މާފަންނު ހަނދުވަރީ ހިނގުމުގައި ހުންނަ އީދު މިސްކިތުން ވައްކަން ކުރި މައްސަލާގައި މީހަކު ހައްޔަރުކޮށްފިއެވެ.
އީދު މިސްކިތުން މި މަހު އެކަނި ވެސް 10 ފަންކާ ވަގަށް ގެންގޮސްފައިވާ ކަމަށް މާލޭ ސިޓީ ކައުންސިލުން ވަނީ ބުނެފައެވެ. އެ ކައުންސިލުން ވަނީ އެ ވައްކަން ކުރާ ވީޑިއޯ ފްޓޭޖާއެކު އެ މައްސަލަ ޕޮލިހަށް ހުށަހަޅައިފައެވެ.
ފުލުހުންގެ މީޑިއާ އޮފިޝަލް މިއަދު ވިދާޅުވީ އީދު މިސްކިތުން ވައްކަން ކުރާ މައްސަލާގައި 41 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ.
އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ގެންދިއުމުން 15 ދުވަހުގެ މުއްދަތަކަށް ބަންދު ކުރަން އަމުރު ކޮށްފައިވާ ކަމަށްވެސް އޮފިޝަލް ވިދާޅުވިއެވެ.
"މި މައްސަލަ ފުލުހުން ދަނީ ތަހުގީގު ކުރަމުން،" އޮފިޝަލް ވިދާޅުވިއެވެ.
މާލޭ މިސްކިތްތަނުން ވައްކަން ކުރުން ވަނީ ވަރަށް އިތުރުވެފައެވެ. އެގޮތުން މިއަހަރުގެ މިހާތަނަށް މާލޭގެ މިސްކިތްތަކުން ވައްކަންކުރުމުގެ 21 މައްސަލައެއް ހުށަހަޅާފައިވާ ކަމަށް ފުލުހުންގެ ތަރުޖަމާނު، އެސިސްޓެންޓް ކޮމިޝަނާ އޮފް ޕޮލިސް އަހުމަދު ޝިފާން މި ފަހުން ވަނީ ވިދާޅުވެފައެވެ.