މަސްތުވާތަކެއްޗަކީ އަމިއްލަ ތަކެތި ކަމަށް ބުނެ އެ ތަކެއްޗާ ސީންގައި ހަވާލުވީ، މަންމަ ހައްޔަރުކުރާނެ ކަމަށް ބުނުމުން ކަމަށް މަސްތުވާތަކެތީގެ މައްސަލައެއްގައި ހައްޔަރުކުރި ޒުވާނަކު ކޯޓުގައި އިއްޔެ ތުހުމަތުކޮށްފިއެވެ.
މަސްތުވާތަކެތި ގެންގުޅެ އެތަކެތީގެ ވިޔަފާރިކުރިކަމުގެ ތުހުމަތުގައި 20 އަހަރުގެ ޒުވާނެއް އިއްޔެ ކްރިމިނަލް ކޯޓަށް ހާޒިރުކޮށް ބަންދަށް ވަނީ 10 ދުވަސް ޖަހައިފައެވެ.
އެކަމަކު، މުއްދަތު ޖަހަން ކޯޓަށް ހާޒިރުކުރުމުން އޭނާ ވަނީ ސީންގައި މަސްތުވާތަކެއްޗާ ހަވާލުވީ، އެ ތަކެއްޗާ ހަވާލުނުވެއްޖެ ނަމަ އޭނާގެ މަންމަ ހައްޔަރުކުރާނެ ކަމަށް ފުލުހުން ބުނުމުން ކަމަށް ތުހުމަތުކޮށްފައެވެ.
ފުލުހުންގެ ތަހުގީގު އޮފިސަރުން އެކަމަކު އެކަން ދޮގުކުރެއެވެ.
މި ކަމާ ގުޅިގެން އިތުރަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލަކު މިއަދު 'ސަން'އަށް ވިދާޅުވީ، މިއީ މި ފަދަ މައްސަލަތަކުގައި ހައްޔަރުކުރާ މީހުން، މައްސަލައިގެ ފޯކަސް ގެއްލުވާލަން ގެންގުޅޭ އުކުޅެއް ކަމަށެވެ.
މި މައްސަލައިގައި ޒުވާނާއަށް ތުހުމަތުކުރެވޭ މިންވަރަށް ހެއްކާއި ގަރީނާ ހުރި ކަމަށާއި ސީނަށް ދިޔަ ފުލުހުންގެ ބަޔާނާއި އިންޓެލިޖެންސް ރިޕޯޓު ވެސް ހުށަހަޅާފައިވާކަން އެ މައްސަލައިގައި ކްރިމިނަލް ކޯޓުން ކުރި ބަންދު އަމުރުގައިވެއެވެ. އަދި، މައްސަލައިގެ ތުހުމަތުވާ މީހާއަކީ މަސްތުވާތަކެތީގެ މައްސަލަތަކުގެ ރިކޯޑާއި ބަންދު ލޮގު އޮތް މީހެއްކަން ވެސް ކޯޓު އަމުރުގައި ފާހަގަކޮށްފައިވެއެވެ.
ފުލުހުންގެ ބަޔާނުގައި ވާގޮތުން، އޭނާގެ އަތުން ފެނުނު މަސްތުވާތަކެތީގެ ޖުމުލަ ބަރުދަން ޓްރެފިކް ކުރުމުގެ މިންގަނޑަށް އަރައެވެ. އަދި، އޭނާ ދިރިއުޅުނު އެޕާޓްމަންޓުން ވެސް ގިނަ އަދަދެއްގެ މަސްތުވާތަކެތި ފެނިފައިވާ ކަމަށް ވެސް ފުލުހުންގެ ބަޔާނުގައިވެއެވެ.
ފުލުހުން މީގެ ކުރިން އާންމުކޮށްފައިވާ ތަފާސްހިސާބުތަކަށް ބަލާއިރު މި އަހަރު އެކަނި ވެސް 104 މިލިއަން ރުފިޔާގެ މަސްތުވާތަކެތި ވަނީ އަތުލައިގެންފައެވެ. ކަސްޓަމްސްއިން ވެސް ވަނީ ރާއްޖެއަށް އެތެރެކުރަން އުޅެނިކޮށް މި އަހަރުގެ ފުރަތަމަ ހަ މަސް ތެރޭގައި 51 ކިލޯ ނުވަތަ 100 މިލިއަން ރުފިޔާގެ މަސްތުވާތަކެތި އަތުލައިގެންފައެވެ.