ރާއްޖޭގެ ބޮޑު ސަރަހައްދަކަށް މިހާރު ކުރަމުން އަންނަ ވިއްސާރައިގައި ވެރި ރަށް މާލޭގައި ފެންބޮޑުވެ، މާލޭގައި އުޅޭ ގިނަ ބުޅާތަކެއް މަރުވާކަން ފާހަގަވާތީ، އެގްރިކަލްޗާ އެންޑް އެނިމަލް ވެލްފެއާ މިނިސްޓްރީއާއި ބުޅާތަކަށް އެހީތެރިވާ އެންޖީއޯތަކާ، ގުޅިގެން ބުޅާތައް ސަލާމަތްކޮށް، ވަގުތީ ހިޔަލަކަށް ބަދަލުކުރުމުގެ މަސައްކަތް މިއަދު ފަށައިފިއެވެ.
އެގްރިކަލްޗާ އެންޑް އެނިމަލް ވެލްފެއާ މިނިސްޓްރީން މައުލޫމާތުދިން ގޮތުގައި ހާލުގައި ޖެހޭ ބުޅާތައް ގެންދިއުމަށް ހުޅުމާލެއިން ވަގުތީ އިމާރާތެއް ލިބޭނެ އިންތިޒާމް އާބަންކޯއިން ވަނީ މިހާރު ހަމަޖައްސައިދީފައެވެ.
އަދި މިތަނުގައި ކުރަންޖެހޭ މަސައްކަތްތައް މިނިސްޓްރީގެ އިރުޝާދާއި އެއްގޮތަށް އާބަންކޯއިން ވަނީ ފަށައިފައެވެ.
މިކަމާ ގުޅޭގޮތުން "ސަން"އަށް މައުލޫމާތު ދެއްވަމުން އެނިމަލް ވެލްފެއާ މިނިސްޓްރީގެ ޑެޕިއުޓީ މިނިސްޓަރު ފާތިމަތު ޒުހުރާ، ވިދާޅުވީ މާލޭގައި އެންމެ ގިނަ އަދަދަކަށް ބުޅާ އުޅޭ އެއް ސަރަޙައްދަކީ މާލޭ އިންޑަސްޓްރިއަލް ޒޯން ސަރަޙައްދު ކަމަށެވެ.
އެ ސަރަޙައްދުގައި ފެން ބޮޑުވުމުގެ ސަބަބުން، ގިނަ އަދަދެއްގެ ބުޅާ ގެނބި، މަރުވަމުން އަންނަކަމުގެ ރިޕޯޓުތައް އެ މިނިސްޓްރީއަށް ލިބެމުން އަންނަކަމަށް އޭނާ ވިދާޅުވިއެވެ.
"މިހާރު މި ބަލަނީ ބުޅާތައް ބަދަލުކުރަން. އެގޮތުން ހަމަ ރަނގަޅު ސްޓޭންޑަޑަކަށް އެ ތަން ހަދައި، ކްލިނަކަލް ޚިދުމަތް ވެސް ލިބޭނެހެން މި ހަދަނީ،" އޭނާ ވިދާޅުވިއެވެ. .
އިއްޔެ އެ މިނިސްޓްރީން ވަނީ ފަރުކޮޅުފުށީގައި ޕެޓް ކެއާ ފެސިލިޓީއެއް ގާއިމު ކުރަން ބިން ހޯދުމުގެ އެއްބަސްވުމެއްގައި އާބަންކޯއާއެކު އެއްބަސްވުމެއްގައި ސޮއިކޮށްފައެވެ. މި ފެސިލިޓީވާނީ ޕެޓް ކެއާ ޝެލްޓަރަކަށެވެ.
މިކަމުގެ ސަބަބުން ބުޅާ ގިނަވެ މަގުތައް ނަޖިސްވުން ފަދަ ކަންކަމަށް ދާއިމި ހައްލެއް ލިބޭނެކަމަށް އުންމީދު ކުރާކަމަށް މިނިސްޓްރީން ބުނެއެވެ.