ހުޅުމާލޭގައި ބޯކޮށައިދޭ ހަތަރު ތަނެއް ބަންދުކޮށް، އެ ތަންތަނުގައި ގަވާއިދާ ހިލާފަށް މަސައްކަތްކުރަމުން އައި ހަތް ބިދޭސީން އަތުލައިގެންފައިވާ ކަމަށް އިމިގްރޭޝަނުން ރޭ ބުނެފިއެވެ.
ގަވާއިދާ ހިލާފަށް އުޅޭ ބިދޭސީން އަތުލައިގަނެ، އެ މީހުން ގަވާއިދާ ހިލާފަށް ހިންގާ ވިޔަފާރިތައް ހުއްޓުވަން އިމިގްރޭޝަނުން އަންނަނީ ފުޅާ އޮޕަރޭޝަނެއް ކުރިއަށް ގެންދަމުންނެވެ.
އިމިގްރޭޝަނުން ރޭ އެކްސްގައި ކުރި ޕޯސްޓެއްގައި ބުނީ، ހުޅުމާލޭގައި ހިންގާ ބޯކޮށާ ތަންތަނަށް އަމާޒުކޮށްގެން ހިންގި އޮޕަރޭޝަނެއްގައި ހަ ތަނެއް ބަލައި ފާސްކޮށްފައިވާ ކަމަށެވެ. އަދި، އޭގެ ތެރެއިން ހަތަރު ތަނެއް ބަންދުކޮށްފައިވާ ކަމަށް ވެސް އިމިގްރޭޝަނުން ބުންޏެވެ.
އެ ތަންތަނުގައި ގަވާއިދާ ހިލާފަށް މަސައްކަތްކުރަމުން އައި ހަތަރު ބިދޭސީން ވަނީ އަތުލައިގެންފައެވެ.
މީގެ އިތުރުން، އިމިގްރޭޝަނުން އިއްޔެ ވަނީ ކޮފީ/ޓޭކްއެވޭ ފިހާރަތަކަށް ޚާއްސަކޮށްގެން ވެސް އޮޕަރޭޝަނެއް ކުރިއަށް ގެންގޮސްފައެވެ. އެ އޮޕަރޭޝަންގެ ތެރެއިން އިއްޔެ ހަވީރު ހަތް ތަނެއް ބަލައި ފާސްކޮށް، ގަވާއިދާ ހިލާފަށް މަސައްކަތްކުރަމުން އައި ހަތް ބިދޭސީން ވަނީ އަތުލައިގެންފައެވެ.
ގަވާއިދާ ހިލާފަށް މަސައްކަތްކުރަމުން އަންނަ ބިދޭސީން އަތުލައިގަންނަން އިމިގްރޭޝަނުން ކުރިއަށް ގެންދާ ޚާއްސަ އޮޕަރޭޝަންގެ ތެރެއިން މިހާތަނަށް 2،000 އަށްވުރެ ގިނަ ބިދޭސީން ވަނީ ޑީޕޯޓުކޮށްލައިފައެވެ. އަދި، ގިނަ އަދަދެއްގެ މީހުން މިހާރު ވެސް އިމިގްރޭޝަންސްގެ ބެލުމުގެ ދަށުގައި އެބަތިއްބެވެ.
ގަވާއިދާ ހިލާފަށް މަސައްކަތްކޮށްގެން އަތުލައިގެންފައި ތިބި ހުރިހާ ބިދޭސީން ޑީޕޯޓުކުރުމުގެ މަސައްކަތް އިމިގްރޭޝަނުން އަންނަނީ ކުރަމުންނެވެ. އެ މީހުންނަށް ދެވަނަ ފުރުސަތެއް ނުދޭނެ ކަމަށް އިމިގްރޭޝަނުން މީގެ ކުރިން ވަނީ ބުނެފައެވެ.
އިމިގްރޭޝަނުން ވަނީ ގަވާއިދާ ހިލާފަށް އުޅޭ ބިދޭސީންގެ މައްސަލަތައް ރިޕޯޓުކުރަން 'އިމިގްރޭޝަން ވޮޗު'ގެ ނަމުގައި ޕޯޓަލެއް ވެސް ވަނީ ތައާރަފްކޮށްފައެވެ. އެ ޕޯޓަލް މެދުވެރިކޮށް ގަވާއިދާ ހިލާފަށް އުޅޭ ބިދޭސީންނާ ބެހޭ މައުލޫމާތު ކާކުކަން ނޭނގޭ ގޮތަށް ވެސް އިމިގްރޭޝަނާ ހިއްސާކުރެވޭނެއެވެ.
ފާހަގަކޮށްލެވޭ ގޮތުގައި ގަވާއިދާ ހިލާފަށް މަސައްކަތްކުރަމުން އައި ބިދޭސީންތައް ޑީޕޯޓުކުރަން ފެށުމާ އެކު މާރުކޭޓުތަކުގައި ގިނަ އަދަދަކަށް ތިބި ބިދޭސީން ވެސް މަދުވެ، ދިވެހީން ތިބެން ވަނީ ފަށައިފައެވެ.