އަންނަ ނޮވެމްބަރު މަހުން ފެށިގެން ޑޮލަރުގެ ރިޒާވް ރަނގަޅުވާން ފަށައި، ޑޮލަރުގެ މުއާމަލާތްކުރުމުގައި އޮންނަ ލިމިޓު އުވައިލެވޭނެ ކަމަށް ބެލެވޭ ކަމަށް ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެންބަރު އަހުމަދު އަޒާން މަޒްރޫގު މިއަދު ވިދާޅުވެއްޖެއެވެ.
ބީއެމްއެލުން މިއަދު ވަނީ އެ ބޭންކްގެ ރުފިޔާ ކާޑުތަކަށް އެއްވެސް އަދަދަކަށް ޑޮލަރު ނުދޭން ނިންމައި، އެކަން އިއުލާނުކޮށްފައެވެ.
އެ ކަމާ ގުޅުވައި މެންބަރު އަޒާން އެކްސްގައި ކުރެއްވި ޕޯސްޓެއްގައި ވިދާޅުވީ، ބީއެމްއެލްގެ ޑޮލަރުގެ މުއާމަލާތްތައް ވަގުތީ ގޮތުން މެދު ކަނޑާލީ އެ ބޭންކަށް ޑޮލަރު ނުލިބޭތީ ކަމަށާއި ނުލިބޭ އެއްޗެއް ދެވެން ނޯންނާނެ ކަމަށެވެ.
އެހެންވެ، އެކަމުގެ ދަތިކަން ގިނަ ބަޔަކަށް ކުރާނެކަން ފާހަގަކުރައްވައި އަޒާން ވިދާޅުވީ، ބީއެމްއެލްއަށް މި ނޫން ގޮތެއް އޮތް ނަމަ ސަރުކާރުން ޑޮލަރުގެ މުއާމަލާތްތައް ހުއްޓައިނުލާނެ ކަމަށެވެ.
މީހަކު ޑޮލަރު ނަގަނީ: ނޮވެންބަރު މަހުން ފެށިގެން ޑޮލަރުގެ ރިޒާވް ރަނގަޅުވެ، ޑޮލަރުގެ މައްސަލަ ހައްލުވާނެ ކަމަށް ބެލެވޭ ކަމަށް އަޒާން ވަނީ ވިދާޅުވެފައި --- ފޮޓޯ: ބީއެމްއެލް
ބޭންކަށް ޑޮލަރު ގަންނަނީ މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ކަމަށްވާއިރު، އެމްއެމްއޭއަށް ލިބޭ ޑޮލަރުން ބޭރުގެ ދަރަނި ދެއްކުމާއި ރާއްޖެއަށް ބޭނުންވާ ތެޔޮ ގަތުމުގެ އިތުރުން ބޭންކުތަކަށް ޑޯލަރު ދޫކުރަން ޖެހޭކަން އަޒާން ވަނީ ފާހަގަކުރައްވާފައެވެ.
އިތުރަށް އޭނާ ވިދާޅުވީ، މި މަހާއި އަންނަ މަހު ރިކޯޑޫ އަދަދަކަށް ބޭރުގެ ދަރަނި އަދާކުރަން ޖެހޭ ކަމަށާއި ޑޮލަރުގެ ތާށިކަން ބޮޑުވި އެއް ސަބަބަކީ އެއީ ކަމަށެވެ. މީގެ އިތުރުން، ލިމިޓެޑް އަދަދަކަށް ރިޒާވްގައި ޑޮލަރު ހުރިއިރު، ސަރުކާރުން އެންމެ ބޮޑު އިސްކަމެއް ދެނީ ދަރަނި އަދާކުރުމާއި ތެލަށް ފައިސާ ދެއްކުމަށް ކަމަށް އޭނާ ވިދާޅުވިއެވެ.
ރާއްޖެއަށް ބޭނުންވާ އެހެނިހެން އަސާސީ ތަކެތި އެތެރެކުރުމަށް ވިޔަފާރިތަކަށް ޑޮލަރު ދޫކުރަނީ ބޭންކުތަކުން ކަމަށާއި މި ހާލަތުގައި ޑޮލަރު ބޭނުން ކުރަން ޖެހޭނީ އެންމެ މުހިންމު ކަންކަމަށް އިސްކަންދީގެންކަން އަޒާން ވަނީ ފާހަގަކުރައްވާފައެވެ.
ބީއެމްއެލްއިން މިއަދު ގެނައި ބަދަލުތަކަކީ:
- މިހާރު ދޫކޮށްފައިވާ ޑެބިޓް ކާޑުތަކުގެ ތެރެއިން ޕްރައިމަރީ އެކައުންޓަކީ ރުފިޔާ އެކައުންޓަކަށްވާނަމަ ބޭރު ފައިސާގެ ގޮތުގައި ދެން އެއްވެސް އަދަދެއް ނުލިބޭނެ
- މިއަދުން ފެށިގެން ދޫކުރާ ޑެބިޓް އަދި ކްރެޑިޓް ކާޑުތަކަށް ވެސް ޕްރައިމަރީ އެކައުންޓަކީ ރުފިޔާ އެކައުންޓެއް ނަމަ ބޭރު ފައިސާގެ ގޮތުގައި އެއްވެސް އަދަދެއް ނުލިބޭނެ
- މިހާރު ދޫކޮށްފައިވާ ސްޓެންޑާޑް އަދި ގޯލްޑް ކްރެޑިޓް ކާޑުތަކަށް ވެސް މަހެއްގެ މައްޗަށް ލިބޭނީ 100 ޑޮލަރު
މި ބަދަލާއެކު ކަޅު ބާޒާރުގައި ޑޮލަރުގެ މުއާމަލާތް ކުރާ އެކި ރޭޓުތައް ކުއްލިއަކަށް އުފުލި، މިހާރު އަގުތައް ހުރީ 18.50 އާއި 18.85 ރުފިޔާއާ ދެމެދުގައެވެ.
ފާހަގަކޮށްލެވޭ ގޮތުގައި، ކުރިން ބީއެމްއެލްގެ ޑެބިޓް އަދި ކްރެޑިޓް ކާޑުތަކުން 250 ޑޮލަރާ ހަމައަށް މުއާމަލާތް ކުރެވެއެވެ. އަދި، ރާއްޖެއިން ބޭރުގައި ދިރިއުޅޭ ދިވެހީންނަށް މަހެއްގެ މައްޗަށް 750 ޑޮލަރު ބޭނުންކުރެވެއެވެ.
ބީއެމްއެލްއިން ޑޮލަރު ލިމިޓެއް ކަނޑައެޅީ ކޮވިޑްގެ ދުވަސްވަރު ދިމާވި އިގުތިސާދީ ދަތިތަކާ ގުޅިގެން ޑޮލަރު ލިބުމުގައި ދަތިތައް ދިމާވުމުންނެވެ.