ފަހި ދިރިއުޅުން ކޯޕަރޭޝަން (އެފްޑީސީ)ން ހުޅުމާލޭ ދެވަނަ ފިޔަވަހީގައި އިމާރާތްކުރާ 4،000 ފުލެޓުގެ ތެރެއިން 100 ފުލެޓު މޯލްޑިވްސް ކަސްޓަމްސް ސާވިސްއަށް ދޫކުރާނީ ގާނޫނީ ލަފާ ހޯދާފައި ކަމަށް ހައުސިން މިނިސްޓަރު ޑރ. އަލީ ހައިދަރު އަހުމަދު މިއަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ޕެޓިޝަން ކޮމިޓީއަށް ހާޒިރުވެވަޑައިގެން މެންބަރުން ކުރެއްވި ސުވާލުތަކަށް ޖަވާބުދެއްވައި އިއްޔެ ހައިދަރު ވަނީ އެ 4،000 ފްލެޓުގެ ތެރޭގައި ކަސްޓަމްސްއަށް 100 ފުލެޓު ދިނުމަށް އޮތް ކަމެއް މިހާތަނަށް ފާހަގަކުރެވިފައި ނުވާ ކަމަށް ވިދާޅުވެފައެވެ.
ނަމަވެސް "ސަން"އާ ވާހަކަދައްކަވަމުން ހައިދަރު މިއަދު ވިދާޅުވީ، އިއްޔެ ކޮމިޓީގައި އެފަދައިން ވިދާޅުވި ފަހުން، ޗެކްކޮށް ބެލިއިރު މިދިޔަ ސަރުކާރުން އެ 4،000 ފުލެޓުގެ ތެރޭގައި ކަސްޓަމްސްއަސް 100 ފުލެޓު ދޭން ހިމަނާފައިވާކަން އެނގުނު ކަމަށެވެ.
އެކަމުގައި ގާނޫނީ މައްސަލައެއް އުޅޭކަން ފާހަގަކުރައްވައި މިނިސްޓަރު ހައިދަރު ވިދާޅުވީ، މިނިސްޓްރީން ކަސްޓަމްސްއަށް އެ 100 ފުލެޓު ދޫކުރާނީ އެކަމަށް ގާނޫނީ ލަފާ ހޯދުމަށް ފަހު ކަމަށެވެ.
ހައުސިން މިނިސްޓްރީން މިއަދު ވަނީ، އެކަމާ ގުޅިގެން ކަސްޓަމްސްއާއެކު ވެސް މަޝްވަރާ ބައްދަލުވުމެއް ބާއްވާފައެވެ.
މިނިސްޓްރީން އެކްސްގައި ކުރި ޕޯސްޓެއްގައި ބުނެފައި ވަނީ އެ 4،000 ހައުސިން ޔުނިޓުގެ ތެރެއިން ކަސްޓަމްސްއަށް ކަނޑައެޅިފައިވާ 100 ހައުސިން ޔުނިޓާ ގުޅޭގޮތުން ބައްދަލުވުމުގައި މަޝްވަރާތައްކޮށްފައިވާ ކަމަށެވެ. އަދި އިތުރަށް ކަސްޓަމްސް މުވައްޒަފުންނަށް އޮތް ބޯހިޔާވަހިކަމުގެ ފުރުސަތުތަކާ ބެހޭ ގޮތުން ވެސް މަޝްވަރާކުރި ކަމަށް ބުނެފައިވެއެވެ.
މިކަމާ ގުޅިގެން "ސަން" އަށް މައުލޫމާތުދެމުން ކަސްޓަމްސްގެ މީޑިއާ އޮފިޝަލަކު ވިދާޅުވީ، އެ ބައްދަލުކުރެއްވުމުގައި މިނިސްޓްރީން އެ 100 ފުލެޓު ކަސްޓަމްސްއަށް ދޭނެ ކަމަށް ބުނެފައިވާ ކަމަށެވެ. އެހެންނަމަވެސް ފުލެޓް ދޭނީ ކޮންތަނަކުން ކަމެއް މިނިސްޓްރީން ކަނޑައަޅާފައިނުވާ ކަމަށް އޭނާ ވިދާޅުވިއެވެ.
އިއްޔެ ޕެޓިޝަން ކޮމިޓީގައި ހައިދަރު ވިދާޅުވީ، ފުލެޓު ލިސްޓު އުވާލަން ގަސްތުނުކުރައްވާ ކަމަށާއި ރީ-އިވެލުއޭޓްކޮށްގެން ކުރިއަށް ގެންދާނެ ކަމަށެވެ. އަދި، އެ ފުލެޓުތައް އޮކްޓޯބަރު މަހުގެ ނިޔަލަށް އިމާރާތްކޮށް ނިމެންވާއިރަށް ފުލެޓު ލިބޭ މީހުންގެ ލިސްޓު ރިވިއުކޮށް ނިމޭނެ ކަމަށް ވެސް އޭނާ ވިދާޅުވިއެވެ.
ހަމައެއާއެކު ފުލެޓުތައް ދިނުމުގައި މީހުންގެ ދިރިއުޅުމުގެ ހާލަތައް ބަލައި ވަޒަންކުރާނެ ކަމަށާއި އެކަން ކުރާނީ ލިބެން ހުރި ހެކިތަކަށް ބަލައި، ރަސްމީ ލިޔެކިޔުންތައް ވެސް ބެލުމަށް ފަހު ކަމަށް ހައިދަރު ވިދާޅުވިއެވެ.
އަދި ފުލެޓުތައް އިމާރަތްކޮށް ނިމޭއިރު ފައިނަލް ލިސްޓެއް ތައްޔާރުކުރެވޭ ވަރަށް މަސައްކަތްކުރަމުން އަންނަކަން ފާހަގަކުރައްވައި ހައިދަރު ވިދާޅުވީ ފުލެޓުތައް ހަދާ ނިމޭއިރު ހުހަށް ނުހުންނާނެ ކަމަށެވެ.
މި 4،000 ފުލެޓަކީ ނިމިދިޔަ ސަރުކާރުން އިއުލާނުކުރި ގެދޮރުވެރިޔާ މަޝްރޫއުގެ ދަށުން، ފުރަތަމަ ފުލެޓު ލިބޭ މީހުންނަށް ދޭނެ ތަންތަނެވެ.
ފުލެޓުތައް ދޫކުރުމުގައި މައްސަލަ އުޅޭ ކަމަށް ބުނެ، އެންޓި ކޮރަޕްޝަން ކޮމިޝަން (އޭސީސީ)ން ފެށި ޖިނާއީ ތަހުގީގާ ގުޅިގެން ގިނަ ދުވަސްތަކެއް ވަންދެން ފުލެޓު ދޫކުރުން މަޑު ޖެހިފައި އޮތުމަށް ފަހު ފެބްރުއަރީ މަހު އޭސީސީން ވަނީ ބައެއް ކަންތައްތަކަށް ރިއާޔަތްކުރުމަށް ފަހު ފުލެޓު ދޫކުރުމުގެ މަސައްކަތް ކުރިއަށް ގެންދަން ހުއްދަ ދީފައެވެ.