ޓެކްސް އެޕީލް ޓްރައިބިއުނަލްގެ އެއް މެންބަރަކު ފިޔަވާ ދެން ތިބި ހުރިހާ މެންބަރުން މަގާމުން ވަކިކުރުމަށް ރައްޔިތުންގެ މަޖިލީހުން ފާސްކުރި ގޮތަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ހަތަރު މެންބަރުން މިއަދު މަގާމުން ވަކިކުރައްވައިފިއެވެ.
މަޖިލީހުން އެ ގޮތަށް ފާސްކުރީ، ޓްރައިބިއުނަލްގައި ބޮޑެތި މައްސަލަތަކެއް ހުރިކަމަށް ބުނެ މަޖިލީހަށް ހުށަހެޅި މައްސަލަ ދިރާސާކުރުމަށް ފަހުއެވެ. އެގޮތަށް މަޖިލީހުން ފާސްކުރީ މި މަހުގެ 19 ވަނަ ދުވަހުއެވެ.
އެކަމާ ގުޅިގެން ރައީސް އޮފީހުގެ ތަރުޖަމާނު ހީނާ ވަލީދު "ސަން" އަށް ވިދާޅުވީ މަޖިލީހުން ނިންމި ގޮތަށް އެ ހަތަރު މެންބަރުން މަގާމުން ވަކިކޮށްފައިވާ ކަމަށެވެ.
ޓެކްސް އެޕީލް ޓްރައިބިއުނަލްގެ ރައީސް ހިމެނޭ ގޮތަށް އިތުރު ތިން މެންބަރުން ވަނީ ވަކިކޮށްފައެވެ. އެއީ:
- ޓެކްސް އެޕީލް ޓްރައިބިއުނަލްގެ ރައީސް މުހައްމަދު މުނައްވަރު އަލީ
- ޓެކްސް އެޕީލް ޓްރައިބިއުނަލްގެ ނައިބު ރައީސް ހުސެއިން ޒައިދާން ޖަލީލް
- ޓެކްސް އެޕީލް ޓްރައިބިއުނަލްގެ މެންބަރު ޚަދީޖާ ނައީމް
- ޓެކްސް އެޕީލް ޓްރައިބިއުނަލްގެ މެންބަރު އަހުމަދު އަޝްރަފް
މިއީ މިދިޔަ ރައީސް އިބްރާހީމް މުހައްމަދު ޞާލިޙުގެ ސަރުކާރުގައި އައްޔަނުކޮށްފައިވާ ބޭފުޅުންނެވެ.
ޓެކްސް އެޕީލް ޓްރައިބިއުނަލްގެ މެންބަރުންގެ ތެރެއިން ވަކިކުރުމަށް ނިންމާފައިނުވާ ހަމައެކަނި މެންބަރަކީ އިސްމާއިލް ސާޖިދެވެ.
އޭނާ ވަކިނުކުރުމަށް މަޖިލީހުގެ ޖުޑިޝަރީ ކޮމިޓީން ނިންމީ، ޓްރައިބިއުނަލްގެ ހުރިހާ މައްސަލަތަކެއް މަޖިލީހުގެ ސަމާލުކަމަށް ގެނައުމުންނެވެ. އަދި، އެ ކަމުގައި އޭނާގެ ހެޔޮ ނިޔަތް އޮތް ކަމަށް ބެލެވޭ ކަމަށް ކޮމިޓީން ވަނީ ނިންމާފައެވެ.
ކޮމިޓީން ފާހަގަކުރި ކަންކަމުގެ ތެރޭގައި ޓްރައިބިއުނަލް ބައެއް މެންބަރުންގެ މައްޗަށް މަގާމުގެ ނުފޫޒު ބޭނުން ކުރުމާއި ނުހައްގު މުއްސަނދިކަން ހޯދިކަމަށް ތުހުމަތުކުރެވުން ހިމެނެއެވެ. އަދި، އެ އޮފީސް ހިންގަމުންދަނީ އެކަށީގެންވާ ވަރަށް ވުރެ ބޮޑު ޖާގައެއްގައިކަން ވަނީ ފާހަގަކޮށްފައެވެ. އެއީ، ދައުލަތަށް މާލީ ބުރަ ބޮޑު ކަމެއްގެ ގޮތުގައި ކޮމިޓީން ފާހަގަކޮށްފައިވެއެވެ.