ބައެއް ރަށްރަށުގެ މަގުމަތީގައި އުޅޭ ބުޅާތަކަށް އަނިޔާކޮށް، މަރާކަމުގެ ޝަކުވާތައް ލިބެމުންދާ ކަމަށް އެނިމަލް ވެލްފެއާ މިނިސްޓްރީން މިއަދު ބުނެފިއެވެ.
އެ މިނިސްޓްރީން ނެރުނު ބަޔާނެއްގައި ވަނީ، ބައެއް ރަށްރަށުގެ މަގުމަތީގައި ވީއްލިގެން އުޅޭ ބުޅާތަކަށް މިހާރަކަށް އައިސް ގޯނާކޮށް، ހާނިއްކަކުރުމުގެ އިތުރުން އެސޮރުމެން މަރާކަމުގެ ޝަކުވާތައް މިނިސްޓްރީއަށް ލިބެމުންދާ ކަމަށެވެ. އެއީ، ޖަނަވާރުގެ ދުޅަހެޔޮކަމުގެ މިންގަނޑުތަކާ ޚިލާފު އަމަލަކަށްވާތީ، އެކަން ނުކުރުމަށް އެ މިނިސްޓްރީން އިލްތިމާސްކުރިއެވެ.
އެ މިނިސްޓްރީން ވަނީ، ޖަނަވާރުގެ ދުޅަހެޔޮކަމުގެ މަފްހޫމްގައި ބައިނަލްއަގުވާމީ ފެންވަރުގައި ބަލައިގެންފައިވާ، ޖަނަވާރަށް ލިބިގެންވާ ފަސް މިނިވަންކަމެއް ފާހަގަކޮށްފައެވެ. އެއީ:
1- ހައިހޫނުކަމާއި، ކަރުހިއްކުމާއި، ކާޑުބަލިން މިންޖުވުމުގެ މިނިވަންކަން.
2- ބިރުގަތުމާއި، ހާސްވުމާއި، ކަންބޮޑުވުމުން މިންޖުވުމުގެ މިނިވަންކަން.
3- ޖިސްމާނީ ގޮތުން އަރާމު ނުލިބުމުން މިންޖުވުމުގެ މިނިވަންކަން.
4- ވޭނާއި، ހާނީއްކައާއި، ބަލިން ބަލީން މިންޖުވުމުގެ މިނިވަންކަން.
5- އާދަވެގެން ޖަނަވާރު އުޅޭ އުޅުމަށް އެޅޭ ހުރަސްތަކުން މިންޖުވުމުގެ މިނިވަންކަން.
ދިވެހިރާއްޖެއިން ބައިވެރިވެފައިވާ، ދުނިޔޭގެ ޖަނަވާރުގެ ސިއްހަތާބެހޭ ޖަމިއްޔާގެ އެނިމަލް ހެލްތު ކޯޑުގައި ޖަނަވާރުގެ ދުޅަހެޔޮކަމަށް ޚާއްޞަ އަހައްމިއްޔަތުކަމެއް ދީފައިވާކަން މިނިސްޓްރީން ފާހަގަކުރިއެވެ. އަދި އޭގެ ތެރޭގައި ދަނޑުވެރިކަމަށާއި، މުނިފޫހިފިލުވަމަށާއި، ޢިލްމީ ދިރާސާކުރުމަށާއި، އެނޫންވެސް ބޭނުންތަކަށް ޖަނަވާރު ގެންގުޅުމުގައި އެސޮރުމެންގެ ދުޅަހެޔޮކަން ކަށަވަރުކުރުން ހިމެނޭ ކަމަށް މިނިސްޓްރީން ބުންޏެވެ.
މަގުމަތީގައި ބުޅަލެއް: މިދިޔަ މަހު ބުޅާ ފެސިލިޓީއެއް ހުޅުވި ނަމަވެސް، އެ ފެސިލިޓީއަށް މިހާތަނަށް ބުޅާ ގެންދެވިފައިނުވޭ --- ސަންފޮޓޯ/ ފަޔާޒު މޫސާ
މީގެ އިތުރުން އޮޅުކޮށްގެން ގެންގުޅޭ ޖަނަވާރުތައް މަގުމައްޗަށް ދޫކޮށްލުމުން ދެންވާ ގޮތާ މެދު ވެސް މިނިސްޓްރީން ކަންބޮޑުވުން ފާޅުކުރިއެވެ. އެގޮތުން އޮޅުކޮށްގެން ގެންގުޅޭ ޖަނަވާރަކީ، ވަކި ބާވަތެއްގެ ކާނާއެއް ކާންދީ، އެއެއްޗެއްގެ ސުލޫކު ވަކިގޮތަކަށް ބައްޓަންކޮށް، އަޅައިލުމާއި، ލޯބިދީ، ހޭހަންކޮށްގެން ގެންގުޅޭ އެއްޗަކަށްވާތީ މަގުމައްޗަށް ދޫކޮށްލުމުން އެސޮރުމުންނަށް ލިބެމުން ދިޔަ އަޅައިލުމާއި، ލޯބިން މަހުރޫމުވާކަން ބަޔާނުގައި ފާހަގަކޮށްފައިވެއެވެ.
"މީގެ ނަތީޖާއަކަށްވަނީ ކަންބޮޑުވުމާއި، ހިތްދަތިކަން އިހުސާސް ކުރަން ޖެހުމުގެ އިތުރުން އާދަވެގެން ކަމުންދިޔަ ކާނާ ނުލިބުމާއި، އުޅެމުންދިޔަ އަމާން، އަރާމު ވެށި ގެއްލުމުގެ ސަބަބުން އިންސާނުންނާ ދޯޅުވެ، ގާތުގައި އުޅުމެވެ." މިނިސްޓްރީން ބުންޏެވެ.
"މިފަދަ ޖަނަވާރަކީ އިންސާނުންނާއެކު އެމީހުންގެ ވެށީގައި ދިރިއުޅޭ، ބުއްދިއެއްނުވާ އެއްޗަކަށްވާތީ އެސޮރުމެންގެ ފަރާތުން އިންސާނުންނަށް އުނދަގޫތައް ކުރިމަތިވުމަކީ އެކަށީގެންވާ ކަމެކެވެ."
އެފަދަ ހާލަތްތަކުގައި ބުޅަލަށް ހާނީއްކަކުރުމަކީ އިންސާނިއްޔަތުކަމުގެ ގޮތުން ބަލާއިރު ކޮށްގެންވާނޭ ކަމެއްނޫން ކަމަށް މިނިސްޓްރީން ބުންޏެވެ.
މީގެ އިތުރުން ޖަނަވާރަށް ރަހުމުކޮށް، އަޅާލައި، އެތަކެއްޗަށް އޯގާތެރިވުމަށް އިސްލާމްދީންވެސް ބާރުއަޅާ ކަމަށާއި އިސްލާމްދީނުގައިވަނީ ޖަނަވާރުގެ ހައްގުތައް ކަށަވަރުކޮށްދީފައިކަން މިނިސްޓްރީން ފާހަގަކުރިއެވެ.
"ވީމާ އެއްވެސް ޖަނަވާރަކަށް އަނިޔާވެރިނުވެ ޖަނަވާރަށް އަޅާލައި އޯގާތެރިވުމަށް މި މިނިސްޓްރީން އިލްތިމާސް ކުރަމެވެ." ބަޔާނުގައިވެއެވެ.
ބުޅަލަށް އެކި ބާވަތުގެ އަނިޔާތައް ކުރާ މަންޒަރު ފެންނަ ފޮޓޯތަކާއި ވީޑިއޯތައް މީގެ ކުރިން ސޯޝަލް މީޑިއާގައި އާންމުވެ، އެ މައްސަލަތައް ފުލުހުން ބަލައިފައި ވެސްވެއެވެ.
ޖިނާއީ އިޖުރާއަތުގެ ގާނޫނުގެ 625 ވަނަ މާއްދާގައި ވަނީ ޖަނަވާރަކާ މެދު އަނިޔާވެރި އަމަލު ހިންގުމަކީ ކުށެއް ކަމަށް ބަޔާންކޮށްފައެވެ. އަދި އެ ގާނޫނުގެ ދަށުން، އެ ކުށަށް އަސާސީ މިންގަނޑުން އެއް މަހާއި ހަ ދުވަހުގެ ޖަލު ހުކުމެއް ކުރެވިދާނެއެވެ. އެންމެ ގިނަވެގެން ތިން މަސް ދުވަހުގެ ޖަލު ހުކުމެއްވެސް އިއްވިދާނެއެވެ.
މާލޭ ސަރަހައްދުގެ މަގުމަތީގައި އުޅޭ ބުޅާތަކުގެ މައްސަލަ ވެސް ބޮޑުވެ، އެ މައްސަލަ ހައްލުކުރުމަށް ޓަކައި ހުޅުމާލެ ދެވަނަ ފިޔަވައްސާ ގުޅިފައި އޮތް ފަރުކޮޅުފުށީގައި ވަނީ ބުޅާ ބަލަހައްޓަން ފެސިލިޓީއެއް ހަދައިފައެވެ.
އެ ފެސިލިޓީ މިދިޔަ މަހުގެ ދެވަނަ ދުވަހު ހުޅުވި ނަމަވެސް، އެނިމަލް ވެލްފެއާ މިނިސްޓްރީއާއި އެ ފެސިލިޓީ އެޅި މާލޭ ސިޓީ ކައުންސިލާ ދެމެދު މައްސަލަތަކެއް ޖެހި، ފެސިލިޓީއަށް ބުޅާ ގެންދިޔުމުގެ މަސައްކަތް އަދިވެސް ފެށިފައި ނުވެއެވެ.