އަތޮޅުތެރޭގެ ރަށްތަކުގައި ފެނަކައިން ހިންގާ ހުރިހާ މަޝްރޫއުތަކެއްގެ ކޮންޓްރެކްޓް ބާތިލުކޮށް، އެމްޑަބްލިއުއެސްސީއާ ހަވާލުކުރުމަށް ނިންމާފައިވާ ކަމަށް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެއެވެ.
މިނިސްޓަރު މުއްތަލިބު މިފަދައިން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާއަށް ހާޒިރުވެވަޑައިގެން، މެންބަރުން ކުރެއްވި ސުވާލުތަކަށް ޖަވާބުދެއްވައެވެ.
ނިމިދިޔަ ސަރުކާރުން ފެނަކަ ކޯޕަރޭޝަނާ ހަވާލުކޮށްގެން ކުރިއަށް ގެންދިޔަ ގިނަ މަޝްރޫއުތައް ހުއްޓިފައިވާކަމަށް މިނިސްޓަރު މީގެ ކުރިން ވިދާޅުވެފަވެއެވެ.
މުއްތަލިބު ވިދާޅުވީ ފެނަކައަކީ ރަށްރަށުގައި ކުރިއަށް ގެންދާ ފެނާއި ނަރުދަމާ އެޅުމުގެ މަޝްރޫއުތައް ކުރިއަށް ގެންދާ ފަދަ ކޮންޓްރެކްޓަރެއް ނޫން ކަމަށެވެ. އަދި އެ ކުންފުންޏަކީ ޚިދުމަތް ފޯރުކޮށްދޭ ސާވިސް ޕްރޮވައިޑާއެއް ކަމަށް މުއްތަލިބު ވިދާޅުވިއެވެ.
ސަރުކާރުން ނިންމީ އެ ޕްރޮޖެކްޓުތަކުގެ މަސައްކަތް، އެގޮތަށް [ޚިދުމަތް ފޯރުކޮށްދޭން] ހަވާލުކޮށްފައި، ފެނަކައާ ހަވާލުކޮށްފައި ހުރި ހުރިހާ މަޝްރޫއުތަކެއް ކޮންޓްރެކްޓު ބާތިލުކުރުމަށް ފަހު އެމްޑަބްލިއުއެސްސީއާ ވާހަކަދައްކައިގެން ޑައިރެކްޓު ނެގޯޝިއޭޝަނެއްގެ ތެރެއިން އެމްޑައިބްލިއުއެސްސީއާ ހަވާލު ކޮށްގެން ކުރިއަށް ގެންދަން، އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބު
އެގޮތުން މުއްތަލިބު ވިދާޅުވީ 20 ރަށެއްގައި ފެނަކައާ ހަވާލުކޮށްގެން ކުރިއަށްގެންދާ މަޝްރޫއުތައް އެމްޑަބްލިއުއެސްސީއާ ހަވާލުކުރަން ނިންމާފައިވާ ކަަމަށެވެ. އަދި މި މަސް ނިމުމުގެ ކުރިން އެމްޑަބްލިއުއެސްސީއާ އެ ޕްރޮޖެކްޓުތައް ހަވާލު ކުރެވޭތޯ މަސައްކަތް ކުރަމުންދާ ކަމަށް އޭނާ ވިދާޅުވިއެވެ. އަދި އެކަން ޓެންޑާ ބޯޑާއެކު މަޝްވަރާ ކުރަމުންދާކަމަށް ވިދާޅުވިއެވެ.
ހަމައެއާއެކު މި ސަރުކާރުން އެއްވެސް މަޝްރޫއުއެއް މަޑުޖައްސާލާފައި ނުވާނެކަމަށް މިނިސްޓަރު ވިދާޅުވިއެވެ. އެގޮތުން ފެނާއި ނަރުދަމާގެ އެއްވެސް މަޝްރޫއެއް އެއްވެސް ރަށެއްގައި ހުއްޓިފައި ނޯންނާނެކަމުގެ ޔަގީންކަން މިނިސްޓަރު ވަނީ ދެއްވާފައެވެ.
...އެއްވެސް ރަށެއްގެ މަޝްރޫއެއް މަޑުޖައްސާލާފައި ނޫނީ ހުއްޓާލާފައި އަޅުގަނޑުމެން ނުތިބޭނަން. ވީހާވެސް އަވަހަށް މަޝްރޫއުތައް ފަށައި ރައްޔިތުންނަށް ގެނެސްދޭނަން،
މިދިޔަ މަހުގެ 15 ވަނަ ދުވަހު އޮތް މަޖިލީހުގެ ޖަލްސާއަށް ހާޒިރުވެވަޑައިގެން މުއްތަލިބު ވަނީ މި އަހަރަށް ކަނޑައެޅި ބަޖެޓުގައި މަޝްރޫއުތައް ހިންގަން އެކަށީގެންވާ ވަރަށް ފައިސާ ނެތް ކަމަށް ވިދާޅުވެފައެވެ.
މިނިސްޓަރު އޭރު ވިދާޅުވީ މި އަހަރު ފެށޭނީ ކޮންކޮން މަސައްކަތްތަކެއްތޯ ފިނޭންސް މިނިސްޓްރީއާއެކު ބަލަމުން އަންނަ ކަމަށެވެ. އަދި އެއީ ކޮންކޮން މަޝްރޫއުތަކެއްކަން އެނގޭނީ އެ ތަރުތީބު ކުރެވުމުން ކަމަށް ވެސް ވިދާޅުވިއެވެ. ހަމައެއާއެކު ބައެއް މަޝްރޫއުތަކަށް ބޭނުންވާ ފަންޑު ހޯދުމުގެ މަސައްކަތް ވެސް ފިނޭންސް މިނިސްޓްރީއާ ގުޅިގެން ކުރިއަށްދާ ކަމަށް މުއްތަލިބު ވިދާޅުވިއެވެ.