ގަވާއިދާ ހިލާފަށް ބާރު ސުޕީޑުގައި ދުއްވާފައި ދިޔަ ސްޕޯޓްސް ކާރަކުން ސައިކަލެއްގައި އިން މީހެއްގެ ގައިގައި ޖެހި، ބޮޑެތި އަނިޔާތަކެއް ލިބުނު މައްސަލައިގައި ކާރު ދުއްވަން އިން އިބްރާހީމް އިކްރާމްގެ މައްޗަށް ތިން މަހުގެ ޖަލު ހުކުމެއް އިއްވައި، 70،000 ރުފިޔާއިން މިއަދު ޖޫރިމަނާ ކޮށްފިއެވެ.
މިދިޔަ ޖުލައި މަހުގެ 31ވަނަ ދުވަހު ހުޅުމާލޭ ދެވަނަ ފިޔަވަހީގައި ވިނަރެސް ފްލެޓުތައް ކައިރީ ހިނގި އެކްސިޑެންޓުގައި، އިކްރާމް ދުއްވަންއިން ކާރުން ޖެހި، މަގުގެ އެއް ފަރާތުގައި ހުރި ސައިކަލެއްގައި އިން މީހާ ދިޔައީ ވިއްސައިގެންނެވެ.
އެ ހާދިސާގައި ސައިކަލުގައި އިން މީހާއަށް އެކި ވަރުގެ އަނިޔާތައް ލިބުނުއިރު، އިކްރާމް ހިމެނޭ ގޮތަށް ކާރުގައި ތިބި ތިން މީހުން ފިލިއެވެ. ނަމަވެސް ފުލުހުން ފަހުން އެ ތިން މީހުން ހައްޔަރުކުރިއެވެ. އޭގެ ތެރޭގައި އިކްރާމްގެ އިތުރަށް ހިމެނެނީ ގއ. ކަނޑުހުޅުދޫ، އާޒާދުގެ ޖިނާހު އިސްމާއީލާއި ހ. ނޫރަންމާގެއާގެ، އިކްރާމުއްރަހްމާނެވެ.
މި މައްސަލައިގައި އިކްރާމްގެ މައްޗަށް ހަތަރު ދައުވާއެއްކޮށްފައިވެއެވެ. އެއީ:
- މީހެއްގެ މައްޗަށް އަނިޔާއެއް ދިނުމުގެ ކުށުގެ ދައުވާ
- ފަރުވާލެއް ނެތި ކުރާ އަމަލެއްގެ ސަބަބުން މީހަކަށް އޭނާގެ ހަށިގަނޑަށް ބޮޑު އަނިޔާއެއް ލިބިދާނެ ކަމުގެ ބިރެއް ކުރިމަތި ކުރުވުމުގެ ކުށުގެ ދައުވާ
- އެކްސިޑެންޓުވުމުން އެ ކަމުގެ ރިޕޯޓު ނުކުރުމުގެ ދައުވާ
- އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއްނެތި އެހީތެރިކަން ފޯރުކޮށް ނުދިނުމުގެ ކުށުގެ ދައުވާ
މި ހަތަރު ދައުވާ ވެސް ކޮށްފައިވަނީ ވަކިންނެވެ.
މި މައްސަލައިގައި އިކްރާމްވަނީ ދައުވާއަށް އިއުތިރާފުވެ، ދައުލަތާއެކު އެއްބަސްވުން ހަދައިފައެވެ.
މީގެ ތެރެއިން މީހެއްގެ މައްޗަށް އަނިޔާއެއް ދިނުމުގެ ކުށުގެ ދައުވާގައި ދައުލަތާއެކު އިކްރާމް އެއްބަސްވީ އެއް އަހަރާއި 12 ދުވަހުގެ ޖަލު އަދަބަކަށެވެ. އެހެން ނަމަވެސް އެއްބަސްވުމުގެ ދަށުން އޭނާ ތަންފީޒު ކުރަންޖެހޭ ކަމަށް ކަނޑައަޅާފައިވަނީ ފަސް މަހުގެ ޖަލު އަދަބެކެވެ. އެ އަދަބު އޭނާވަނީ ތަންފީޒުކޮށް ނިންމައިފައެވެ.
ޖަލު އަދަބުން އޮތް ހަތް މަހާއި 12 ދުވަސް ޖުރިމަނާގެ އަދަބަށް ބަދަލުކޮށް، ކްރިމިނަލް ކޯޓުން ވަނީ އިކްރާމް 44،800 ރުފިޔާއިން ޖޫރިމަނާކޮށްފައެވެ.
ފަރުވާލެއް ނެތި ކުރާ އަމަލެއްގެ ސަބަބުން މީހަކަށް އޭނާގެ ހަށިގަނޑަށް ބޮޑު އަނިޔާއެއް ލިބިދާނެ ކަމުގެ ބިރެއް ކުރިމަތި ކުރުވުމުގެ ކުށުގެ ދައުވާގައި ދައުލަތާއެކު އިކްރާމް އެއްބަސްވެފައިވަނީ ހަ މަހާއި ހަ ދުވަހުގެ ޖަލު އަދަބަކަށެވެ.
އެހެން ނަމަވެސް ދައުލަތާއެކު ވެފައިވާ އެއްބަސްވުމުގެ ދަށުން، އޭނާގެ މައްޗަށް ކަނޑައަޅާފައިވަނީ ތިން މަސްދުވަހުގެ ޖަލު އަދަބެކެވެ. ބާކީ، ތިން މަހާއި ހަ ދުވަސް، ޖޫރިމަނާ ކުރުމުގެ އަދަބަކަށް ބަދަލުކޮށް 19،200 ރުފިޔާއިން އޭނާވަނީ ޖޫރިމަނާކޮށްފައެވެ.
ދައުވާއަށް ހުކުމް ކުރުމުގެ ކުރިން އޭނާ ބަންދުގައި ހޭދަކުރި މުއްދަތު އުނިކުރުމުން، ތަންފީޒު ކުރަން ޖެހޭނީ ދެ މަހާއި 17 ދުވަހުގެ ޖަލު އަދަބެކެވެ.
މީގެ އިތުރުން، އެކްސިޑެންޓުވުމުން، އެ ކަމުގެ ރިޕޯޓު ނުކުރުމުގެ ދައުވާގައި އިކްރާމް އެއްބަސްވީ 27 ދުވަހުގެ ޖަލު އަދަބު ޖޫރިމަނާއަށް ބަދަލުކޮށް، 5،400 ރުފިޔާއިން އޭނާ ޖޫރިމަނާ ކުރުމަށެވެ.
އަދި އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއްނެތި އެހީތެރިކަން ފޯރުކޮށް ނުދިނުމުގެ ކުށުގެ ދައުވާގައި، ތިން ދުވަހަށް ޖަލަށްލުމުގެ އަދަބު ޖޫރިމަނާއަށް ބަދަލުކޮށް، 600 ރުފިޔާއިން ޖޫރިމަނާކޮށް، ކްރިމިނަލް ކޯޓުންވަނީ ހުކުމްކޮށްފައެވެ.
އެ ހުކުމުގައި ވަނީ، އެ މައްސަލައިގައި ދެން ދައުވާކޮށްފައިވާ އިކްރާމުއްރަހުމާންގެ ބައެއް އެހެން ގަޒިއްޔާއަކުން ބެލުމަށް ކަނޑައަޅައިފައެވެ.
އެ އެކްސިޑެންޓުގައި އަނިޔާވި 27 އަހަރުގެ ފިރިހެން މީހާއަށް ލިބުނު އަނިޔާތަކުގެ ތެރޭގައި ގައިގެ ތަންތަން މަށައިގެން ގޮސް، މޫނުމަތީގެ ކަށިތައް ބިނދިފައިވުން ހިމެނެއެވެ.