަނިކޮށް ފުލުހުން އެ އަންހެން ކުއްޖާ ސަލާމަތްކުރީ އަތުހަރުގެ ބޮލަށް މުގުރުން ހަމަލާ ދިނުމަށް ފަހުއެވެ. އޭނާ ޖަލަށް ގެންދިޔައީ ހޮސްޕިޓަލުގައި ފަރުވާ ދިނުމަށް ފަހުއެވެ.
ފުލުހުން މިއަދު ހިއްސާކުރި ޓައިމްލައިންގައި ވާގޮތުން ދޫނިދޫ ޖަލުގައި އަތުހަރު ދަންޖެހިފައި ހުއްޓައި ފެނުނީ ރޭ 19:02 ގައެވެ. ހަމަ އެ މިނެޓުގައި ޖަލު ގޮޅި ހުޅުވައި އަތުހަރު ތިރީގައި ބޭއްވި ކަމަށާއި ތިން މިނެޓު ފަހުން ސްޓްރެޗާއަށް ލައިގެން އޭނާ ގޮޅިން ނެރެ 19:06 ގައި ދޫނިދޫ ކްލިނިކަށް ގެންގޮސް ޑޮކްޓަރު އޭނާގެ ހާލަތު ބެލި ކަމަށް އެ ޓައިމްލައިންގައި ބުންޏެވެ.
އޭގެ އަށް މިނެޓު ފަހުން ފުލުހުން ވަނީ ލޯންޗުގައި އަތުހަރު މާލެ ގެންގޮސްފައެވެ. އެއަށް ފަހު 19:25 ގައި އައިޖީއެމްއެޗް އިމަޖެންސީގައި އަތުހަރަށް ފަރުވާދޭން ފެށި ކަމަށް ފުލުހުން ބުންޏެވެ.
މީގެ ކުރިން ފުލުހުން ވަނީ އަތުހަރު، ނަފުސާނީ ބައްޔާއި ނާރުގެ ބަލީގެ ޚާއްސަ ޑޮކްޓަރުންނަށް ދައްކައި، ތަހުލީލުތަކެއް ކޮށްފައެވެ. އެގޮތުން، އޭނަގެ އެއްވެސް ނަފުސާނީ އަދި ނާރުގެ ބައްޔެއް ވެސް ނެތް ކަމަށް ޑޮކްޓަރުންނާ ހަވާލާދީ ފުލުހުން ބުނެފައިވެއެވެ.
ކްރިމިނަލް ކޯޓުން ވަނީ އެ މައްސަލައިގައި އަތުހަރު ޝަރީއަތް ނިމެންދެން ބަންދުގައި ބަހައްޓަން އަމުރުކޮށްފައެވެ.
އެ މައްސަލައާ ގުޅޭ މައުލޫމާތު އެނގޭ މީހަކު "ސަން"އަށް ކިޔައިދިން ގޮތުގައި އަތުހަރު ރަހީނުކޮށްގެން ގެންގުޅުނީ އަތުހަރުގެ ލޯބިވެރިޔާއެވެ. ދެ މީހުން ދިރިއުޅެމުން އައި އެކީގައި، އެއް ގެއެއްގައެވެ. އަތުހަރަކީ ވަޒީފާއަކަށްދާ މީހެއް ނޫނެވެ.
އެހެންވެ، ގޭގެ ޚަރަދުތަކާއި ކުއްޔާއި އަދި އެ ނޫން ވެސް އަތުހަރުގެ ކަންކަމަށް ޚަރަދުކުރީ ލޯބިވެރިޔާއަށް ލިބޭ މުސާރައިން ކަމަށް ވެއެވެ. ބުރާސްފަތި ދުވަހުގެ ރޭ ދެ މީހުންގެ މެދުގައި މައްސަލަ ގޯސްވީ އިތުރަށް ޚަރަދު ނުކުރާނެ ކަމަށް އަންހެން މީހާ ބުނުމުން ކަމަށް މައުލޫމާތު ލިބިފައިވެއެވެ.
މީގެ ކުރިން ވެސް ފުލުހުންގެ ބަންދުގައި ހުއްޓާ، އަމިއްލައަށް މަރުވުމުގެ ހާދިސާތަކެއް ހިނގައިފައިވެއެވެ. އެގޮތުން، 2021ގައި، ވިލިމާލޭ ކަސްޓޯޑިއަލް ފެސިލިޓީގައި ބަންދުގައި ހުރި ބިދޭސީއަކު އަމިއްލައަށް މަރުވެފައިވެއެވެ.