އަންނަ ނޮވެމްބަރު މަހު ބާއްވާ އެމެރިކާގެ ރިޔާސީ އިންތިޚާބުގައި ވެރިކަންކުރާ ޑިމޮކްރެޓިކް ޕާޓީން ރައީސް ކަމަށް ވާދަކުރައްވާ ކަމަލަ ހެރިސް, ހިޔާލު ހޯދުމުގެ ޕޯލްއަކުން މުހިންމު ތިން ސްޓޭޓަކުން ކުރި ހޯއްދަވައިފިއެވެ.
ހެރިސް ކުރި ހޯއްދަވައިފައި ވަނީ ނިއު ޔޯކު ޓައިމްސްއިން ނެގި ޕޯލެއްގައި އިދިކޮޅު ރިޕަބްލިކް ޕާޓީން ވާދަކުރައްވާ ކެންޑިޑޭޓް ޑޮނަލްޑް ޓްރަމްޕާ ވާދަކުރައްވައެވެ. ކުރި ހޯއްދަވައިފައިވާ ސްޓޭޓްތަކަކީ މިޝިގަން، ޕެންސުލްވޭނިއާ އަދި ވިސްކޮންސިންއެވެ.
އެ ޕޯލް ކުރިއަށްގެންގޮސްފައި ވަނީ މި މަހުގެ ފަހަކާއި ނުވަޔަކާ ދެމެދުއެވެ. ކޮންމެ ސްޓޭޓަކުން ވެސް މަދުވެގެން 600 މީހުން ޕޯލްގައި ވޯޓުލާފައިވެއެވެ.
އާބާދީ ބޮޑު އެ ތިން ސްޓޭޓަކީ ކޮންމެ ޕާޓީއަކަށް ވެސް އިންތިޚާބު ކާމިޔާބު ކުރަން މުހިންމު ތިން ސްޓޭޓެވެ.
މި ޕޯލްގެ ނަތީޖާ އެ ސްޓޭޓްތަކުން މީގެ އެއް އަހަރު ކުރިން ނެގި ޕޯލްތަކުގެ ނަތީޖާއާ ތަފާތެވެ. އެ ޕޯލްތަކުން ނަތީޖާ ދައްކައިފައިވާ ގޮތުގައި ޑިމޮކްރެޓިކް ޕާޓީގެ ފަރާތުން ރައީސް ކަމަށް ކުރިން ވާދަކުރެއްވި، އެމެރިކާގެ ރައީސް ޖޯ ބައިޑަންއާ ޓްރަމްޕް އުޅެނީ ދާދި އެއްވަރެއްގައި ނުވަތަ ޓްރަމްޕަށް ވަނީ ކުރި ލިބިފައެވެ.
އިންތިޚާބު ބާއްވަން ގާތްގަޑަކަށް ތިން މަހަށްވެފައިވާއިރު، އަދި އިތުރު އެތައް ކަމެއް ބަދަލުވާނެ ކަމަށް މަޝްރަހު ދިރާސާކުރާ ފަރާތްތަކުން ބުނެއެވެ. ޕޯލުން ދައްކާ ގޮތުގައި އިގްތިސާދާއި އިމިގްރޭޝަންގެ މުހިންމު މައްސަލަތަކުގައި ގިނަ މީހުންގެ ވޯޓު އަދިވެސް ލިބެނީ ޓްރަމްޕަށެވެ. ނަމަވެސް އެބޯޝަން މައްސަލައިގައި އާންމުންގެ އިތުބާރު އޮތީ ހެރިސްއަށެވެ. އަދި ހެރިސް އަކީ ޓްރަމްޕަށްވުރެ ވިސްތޫނު ވެރިކަން ކުރެއްވުމަށް ގާބިލު ބޭފުޅެއް ކަމަށްވެސް ގިނަ ބަޔަކު ބުނެފައިވެއެވެ.
ހެރިސްގެ ރަނިން މޭޓަކަށް މިނިސޯޓާގެ ގަވަރުނަރު ޓިމް ވޯލްޒް އައްޔަން ކުރުން ވެގެން ދިޔައީސްވެސް ހެރިސް އިންތިޚާބު ކާމިޔާބު ކުރައްވާނެ ކަމަށް ޕާޓީގެ ގިނަ ބަޔަކަށް ގަބޫލު ކުރެވުނު ކަމަކަށެވެ.