އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން އިސްނަގައިގެން ފަހި ދިރިއުޅުން ކޯޕަރޭޝަން ލިމިޓެޑާ ގުޅިގެން ނުކުޅެދުންތެރިކަން ހުންނަ ފަރާތްތަކަށް ޝާމިލުކުރަނިވި މާހައުލެއްގައި ތަމްރީން އަދި ހުނަރު ދަސްކޮށްދެވޭނެ، "އެމްޕަވަރމަންޓް ހަބް"އެއް ބިނާކުރުމުގެ ފަހުމުނާމާގައި ސޮއިކޮށް މިއަދު އެ މަޝްރޫއު އިފްތިތާހުކޮށްފިއެވެ.
ދިވެހިރާއްޖޭގައި މުޅިން އަލަށް ޚިދުމަތް ދޭންފަށާ 'އެމްޕަވަރމަންޓް ހަބް' އަކީ ނުކުޅެދުންތެރިކަން ހުންނަ މީހުންނަށް ޝާމިލުކުރަނިވި އަދި ބާރުވެރި މުޖުތަމަޢެއް ހޯދުމަށް ޓަކައި އިޖްތިމާޢީ އަދި ޢާއިލީ ތަރައްގީއާ ބެހޭ ވުޒާރާ އިން އިސްނަގައިގެން ފަހިދިރިއުޅުން ކޯޕަރޭޝަން ލިމިޓެޑް އާއި ގުޅިގެން ފަށާ ޚިދުމަތެކެވެ.
މިތަނުގެ ޚިދުމަތް އަމާޒުކުރެވިފައިވަނީ 40-18 އަހަރާއި ދެމެދުގެ އުމުރުފުރާގެ މީހުންނަށެވެ.
އެމްޕަވާމަންޓް ހަބްގެ އަމާޒަކީ ސްކޫލް މަރުހަލާ ފުރިހަމަކުރުމަށްފަހުގައި މުޖުތަމަޢުއަށް ނުކުންނަ ނުކުޅެދުންތެރިކަން ހުންނަ ފަރާތްތަކުގެ ބޭނުންތައް ދެނެގަނެ، އެ ފަރާތްތަކުގެ ހުނަރު ތަރައްޤީކުރުމާއި، މަސައްކަތުގެ ތަޖުރިބާއާއި، އިޤްތިޞާދީ މިނިވަންކަމަށް މަގުފަހިކޮށްދޭ ފުރުޞަތުތައް ހޯދައިދިނުންކަމުގައި އެ ވުޒާރާއިން ވަނީ ފާހަގަކޮށްފައެވެ.
މީގެ އިތުރުން މިނިވަން ކަމާއެކީ، އެފަރާތްތަކަށް މާނަ ހުރިގޮތެއްގައި މުޖުތަމަޢުގައި ބައިވެރިވާނެ ފުރުޞަތުތައް ހޯދައިދިނުމަކީ ވެސް މި ހަބުގެ މުހިއްމު އެއް މަޤްޞަދު ކަމަށް ބުންޏެވެ.
ހަމްދާން ޝަކީލް:"އެމްޕަވަރމަންޓް ހަބް" ޕްރޮޖެކްޓު ލޯންޗުކުރުމުގެ ރަސްމިޔާތުގެ ތެރެއިން-- ފޮޓޯ/ އެފްޑީސީ
ޖުމްލަ 5500 އަކަފޫޓުގެ ޖާގައެއްގައި ހުޅުމާލެ ފޭސް ދޭ ގައި ހުޅުވޭ މި ހަބުން ދޭ ޚިދުމަތުގެ ތެރޭގައި ހޮސްޕިޓަލިޓީ އަދި ކަލިނަރީ ތަމްރީނާއި މަސައްކަތުގެ ތަޖުރިބާ ފޯރުކޮށްދިނުމަށް ޓަކައި އިންކްލޫސިވް ކެފޭއަކާއި، ނުކުޅެދުންތެރިކަން ހުންނަ ފަރާތްތައް އުފައްދާ ތަފާތު ތަކެތި މާކެޓްކޮށް ވިއްކުމަށް ޢާންމުންނަށް ހުޅުވާލެވިފައިވާ ފިހާރައެއް ހިމެނެއެވެ.
މީގެ އިތުރުން ހަބްގެ ހަރަކާތްތަކުގައި ބައިވެރިވާ ފަރާތްތަކުގެ ޝައުޤުވެރިކަމާ ގުޅުންހުރި އަދި ހުނަރު ތަރައްޤީ ކުރުމަށް ތަފާތު ޕްރޮގްރާމްތައް ހިންގުމަށް ހަބްގައި ތިން ވޯކްޝޮޕް ޖާގައެއްގެ އިތުރުން، ކޮމްޕިއުޓަރާއި އިންފޮމޭޝަން ޓެކްނޮލޮޖީގެ ތަމްރީން ދޭ ތަނެއް ހިމެނޭކަމަށާއި ހަބްގައި އިޖްތިމާޢީ ގުޅުން ބަދަހި ކުރުމަށް ތަފާތު ހަރަކާތްތައް ހިންގުމަށް އެކްޓިވިޓީ ރޫމަކާއި، މަލްޓި މީޑިއާ ރޫމް އެއް ހުންނާނެކަން ވަނީ ފާހަގަކޮށްފައެވެ.
"އެމްޕަވަރމަންޓް ހަބް" ޕްރޮޖެކްޓު ލޯންޗުކުރުމުގެ ރަސްމިޔާތުގެ ތެރެއިން-- ފޮޓޯ/ އެފްޑީސީ
މިނިސްޓްރީން ބުނީ އަމާޒަކީ މި އަހަރުގެ ތެރޭގައި ތަން ހުޅުވުން ކަމަށެވެ.
އެމްޕަވަރމަންޓް ހަބްގެ ކާމިޔާބު ގުޅިފައިވަނީ މަދަނީ ޖަމިއްޔާތަކާއި، ނުކުޅެދުންތެރިކަން ހުންނަ ފަރާތްތަކަށް ޚިދްމަތްދޭ ތަންތަނާއި ނުކުޅެދުންތެރިކަން ހުންނަ ފަރާތްތަކުގެ ބައިވެރިވުމާއި އެއްބާރުލުމަށްކަމަށާއި ކުރިއަށް އޮތްތަނުގައި މި ޕްރޮޖެކްޓާ ބެހޭ މަޝްވަރާތަކާއި މަޢުލޫމާތު ދިނުމުގެ ސެޝަންތައް ކުރިއަށް ގެންދާނެކަމަށް ޢާއިލީ ތަރައްޤީއާ ބެހޭ ވުޒާރާއިން ވަނީ ބުނެފައެވެ.