ރާއްޖޭގެ ކްރެޑިޓް ރޭޓިން ދަށްވާކަމަށް ވިދާޅުވެ ކުރީގެ ފިނޭންސް މިނިސްޓަރު އިބްރާހީމް އަމީރު އެކްސްގައި ދެއްކެވި ވާހަކަތަކަށް މިހާރުގެ އިކޮނޮމިކް މިނިސްޓަރު މުހައްމަދު ސައީދު މިއަދު ރައްދެއް ދެއްވައިފިއެވެ.
ސޮވެރިން ކްރެޑިޓްގެ ތަފާސްހިސާބުތައް އާންމުކޮށް އަމީރު އެކްސްގައި ކުރެއްވި ޕޯސްޓެއްގައި ވަނީ، ރާއްޖޭގެ ކްރެޑިޓް ރޭޓިން ފެށުނީ 2016ވަނަ އަހަރުގެ ސެޕްޓެމްބަރު މަހު މޫޑީސްގެ B2 ރޭޓިން އަކުން ކަމަށެވެ. އެއަށް ފަހު އިގުތިޞާދަށް އައި ލޮޅުންތައް ފިޗާއި މޫޑީސްގެ ރޭޓުތަކުން ދެއްކި ނަމަވެސް، ކޮވިޑަށް ފަހު ވެސް އިގުތިޞާދު ހަމައަކަށް އެޅުވުނުކަމަށް އަމީރު ވަނީ ލިޔުއްވާފައެވެ.
ނަމަވެސް، މިހާރު ކްރެޑިޓް ރޭޓީން ދަށްވުމުގެ ބިރު އޮތްކަމަށް އޭނާ ވަނި ލިޔުއްވާފައެވެ.
އޭނާ ލިޔުއްވާފައި ވާގޮތުގައި، މި އަހަރުގެ ޖޫންމަހު ފިޗުން ވަނީ ރާއްޖޭގެ ކްރެޑިޓް ރޭޓިން ދަށްކޮށްފައެވެ. އޭގެ ސަބަބުތަކުގެ ތެރޭގައި، ފިސްކަލް ރިފޯމްތައް ގެނައުމުގައި ލަސްވުންފަދަ ގިނަ މައްސަލަތަކެއް މެދުވެރިވިކަމަށް އޭނާ ލިޔުއްވާފައި ވެއެވެ.
ރާއްޖެއާއި އިންޑިއާގެ ގުޅުން ގޯސްވުމާ ގުޅިގެން ފަތުރުވެރިކަން ހީނަރުވި ކަމަށާއި އެކަމުގެ ނޭދެވޭ އަސަރު ރާއްޖޭގެ އިގުތިޞާދަށް ވެސް ކުރިކަން ފާހަގަކުރައްވާ އަމީރު ލިޔުއްވީ ޔޫއެސްޑީ ރެވެނިއު 15 ޕަސަންޓު މަތިވެފައިވާ ކަމަށެވެ.
އަދި، ބޭކާރު ޚަރަދު އިތުރުކުރުމަކީ ވެސް ކްރެޑިޓް ވޯތިނަސް ނުރައްކަލަށް ހުށަހެޅޭ ކަމެއްކަމަށް އަމީރު ލިޔުއްވާފައިވެއެވެ. އެހެންކަމުން އިގުތިޞާދު ހަމަ މަގަށް އެޅުވުމަށް އަޅަންޖެހޭ ފިޔަވަޅުތައް މިހާރުން މިހާރަށް އެޅުމަށް އަމީރު ވަނީ މި ސަރުކާރަށް ގޮވާލާފައެވެ.
އަމީރުގެ މި ވާހަކަތަކަށް ރައްދުދެއްވާ އިކޮނޮމިކް މިނިސްޓަރު ސައީދު ވިދާޅުވީ، ރާއްޖޭގެ ޖީޑީޕީ ދަށްނުވާ ކަމަށެވެ. އަދި، މިހާރު މި ފެންނަނީ މިދިޔަ ސަރުކާރުން މާލީ ނިޒާމު ހަލާކުކުރުމުގެ ނަތީޖާކަމަށް އޭނާ ލިޔުއްވާފައިވެއެވެ.
އެގޮތުން، މިދިޔަ ސަރުކާރުން ފައިސާ ޗާޕު ކުރިކަމަށާއި، ސެންޓްރަލް ބޭންކް ބެލެންސް ޝީޓު ބޮޑުކުރުމާއި ބޮންޑުތައް ދެއްކުން ލަސްކުރި ކަމަށާއި މި ކަންކަން ކޮށްފައިވަނީ އިންތިޚާބުން މޮޅުވުމުގެ ބޭނުމުގައިކަން އޭނާ ވަނީ ފާހަގަކުރައްވާފައެވެ.
ރާއްޖޭގެ ކްރެޑިޓް ރޭޓިން އެންމެ ފަހުން ފިޗުން ދަށްކުރި މައިގަނޑު ސަބަބަކީ ކުރީ ސަރުކާރުން ޚަރަދު ކުޑަކުރުމުގެ ފިޔަވަޅުތައް އަޅާފައި ނުވުމުން ކަމަށް ފިނޭންސް މިނިސްޓްރީން ވެސް މީގެ ކުރިން ވަނީ ބުނެފައެވެ.
ފިޗުން ރޭޓިން ދަށްކޮށް ބުނެފައިވަނީ، ރާއްޖޭގެ ފޮރިން ރިޒާވް ބަލިކަށިވުމާއި ބޭރުގެ ދަރަނިތައް އިތުރުވުމަކީ ސަރުކާރަށް އެ ދަރަނިތައް އަދާކުރުމަށާއި، ޑޮލަރުގެ އަގު ހިފެހެއްޓުމަށް ވެސް ގޮންޖެހުންތައް ހުރި ކަމެއް ކަމަށެވެ. އަދި، ސަރުކާރުން މެދު ރާސްތާގައި ބޭރުގެ ދަރަނިތަކަށް ބަރޯސާވާ މިންވަރު މަދުކުރާނެ ކަމަށް އުއްމީދު ކުރާ ކަމަށް އެ އިދާރާއިން ބުނެފައިވެއެވެ.
އެ ރޭޓިންއާ ގުޅޭ ގޮތުން މީގެ ކުރިން ފިނޭންސް މިނިސްޓްރީން ވަނީ ސަރުކާރަށް ދަރަނި ދެއްކޭނެ ކަމުގެ ޔަގީންކަންދީ، އިސްލާހީ އެޖެންޑާ ތަންފީޒުކުރުމުން މުސްތަގުބަލުގެ ރޭޓިންތައް ރަނގަޅުވާނެ ކަމަށް ބުނެފައެވެ.
އޭގެ ފަހުން މިނިސްޓްރީން ވަނީ، 2028 ވަނަ އަހަރާ ހަމައަށް އާމްދަނީ އިތުރު ކުރުމަށް އަޅާނެ ފިޔަވަޅުތަކުގެ ސްޓްރެޓެޖީއެއް އާންމުކޮށްފައެވެ. އޭގެ ތެރޭގައި ޖީއެސްޓީ ނެގުން ފުޅާކޮށް، އިމްޕޯޓް ޑިއުޓީއާއި ޓެލެކޮމް ރޭޓަށް ބަދަލުތައް ގެނައުން ހިމަނައިފައިވެއެވެ.