މޫސުން ގޯސްވުގެ ސަބަބުން، މާލޭ މަގުމަތީގައި އުޅޭ ބުޅާތައް ވަގުތީ ގޮތުން ރައްކާތެރި މާހައުލަކަށް ބަދަލު ކުރުމުގެ މަސައްކަތް ޖަނަވާރުތަކާ ބެހޭ ވުޒާރާއިން ކުރަންފަށައިފިއެވެ.
މިކަމާ ގުޅުން ހުރި އިތުރު މައުލޫމާތު 'ސަން'އާ ހިއްސާކުރައްވަމުން އެ ވުޒާރާގެ އޮފިޝަލަކު ވިދާޅުވީ، އެންމެ ބޮޑަށް ފެންބޮޑުވާ ސަރަހައްދުތަކުން ބުޅާތައް ގެންދިޔުމަށް ނިންމާފައި ވަނީ މޭރީބްރައުން ސަރަހައްދުގައި ހުރި ކޮންޓެއިނާއަކަށް ކަމަށެވެ.
އެގޮތުން، މިހާރު ކުރިއަށް ދަނީ އެ ކޮންޓެއިނާތައް ސާފުކޮށް، އެތަން ތައްޔާރު ކުރުމުގެ މަސައްކަތް ކަމަށާއި މާދަމާ މޫސުން ގޯސްވެއްޖެ ނަމަ ބުޅާތައް އެ ސަރަހައްދަށް ގެންދަން ފަށާނެ ކަމަށް އޮފިޝަލް ވިދާޅުވިއެވެ.
މި މަސައްކަތުގައި ހުރިހާ އެންޖީއޯތަކާއި މާލެ ސިޓީ ކައުންސިލާ އެމްއެންޑީއެފްގެ އެހީތެރިކަމާ އެއްބާރުލުން ލިބޭ ކަމަށް އޮފިޝަލް ވިދާޅުވިއެވެ.
މީގެކުރިން ވެސް މާލޭގައި ފެންބޮޑުވުމުގެ ސަބަބުން ބުޅާތައް ގެނބިގެން މަރުވާތީ އެބުޅާތައް ވަގުތީ ހިޔަލަކަށް ބަދަލު ކުރުމުގެ މަސައްކަތް އެ މިނިސްޓްރީން އެންޖީއޯތަކާ ގުޅިގެން ކޮށްފައިވެއެވެ.
ފާހަގަކޮށްލެވޭ ގޮތުގައި، މާލޭގައި އުޅޭ ބުޅާތަކަށް ޚާއްސަކޮށް މާލޭ ސިޓީ ކައުންސިލާއި އެގްރިކަލްޗާ އެންޑް އެނިމަލް ވެލްފެއާ މިނިސްޓްރީން ހުޅުމާލެ ފަރުކޮޅުފުށީގައި އަންނަނީ ބުޅާ ފެސިލިޓީ ގާއިމުކުރުމުގެ މަސައްކަތް ކުރަމުންނެވެ.
ނަމަވެސް، މިދިޔަ ދެ ތިން މަހު ރާއްޖެއަށް ކުރި ވިއްސާރައިގެ ސަބަބުން އެ ތަނުގެ ބައެއް މަސައްކަތްތަކަށް ބުރޫ އެރި ކަމަށް މީގެކުރިން ސިޓީ ކައުންސިލްގެ މީޑިއާ އޮފިޝަލް އާމިނަތު ޝަތުފާ ޝަފީއު ވިދާޅުވިއެވެ.
މާލޭގައި ބުޅާ ގިނަވެފައިވާއިރު، އޭގެ ސަބަބުން ސިއްހީ އެތައް މައްސަލަތަކެއް ވެސް ކުރިމަތިވެއެވެ. މާލެ ސިޓީގެ މޭޔަރު އާދަމް އާޒިމް މީގެ ކުރިން ވިދާޅުވީ މާލޭގައި ބުޅަލުގެ އާބާދީ 3،000އަށް އަރާނެ ކަމަށް ލަފާކުރެވޭ ކަމަށެވެ.
މާލޭގެ އެކި ސަރައްހައްދުތަކުގައި ބުޅާ ނަޖިސް ގިނަވާތީ، ޚާއްސަކޮށް ސަލްމާން މިސްކިތް ސަރަހައްދަށް ދާ މީހުނަށް މުޅާ ނަޖިހަށް އެރޭ ހާދިސާތައް ދިމާވާކަން އާޒިމް ފާހަގަކުރެއްވިއެވެ