ޗައިނާއިން 2030 އަށް ކަނޑައަޅާފައިވާ ސާފު ހަކަތައިގެ ލަނޑުދަނޑި ހަ އަހަރު ކުރިން ހާސިލްކޮށްފިކަމަށް އެ ޤައުމުން ބުނެފިއެވެ.
2020 ވަނަ އަހަރު ޗައިނާގެ ރައީސް ޝީ ޖިންޕިންގ ވަނީ 2030 ވަނަ އަހަރާ ހަމައަށް މަދުވެގެން 1,200 ގިގަވޮޓްގެ ސާފު ހަކަތަ އުފެއްދުމުގެ ލަނޑުދަނޑިއެއް ކަނޑައަޅުއްވާފައެވެ.
ޗައިނާގެ ނެޝަނަލް އެނަރޖީ އެޑްމިނިސްޓްރޭޝަނުން ނެރުނު ބަޔާނެއްގައި ބުނެފައިވާ ގޮތުގައި، ވޭތުވެދިޔަ މަހު އިތުރުކުރެވުނު 25 ގިގަވޮޓްގެ ޓާބައިންތަކާއި ޕެނަލްތަކާއެކު، މިހާރު ޗައިނާއަށް 1,206 ގިގަވޮޓްގެ ސާފު ހަކަތަ އުފެއްދުމުގެ ޤާބިލުކަން ލިބިފައިވެއެވެ.
މިއީ ދުނިޔޭގެ އެންމެ ބޮޑު ތިމާވެށީގެ ނުރައްކާތެރި ގޭސް ބޭރުކުރާ ޤައުމު ކަމުގައިވާ ޗައިނާއަށް ވަރަށް މުހިންމު މަރުހަލާއެކެވެ.
2023 ވަނަ އަހަރުގެ ހިސާބުތަކުން ދައްކާ ގޮތުގައި ޗައިނާއިން އަހަރަކު ގާތްގަނޑަކަށް 12.7 މެޓްރިކް ޓަނުގެ ތިމާވެށީގެ ނުރައްކާތެރި ގޭސް ބޭރުކުރެއެވެ. ދެވަނައަށް އެންމެ ގިނައިން މި ގޭސް ބޭރުކުރާ ޤައުމަކީ އެމެރިކާ ކަމަށްވާއިރު، އެ ޤައުމުން ބޭރުކުރަނީ 5.9 ބިލިއަން ޓަނެވެ.
ނަމަވެސް، ޗައިނާއިން ސާފު ހަކަތައަށް ކުރާ ހޭދަ ދުނިޔޭގެ އެހެން ހުރިހާ ޤައުމަކަށްވުރެ ބޮޑުކަން ފާހަގަކުރެވެއެވެ. އެހެންނަމަވެސް، އަދިވެސް ގިނަ މަސައްކަތްތަކެއް ކުރަން ޖެހެއެވެ. 2024 ވަނަ އަހަރު މިހާތަނަށް އިރުގެ އަލިން އަދި ވައިން އުފައްދާފައިވަނީ ޗައިނާގެ ޖުމުލަ ހަކަތައިގެ 14 އިންސައްތައެވެ.
ޗައިނާއިން މިހާރު ދަނީ އިއާދަކުރަނިވި ހަކަތަ ހިމެނޭ އެކި މަޝްރޫޢުތަކެއް ހިންގަމުންނެވެ.
ޖޫން މަހު އިޢުލާނު ކުރެވުނު މަޝްރޫޢެއްގައި، ޗައިނާގެ ސަރުކާރު ހިއްސާވާ ކުންފުންޏެއް ކަމަށްވާ ޗައިނާ ތްރީ ގޯޖަސް ރިނިއުވަބަލްސް ގްރޫޕުން 80 ބިލިއަން ޔުއާން (11 ބިލިއަން އެމެރިކާ ޑޮލަރު) އިންވެސްޓްކޮށްގެން އިރުގެ އަލިންނާއި، ވައިން އަދި ކޯލް އިން ކަރަންޓު އުފައްދާ ބޭސްއެއް ޤާއިމުކުރާނެއެވެ.
މި ޕްލާންޓް އިންނާ މޮންގޯލިއާގައި ޤާއިމުކުރެވޭއިރު، 2030 ވަނަ އަހަރާ ހަމައަށް ޗައިނާއިން ސަހަރާ ސަރަހައްދުގައި ހިންގުމަށް ރޭވިފައިވާ 435 ގިގަވޮޓްގެ މަޝްރޫޢުތަކުގެ ތެރެއިން 135 ގިގަވޮޓް މި މަޝްރޫޢުން އުފައްދާނެއެވެ.
ނަމަވެސް މި މަޝްރޫޢުގައި ކޯލް ބޭނުންކުރުމުގެ ސަބަބުން ކިހާވަރެއްގެ ނޭދެވޭ އަސަރެއް ކުރާނެކަން ދެނެގަނެވޭނީ މަޝްރޫޢު ކުރިއަށްދާ ވަރަކުން ކަމަށް ރިޕޯޓްތައ ބުނެއެވެ.