އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރު ރާއްޖެއަަށް މިދިޔަ ހުކުރު ދުވަހު ފެއްޓެވި ރަސްމީ ދަތުރުފުޅު ނިންމަވައިލެއްވުމަށްފަހު މިއަދު އެނބުރި އިންޑިއާއަށް ފުރާވަޑައިގެންފިއެވެ.
ޖައިޝަންކަރު އިންޑިއާއަށް ފުރާވަޑައިގަތީ މިއަދު އައްޑޫ ސިޓީއަށް ވަޑައިގަތުމަށްފަހު، ގަން އެއާޕޯޓުންނެވެ.
ޖައިޝަންކަރު ރާއްޖެއަށް ކުރެއްވި މި ރަސްމީ ދަތުރުފުޅަކީ ރާއްޖޭގެ ޚާރިޖީ ވަޒީރު މޫސާ ޒަމީރުގެ ދައުވަތަކަށް ކުރެއްވި ދަތުރުފުޅެކެވެ.
އައްޑުއަށް ވަޑައިގެން އޭނާވަނީ އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ކްރެޑިޓް ފެސިލިޓީގެ ދަށުން ކުރިއަށްގެންދިޔަ އައްޑޫގެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއު ނިންމައި، ރަސްމީކޮށް ސަރުކާރާ ހަވާލުކޮށްފައެވެ.
މީގެ އިތުރުން އިންޑިއާގެ އެހީގައި ރާއްޖޭގެ އެޖި ރަށްރަށުގައި ކުރިއަށްގެންދިޔަ ފެނާއި ނަރުދަމާގެ 28 މަޝްރޫއެއް ނިންމައި އެކަން ވެސް ވަނީ މި ދަތުރުފުޅުގައި އިފްތިތާހުކޮށްފައެވެ.
މި ދަތުރުފުޅާއެކު ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިވެފައިވާއިރު ޖައިޝަންކަރު ވަނީ ރާއްޖެއަކީ އަވަށްޓެރި ގައުމުތަކަށް ދޭ އިސްކަމުގެ ތެރެއިން ވެސް ޚާއްސަ އިސްކަމެއް ދޭނެ ގައުމެއްކަމަށް ވިދާޅުވެފައެވެ.
ހަމައެއާއެކު ދެ ގައުމުގެ ގުޅުން ވެސް ބިނާވެފައިވަނީ ދެ ގައުމުން ބޭނުންވާ ކަންކަން ފުއްދައިދިނުމުގެ މައްޗަށް ކަމަށް ވެސް ފާހަގަކުރެއްވިއެވެ.
މީގެ އިތުރުން ރައީސް ޑރ. މުޙައްމަދު މުއިއްޒު ވެސް ވިދާޅުވި ގޮތުގައި އިންޑިއާއަކީ ރާއްޖެއަށް އަގުނުކުރެވޭ ވަރުގެ އެކުވެރިއެއް ކަމަށާއި، ރާއްޖެއަށް އެހީތެރިކަން ބޭނުންވާ ކޮންމެ ވަގުތެއްގައި އިންޑިއާގެ އެހީތެރިކަން ލިބެއެވެ.
މިއާއެކު އިދިކޮޅު އެމްޑީޕީން ވެސްވަނީ އިންޑިއާއެކު މިހާރު ބާއްވާ ގުޅުން އެއީ ވަގުތެއް ކަމެއްގެ ގޮތުގައި ނުހަދާނެކަމަށް އުންމީދުކުރާކަމަށް ބުނެފައެވެ.