ޓެކްސް އެޕީލް ޓްރައިބިއުނަލްގެ އެއް މެންބަރަކު ފިޔަވާ ދެން ތިބި ހުރިހާ މެންބަރުން މަގާމުން ވަކިކުރުމަށް، ރައީސް ޑރ. މުހައްމަދު މުއިއްޒަށް ލަފާ ދޭން ރައްޔިތުންގެ މަޖިލީހުން މިއަދު ފާސްކޮށްފިއެވެ.
މަޖިލީހުން އެ ގޮތަށް ފާސްކުރީ، ޓްރައިބިއުނަލްގައި ބޮޑެތި މައްސަލަތަކެއް ހުރިކަމަށް ބުނެ މަޖިލީހަށް ހުށަހެޅި މައްސަލަ ދިރާސާކުރުމަށް ފަހުއެވެ.
އޭގެ ތެރޭގައި ޓެކްސް އެޕީލް ޓްރައިބިއުނަލްގެ ރައީސް ހިމެނޭ ގޮތަށް އިތުރު ތިން މެންބަރުން ވަކިކުރަން ފާސްކުރިއެވެ. އެއީ:
- ޓެކްސް އެޕީލް ޓްރައިބިއުނަލްގެ ރައީސް މުހައްމަދު މުނައްވަރު އަލީ
- ޓެކްސް އެޕީލް ޓްރައިބިއުނަލްގެ ނައިބު ރައީސް ހުސެއިން ޒައިދާން ޖަލީލް
- ޓެކްސް އެޕީލް ޓްރައިބިއުނަލްގެ މެންބަރު ޚަދީޖާ ނައީމް
- ޓެކްސް އެޕީލް ޓްރައިބިއުނަލްގެ މެންބަރު އަހުމަދު އަޝްރަފް
މިއީ މިދިޔަ ރައީސް އިބްރާހީމް މުހައްމަދު ޞާލިޙުގެ ސަރުކާރުގައި އައްޔަނުކުރައްވާފައިވާ ބޭފުޅުންނެވެ.
މި ހަތަރު މެންބަރުން ވަކިކުރަން ލަފާދޭން ނިންމީ މިއަދުގެ ޖަލްސާގައި ނެގި ވޯޓުގައި 63 މެންބަރުންގެ ވޯޓާ އެކުއެވެ. އެ ވޯޓުގައި 10 މެންބަރަކު ވަނީ ދެކޮޅަށް ވޯޓުދެއްވާފައެވެ.
ޓެކްސް އެޕީލް ޓްރައިބިއުނަލްގެ މެންބަރުންގެ ތެރެއިން ވަކިކުރުމަށް ނިންމާފައިނުވާ ހަމައެކަނި މެންބަރަކީ އިސްމާއިލް ސާޖިދެވެ.
އޭނާ ވަކިނުކުރުމަށް މަޖިލީހުގެ ޖުޑިޝަރީ ކޮމިޓީން ނިންމީ، ޓްރައިބިއުނަލްގެ ހުރިހާ މައްސަލަތަކެއް މަޖިލީހުގެ ސަމާލުކަމަށް ގެނައުމުންނެވެ. އަދި، އެ ކަމުގައި އޭނާގެ ހެޔޮ ނިޔަތް އޮތް ކަމަށް ބެލެވޭ ކަމަށް ކޮމިޓީން ވަނީ ނިންމާފައެވެ.
ކޮމިޓީން ފާހަގަކުރި ކަންކަމުގެ ތެރޭގައި ޓްރައިބިއުނަލް ބައެއް މެންބަރުންގެ މައްޗަށް މަގާމުގެ ނުފޫޒު ބޭނުން ކުރުމާއި ނުހައްގު މުއްސަނދިކަން ހޯދިކަމަށް ތުހުމަތުކުރެވެއެވެ. އަދި، އެ އޮފީސް ހިންގަމުންދަނީ އެކަށީގެންވާ ވަރަށް ވުރެ ބޮޑު ޖާގައެއްގައިކަން ވަނީ ފާހަގަކޮށްފައެވެ. އެއީ، ދައުލަތަށް މާލީ ބުރަ ބޮޑު ކަމެއްގެ ގޮތުގައި ކޮމިޓީން ފާހަގަކޮށްފައިވެއެވެ.