މި ސަރުކާރުން ރާވައިގެން ސިޔާސީ ނިޒާމަށް މީހުން ފޫހިކުރުވާ ކަމަށާއި އޭގެ ބޭނުމަކީ ނާޖާއިޒު ފައިދާތަކެއް ނެގުން ކަމަށް ގަލޮޅު ދެކުނު ދާއިރާގެ، އެމްޑީޕީގެ މެންބަރު މީކާއީލް ނަސީމް ވިދާޅުވެއްޖެއެވެ.
އެމްޑީޕީއިން ދަނޑިކޮށީގައި "ކުރީ ސަރުކާރު"ގެ ނަމުގައި ބޭއްވި ހަރުގެ ޖަލްސާގައި މީކާއީލް ވިދާޅުވީ ވެރިކަން ކުރާ ޕީއެންސީއަށް ވުރެ، ސިޔާސީ މަޝްރަހުގައި އެހާ ފާޅުކަން ބޮޑު ގޮތެއްގައި ދޮގު ހަދާ ޕާޓީއެއް ނުފެންނަ ކަމަށެވެ. އެގޮތުން ސިޔާސީ ކަޅާ ހުދުން، ސާފުކޮށް ފެންނަ ކަންކަމާ މެދު ޕީއެންސީން ދޮގު ހަދަމުން އަންނަ ކަމަށް އޭނާ ވިދާޅުވިއެވެ.
"އަޅުގަނޑަށް ފެންނަނީ މި ދޮގު ހެދުން ރާއްޖޭގެ ސިޔާސީ މަޝްރަހުގައި އާންމުވެގެން ދަނީ ބަޔަކު އާންމުކުރާތީ. އެއީ ދިވެހިރާއްޖޭގެ ރައްޔިތުން މި ސިޔާސީ މަޝްރަހާއި، ސިޔާސީ ޕާޓީތަކާއި، މި ސިޔާސީ ނިޒާމަށް ފޫހިކޮށްލުމަށް ކުރާ ކަމެއް،" މީކާއިލް ވިދާޅުވިއެވެ.
މީކާއިލް އިތުރަށް ވިދާޅުވީ ރައްޔިތުން ސިޔާސީ ނިޒާމަށް ފޫހިވާ މިންވަރަކަށް ސަރުކާރަށް ވައްކަންކުރުމުގެ ފުރުސަތު ފަސޭހަވާ ކަމަށާއި އޭގެ މަގުސަދަކީ ވެސް އެއީ ކަމަށެވެ.
އޭނާ ވިދާޅުވީ މި ސަރުކާރުން ދައްކާ ވާހަކަ އާއި އަމަލުން ދައްކާ ކަންތައްތައް ދިމާނުވާ ކަމަށެވެ. އަދި ރައްޔިތުންގެ މަޖިލީހުގެ ޕީއެންސީ މެންބަރުން މިހާރު ޚިދުމަތް ކުރަނީ ރައްޔިތުންނަށް ނޫން ކަމަށާއި، މެންބަރުން ޚިދުމަތް ކުރައްވަނީ ރައީސް ޑރ. މުޙައްމަދު މުއިއްޒަށް އެކަނި ކަމަށް މީކާއީލް ވިދާޅުވިއެވެ.
"އެބޭފުޅުން ޚިދުމަތްކުރަނީ ލިބިވަޑައިގަންނަވާ 82،500 ރުފިޔާގެ އިތުރަށް 50،000 ރުފިޔާ އިތުރަށް މުލިއާގެއިން ދެއްވާ ބޭފުޅާއަށް. އެބޭފުޅުންގެ އަމާޒު ހިފައިފައި ވަނީ އެބޭފުޅާގެ ވެރިކަން ދާއިމަށް ރާއްޖޭގައި ދެމިގެން ދާނޭ ގޮތަކަށް އިންތިޒާމު ކުރުން،" އޭނާ ވިދާޅުވިއެވެ.
ރައްޔިތުންގެ މަޖިލީހުގައި ޕީއެންސީ މެންބަރުންގެ އަޑުމަޑުކުރަން މުލީއާގެއިން 50،000 ރުފިޔާ ދޭކަމަށް އެމްޑީޕީން މީގެ ކުރިން ވެސް ތުހުމަތުކޮށްފައިވެއެވެ. ނަމަވެސް ސަރުކާރުން ވަނީ އެ ތުހުމަތު ދޮގުކޮށްފައެވެ.