މާލޭގައި ހުންނަ ސަލްމާން މިސްކިތުން ދަބަހެއް ވަގަށް ނެގި މީހަކު ހައްޔަރުކޮށްފިއެވެ.
އެ މިމައްސަލައިގައި ހައްޔަރުކޮށްފައިވަނީ ޏ. ފުވައްމުލަކަށް ނިސްބަތްވާ އުމުރުން 42 އަހަރުގެ ދިވެހި ފިރިހެނެކެވެ.
އެ މީހާ އިއްޔެ ކްރިމިނަލް ކޯޓަށް ހާޒިރުކުރުމުން ކޯޓުން ވަނީ އޭނާގެ ބަންދަށް 10 ދުވަސް ޖަހައިފައެވެ.
ކްރިމިނަލް ކޯޓުގެ އަމުރުގައި ވަނީ އޭނާ ހައްޔަރުކުރީ ސަލްމާން މިސްކިތަށް ނަމާދަށް އެރި މީހެއްގެ ދަބަސް ވަގަށް ނެގުމުގެ ތުހުމަތުގައި ކަމަށެވެ.
ކޯޓު އަމުރުގައި ވަނީ، ވަގަށް ނެގި ކަމަށް ބެލެވޭ ދަބަސް އަޅުވައިގެން ސަލްމާން މިސްކިތް ސަރަހައްދުން އޭނާ ނުކުންނަ މަންޒަރު ސީސީޓީވީ ފުޓޭޖުން ފެންނަ ކަމަށް އިންވެސްޓިގޭޓިން އޮފިސާ (އައިއޯ) ފާހަގަކުރައްވާފައިވާ ކަމަށެވެ.
އެ އަމުރުގައިވާ ގޮތުން، އެ މީހާ ތުހުމަތު ކުރެވޭ ކުށް ކުރި ކަމަށް އެކަށީގެންވާ ވަރަށް ހެކި ހުށަހަޅާފައިވެއެވެ.
އެމީހާއަކީ އެ ބާވަތުގެ ކުށުގެ ރެކޯޑު އޮތް މީހެއްކަމަށް ވެެސް އެ ކޯޓު އަމުރުގައިވެއެވެ.
މީގެ ކުރިން ވެސް މާލޭގެ މިސްކިތްތަކުން ވައްކަން ކުރުމުގެ މައްސަލަތައް ފެންމަތިވެފައިވެއެވެ. އެގޮތުން މީހުން ގެންދާ ތަކެތީގެ އިތުރުން މިސްކިތުގައި ހުންނަ ފަންކާ ފަދަ ތަކެތި ވެސް ވަގަށް ނަގައިފައިވެއެވެ.
އެފަދަ އަމަލުތައް ހުއްޓުވުމަށް ޓަކައި މާލޭ ސިޓީ ކައުންސިލުން ވަނީ މިސްކިތްތަކުގައި ކެމެރާވެސް ހަރުކޮށްފައެވެ.