ސިއްހީ ކަންކަމަށް 300 މިލިއަނެއްހާ ރުފިޔާ އެސްޓީއޯއަށް ދައްކަންޖެހޭ: ޚަލީލު

ހެލްތު މިނިސްޓަރު ޑރ. އަބްދުﷲ ޚަލީލް މަޖިލީހުގެ މިއަދުގެ ޖަލްސާގައި ޖަވާބުދާރީވެވަޑައިގަންނަވަނީ: ޚަލީލް ވިދާޅުވީ ސިއްހީ ކަންކަމަށް 300 މިލިއަނެއްހާ ރުފިޔާ އެސްޓީއޯއަށް ދައްކަންޖެހޭ ކަމަށް -- ފޮޓޯ/ މަޖިލިސް

މި ސަރުކާރުން ވެރިކަމާ ހަވާލުވިއިރު، ސިއްހީ ދާއިރާގެ އެކި ކަންކަމަށް ސްޓޭޓް ޓްރޭޑް އޮގަނައިޒޭޝަން (އެސްޓީއޯ) އަށް ނުދައްކާ 300 މިލިއަން ރުފިޔާ އޮތް ކަމަށް ހެލްތު މިނިސްޓަރު ޑރ. އަބްދުﷲ ޚަލީލް މިއަދު ވިދާޅުވެއްޖެއެވެ.

މިނިސްޓަރު މިފަދައިން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާއަށް ހާޒިރުވެވަޑައިގެން މެންބަރުން ކުރެއްވި ސުވާލުތަކަށް ޖަވާބުދެއްވައެވެ.

ޖަލްސާގައި ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު ވަނީ ހޮސްޕިޓަލުތަކާއި ސިއްހީ މަރުކަޒުތަކަށް ބޭނުންވާ ކޮންޒިއުމަބަލްސް ލިބުމުގައިވާ ދަތިތައް ހައްލުކުރަން ކުރާ މަސައްކަތާ ގުޅޭގޮތުން ސުވާލުކުރައްވާފައެވެ.

އެ ސުވާލުގެ ޖަވާބުގައި މިނިސްޓަރު ވިދާޅުވީ، ކޮންސިއުމަބަލްސް ހުސްވުމަކީ އަބަދުވެސް ދިމާވާކަމެއް ކަމަށެވެ. އެހެންނަމަވެސް މެދުނުކެނޑި ކޮންސިއުމަބަލްސް ލިބޭނެ ގޮތެއް ހެދުމަށްޓަކައި މިހާރު ވެސް އެސްޓީއޯއާއެކު މަސައްކަތްތަކެއް ކުރަމުން އަންނަ ކަމަށް ޚަލީލް ވިދާޅުވިއެވެ.

އޭނާ ވިދާޅުވީ ހެލްތު މިނިސްޓްރީއާ ހަވާލުވިއިރު އެސްޓީއޯއަށް 300 މިލިއަނެއްހާ ރުފިޔާ ދައްކަންޖެހިފަ އޮތް ކަމަށެވެ. އެހެންނަމަވެސް ބޮޑުބައެއް މިހާރު ދައްކާފައިވާ ކަމަށް ޚަލީލް ވިދާޅުވިއެވެ. ނަމަވެސް ދެއްކި އަދަދުތަކުގެ ތަފްސީލެއް ހާމައެއް ނުކުރައްވައެވެ.

އަޅުގަނޑުމެން ސަރުކާރާ ހަވާލުވިއިރުގައި އެސްޓީއޯއަށް ދައްކަންޖެހޭ ގާތްގަނޑަކަށް 300އެއްހާ މިލިއަން ރުފިޔާ އޮތް. އެއީ ކޮންސިއުމަބަލްސް، ރިއެޖެންސްޓްސް އަދިވެސް އެހެން ސިއްހީ ދާއިރާއާ ގުޅުންހުރި ބައެއް ޚަރަދުތަކުގެ. އެހެންނަމަވެސް މިހާރު ބޮޑުބައެއް ދައްކައިފިން، ހެލްތު މިނިސްޓަރު ޑރ. އަބްދުﷲ ޚަލީލް

ޚަލީލް ވިދާޅުވީ އެ ފައިސާ ދެއްކުމުގެ ސަބަބުން ވެސް އެސްޓީއޯއިން ފޮރުކޮށްދޭ ކޮންސިއުމަބަލްސް ފޮރުކޮށްދޭން މިހާރު ފަސޭހަވާނެ ކަމަށެވެ.

ހަމައެއާއެކު އެކަމަށް ހައްލެއް ހޯދުމުގެ ގޮތުން ޚާއްސަ ސޮފްޓްވެއާއެއް ޑެވަލޮޕް ކުރަމުން އަންނަ ކަމަށް ވެސް ޚަލީލް ވިދާޅުވިއެވެ. އެ ސޮފްޓްވެއާގެ ސަބަބުން ހޮސްޕިޓަލްތަކާއި ސިއްހީ ޚިދުމަތްދޭ ތަންތަނަށް މަދުވަނީ ކޮން އެއްޗެއްތޯއާއި ނެތީ ކޮން އެއްޗެއްތޯ ދެނެގަނެވޭނެ ކަމަށް ޚަލީލް ވިދާޅުވިއެވެ.

އޭރުން އެކަމަށް ވެސް ހައްލެއް ލިބި، ފޯރުކޮށްދޭންޖެހޭ ކޮންސިއުމަބަލްސް ފޯރުކޮށްދޭން ފަސޭހަވާނެ ކަމަށް ޚަލީލް ފާހަގަކުރެއްވިއެވެ.

ފާހަގަކޮށްލެވޭ ގޮތުގައި މި ފަހުން ސަރުކާރުން ވަނީ ރާއްޖެ އެތެރެ ކުރާ ބޭހުގެ ފެންވަރު ރަނގަޅުކުރުމަށްޓަކައި އެސްޓީއޯއާ ޔޫއެންޑީޕީ ގުޅިގެން ޚާއްސަ ބަލްކް ޕްރޮކިއުމަންޓް ސިޔާސަތެއް ވެސް ފަށާފައެވެ. އެއާއެކު ރާއްޖެއަށް ޔޫރަޕު ކޮލިޓީގެ ބޭސް އެތެރެ ކުރަން ވަނީ ފަށައިފައެވެ.

comment ކޮމެންޓް