ޖުމުލަ ހަތަރު ގައުމެއްގެ މީހުން ވެގެން މެލޭޝިއާ މީހަކު ލައްވައި ދިވެހިރާއްޖެއަށް އެތެރެކުރި 15.38 ކިލޯގްރާމް ނުވަތަ މަގުމަތީ އަގުން ނަމަ 12.3 މިލިއަން ރުފިޔާގެ މަސްތުވާތަކެތި ފުލުހުންނާއި ކަސްޓަމްސް ގުޅިގެން އަތުލައިގެންފިއެވެ.
މި ހާދިސާ ހިނގާފައިވަނީ މިދިޔަ ހޮނިހިރު ދުވަހުއެވެ.
މި މައްސަލައާ ގުޅިގެން މިއަދު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ކަސްޓަމްސްގެ ސްޕްރިންޓެންޑެންޓް މުހައްމަދު އަފްޒަލް ވިދާޅުވީ، 12.3 މިލިއަން ރުފިޔާގެ މަސްތުވާތަކެއްޗާ އެކު އަތުލައިގެންފައިވަނީ މެލޭޝިއާއަށް ނިސްބަތްވާ މީހެއް ކަމަށެވެ.
މިއީ މެލޭޝިއާ މީހަކު ރާއްޖެއަށް މަސްތުވާތަކެތި އެތެރެކުރަން އުޅެނިކޮށް އަތުލައިގެން ފުރަތަމަ ފަހަރު ކަމަށް އޭނާ ވިދާޅުވިއެވެ. މިއީ ބަރުދަނުގެ ގޮތުން ބަލާއިރު މި އަހަރު މިހާތަނަށް އަތުލައިގެން އެންމެ ބޮޑު އަދަދެއްގެ މަސްތުވާތަކެއްޗެވެ.
މި މައްސަލައިގައި ޖުމުލަ ހަތަރު ގައުމެއްގެ މީހުންގެ ބައިވެރިވުން އޮތް ކަމަށް ފުލުހުން ތުހުމަތުކުރެއެެވެ.
ފުލުހުންނާއި ކަސްޓަމްސްއިން ބޭއްވި ނޫސްވެރިންގެ ބައްދަލުވުމުގައި އަފްޒަލް: މިދިޔަ ހޮނިހިރު ދުވަހު މެލޭޝިއާ މީހެއްގެ އަތުން 12.3 މިލިއަން ރުފިޔާގެ ޑުރަގު އަތުލައިގަތް ކަމަށް ވިދާޅުވި -- ސަން ފޮޓޯ/ މޫސާ ނަދީމް
އަފްޒަލް ވިދާޅުވީ، އެ މީހާ ދަތުރުކުރި މަގު ކަސްޓަމްސްއަށް އޮޅުވާލަން މަސައްކަތްކޮށްފައިވާ ކަމަށެވެ. އެ ގޮތުން، އެ މީހާ ބަލައި ފާސްކުރުމުގެ ތެރޭގައި އެ މީހާގެ އަތުން ފޭކް ޓިކެޓުތަކެއް ވެސް ފެނިފައިވާ ކަމަށް އޭނާ ވިދާޅުވިއެވެ.
"ކަސްޓަމްސްއިން މީނާ ބަލައި ފާސްކުރުމުގެ ތެރޭގައި މީނާގެ އަތުން ފޭކް ޓިކެޓް ވަނީ ފެނިފައި. މީނާ ރާއްޖެ އައިސްފައިވަނީ ބެންކޮކުން ދުބާއީއަށް ގޮސް، ދުބާއީން މާލެއަށް،" އޭނާ ވިދާޅުވިއެވެ.
މި މައްސަލައާ ގުޅިގެން ފުލުހުން ބުނީ، މި މައްސަލައިގައި ހިމެނޭ އިތުރު މެލޭޝިއާ މީހަކު މިދިޔަ ހޮނިހިރު ދުވަހު އަތުލައިގެންފައިވާ ކަމަށެވެ. އެއީ، 41 އަހަރުގެ ފިރިހެނެކެވެ.
ދެ މީހުންގެ ބަންދަށް ވެސް ކްރިމިނަލް ކޯޓުން ވަނީ ފަސް ދުވަސް ޖަހައިފައެވެ.
ފުލުހުން ބުނީ، މި މައްސަލައިގެ ތަހުގީގު މިހާރު ވެސް ކުރިއަށްދާ ކަމަށާއި މި މައްސަލައިގައި ހިމެނޭ އިތުރު ބަޔަކު އަދިވެސް އެބަތިބި ކަމަށް ގަބޫލުކުރެވޭ ކަމަށެވެ. އެ ގޮތުން، ބޭރުގެ އިދާރާތަކާ ގުޅިގެން ތަހުގީގުކުރަމުން އަންނަ ކަމަށް ފުލުހުން ބުންޏެވެ.
ފުލުހުން މީގެ ކުރިން ހާމަކުރި ގޮތުގައި މި އަހަރުގެ ފުރަތަމަ ހަ މަސް ދުވަހުގެ ތެރޭގައި އެކަނި ވެސް 143 މިލިއަން ރުފިޔާގެ މަސްތުވާތަކެއްޗާއި ބަނގުރާ ވަނީ އަތުލައިގެންފައެވެ.
ފުލުހުން އަތުލައިފައިވާ ތަކެތީގެ ތެރޭގައި:
- ބަނގުރާ ފުޅި/ ދަޅު - 6،200
- ވޭޕް އަދި ކާޓްރިޖް - 95
- އެލްއެސްޑީ އަދި އެހެނިހެން ޕާޓީ ޑުރަގު - 40
- މަނާ ބޭސް - 982
- ދިވެހި ފައިސާ - 2،572،069
- ޑޮލަރު - 13،909
- ޔޫރޯ - 145
- ޓީ ކުރި ވެހިކަލް - 27
މީގެ އިތުރުން ފުލުހުން ބުނީ، މި އަހަރުގެ ފުރަތަމަ ހަ މަސް ތެރޭގައި މަސްތުވާތަކެތީގެ އެކި މައްސަލަތަކުގައި 116 ބިދޭސީން ޑީޕޯޓް ކޮށްފައިވާ ކަމަށެވެ.