ރާއްޖޭގެ ރަށްރަށުގެ ތަރައްގީއާ އެއްވަރަށް ކަރަންޓުގެ ޚިދުމަތް ތަރައްގީވެފައި ނެތް ކަމަށް އެންވަޔަރަމެންޓް މިނިސްޓަރު ޠާރިޤު އިބްރާހީމް މިރޭ ވިދާޅުވެއްޖެއެވެ.
"އަސްލު ޓީވީ"ގެ ޕްރޮގްރާމެއްގައި މިނިސްޓަރު ވިދާޅުވީ މި ސަރުކާރުން ވެރިކަމާ ހަވާލުވީއިރު، ރަށްރަށުގެ ކަރަންޓު ވިއުގަ ތަރައްގީކުރުމަށް ޓަކައި ކުރަން ޖެހޭ ވަރަށް ގިނަ ކަންކަން ހުރީ ނުކޮށް ކަމަށެވެ.
ރަށްރަށުގެ ތަރައްގީވަމުންދާއިރު، އެ ތަރައްގީއާ އެއްވަރަށް ޕަވަސިސްޓަމްތައް ޑިވަލޮޕްނުވެ ހުރީ. މާލޭގައި ވެސް އެ ހާލުގައި މި އޮތީ. މިދިޔަ ފަސް އަހަރު ކޮން ކަމެއްތޯ ކުރީ ސިސްޓަމް ޑިވެލޮޕް ކުރަން. އެއްކަމެއް ވެސް ނުކުރޭ
އަތޮޅު ތެރޭގެ ބައެއް ރަށްތަކުގައި ކަރަންޓުގެ ޚިދުމަތުގެ ހާލަތު ގޯސްވެ، ކަރަންޓު ކަނޑަން ވެސް ޖެހެއެވެ. މިދިޔަ ސަރުކާރުގައި ކަރަންޓު ދިނުމަށް ބޭނުންކުރާ ޖެނަރޭޓަރުތައް މެއިންޓެއިން ނުކުރެވިގެން ވެސް ރައްޔިތުންނަށް ދަތިތައް ދިމާވިކަން މިނިސްޓަރުގެ ވާހަކައިގައި ފާހަގަ ކުރެއްވިއެވެ.
ރާއްޖެއަށް ބޭނުންވާ ތެޔޮ އެތެރެ ކުރުމަށް އަހަރެއްގެ މައްޗަށް 500 މިލިއަނާއި 700 މިލިއަނާއި ދެމެދުގެ އަދަދަކަށް ސަރުކާރުން ޑޮލަރު ހޭދަކުރެއެވެ. ތެލަށް ކުރާ ޚަރަދު ކުޑަކުރުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުވަނީ މި ފަސް އަހަރުގެ ތެރޭގައި ރާއްޖޭގައި ބޭނުންކުރާ ކަރަންޓުގެ 33 އިންސައްތައަކީ އިޔާދަކުރަނިވި ހަކަތައިގެ ގޮތުގައި ހެދުމަށް ނިންމަވާފައެވެ.
މި މަސައްކަތުގެ ދަށުން ގިނަ ރަށްތަކެއްގައި ސޯލާ ޕީވީ ހަރުކުރުމަށް ވަނީ ނިންމާފައެވެ. އެ ގޮތުން އޭޝިއަން ޑިވަލޮޕްމެންޓް ބޭންކާއި އެކު 75 މިލިއަން ޑޮލަރުގެ އެއްބަސްވުމަކާއި އަދި ވޯލްޑް ބޭންކުގެ އިތުރުން އޭޑީބީގެ އެހީގައި ވެސް ގިނަ ރަށްތަކެއްގައި އިޔާދަކުރަނިވި ހަކަތައިގެ އެއްބަސްވުންތަކެއް ހެދިފައިވާކަން މިނިސްޓަރުގެ ވާހަކައިގައި ފާހަގަ ކުރެއްވިއެވެ. އަދި މި ސަރުކާރުން އައްޑޫގައި ފެށުމަށް ނިންމާފައިވާ ފްލޯޓިން ސޯލާ ޕްރޮޖެކްޓު ވެސް ކުރިޔަށް އޮތް ހަތަރު މަހެއްގެ ތެރޭގައި ޓެންޑާއަށް ހުޅުވާލާނެ ކަމަށް މިނިސްޓަރު ވިދާޅުވިއެވެ.
ހަމަ މި މަސައްކަތުގެ ތެރެއިން "ޕޮއިސްޑް" ޕްރޮޖެކްޓްގެ ދަށުން ފެނަކައިން ޚިދުމަތްދޭ އެންމެ ބޮޑު ހަ ސަރަހައްދުގައި ވެސް ސޯލާ ހަރުކުރުމަށް ވަނީ ނިންމާފައެވެ. އެއީ އައްޑޫ ސިޓީ، ތިނަދޫ ސިޓީ، ފުވައްމުލަކު ސިޓީ، ޅ. ހިންނަވަރު އަދި ބ. އޭދަފުށީގެ އިތުރުން ކުޅުދުއްފުށި ސިޓީއެވެ. މިރަށްތަކުގައި ޖުމްލަ 11 މެގަ ވޮޓްގެ ސޯލާ ހަރުކުރުމަށްވަނީ ނިންމައިފައެވެ.
މި ވެރިކަމުގެ ތެރޭގައި ރާއްޖޭގައި ބޭނުންކުރާ ކަރަންޓުގެ 33 އިންސައްތައަކީ އިޔާދަކުރަނިވި ހަކަތައިގެ ގޮތުގައި ހެދުމަށް ރައީސް ނިންމެވިއިރު، ރާއްޖޭގައި މިހާރު ބޭނުންކުރާ ކަރަންޓުގެ ތެރެއިން އިޔާދަކުރަނިވި ހަކަތައަކީ ހަތަރު އިންސައްތައެވެ.