ލޯބިވެރިޔާއަށް ބިރުދައްކައި ބްލެކްމެއިލްކުރި މައްސަލައިގައި މިމަހުގެ 13ވަނަ ދުވަހު ހައްޔަރުކުރި ފުލުސް މީހާ އޭނާގެ ފޯނު ނައްތާލައި، ހެކި ނައްތާލާފައިވާކަމަށް ފުލުހުން ތުހުމަތުކޮށްފިއެވެ.
މި މައްސަލާގައި ހައްޔަރުކޮށްފައި ވަނީ އުމުރުން 19 އަހަރުގެ ފަޒާ، އއ. މަތިވެރި، ޒައިދާން މުހައްމަދެވެ.
މީގެ ކުރިން ކޯޓު އަމުރެއްގެ ދަށުން އޭނާ ހައްޔަރުކުރުމަށްފަހު މިމަހުގެ 14ވަނަ ދުވަހު މަތިވެރި މެޖިސްޓްރޭޓް ކޯޓުން ވަނީ ތިން ދުވަހުގެ މުއްދަތަކަށް އޭނާ ބަންދުކުރުމަށް އަމުރުކޮށްފައެވެ.
އެއަށްފަހު، މިއަދު ކްރިމިނަލް ކޯޓުން ވަނީ ބްލެކްމެއިލް ކުރުމުގެ މައްސަލައިގައި އޭނާގެ މައްޗަށް 10 ދުވަހަށް ބަންދުގެ މުއްދަތު ޖަހައިފައެވެ.
ކްރިމިނަލް ކޯޓުގެ އަމުރުގައި ބުނެފައި ވަނީ ބްލެކްމެއިލް ކުރުމުގެ ކުށް އޭނާ ކުރިކަމަށް ތުހުމަތުކުރެވޭ މިންވަރަށް ހެކި ހުށަހަޅާފައިވާ ކަމަށެވެ. އެގޮތުން ހެކީގެ ގޮތުގައި ތަހުގީގީ ބަޔާންތަކާއި އިތުރު ހެއްކާއި ގަރީނާ ހުށަހަޅާފައިވާ ކަމަށް ކޯޓު އަމުރުގައިވެއެވެ.
އެ މައްސަލައަކީ އޭނާ ލޯބީގެ ގޮތުން ގުޅިގެން އުޅުނު ފަރާތުގެ އޮރިޔާން މަންޒަރު ދައްކުވައިދޭ ފޮޓޯ ލީކުކޮށްލާނެ ކަމަށް ބުނެ ބިރުދެއްކި މައްސަލައެކެވެ.
ހާދިސާ ހިނގާފައިވާ ގޮތަށް ބަލާއިރު އޭނާ އަތުގައި ހުރި ފޮޓޯތައް ލީކުކޮށްލައި، ބިރު ދެއްކުމުގެ ކަންކަން ހިންގާފައިވާކަން އެނގޭނެ ހެކި ހުށަހަޅާފައިވާ ކަމަށް ކޯޓު އަމުރުގައިވެއެވެ. އަދި އެ މައްސަލާގައި އޭނާގެ ފޯނު ނައްތާލައި، ހެކި ނައްތާލާފައިވާކަމަށް ފުލުހުން ތުހުމަތުކުރާ ކަމަށާއި އެކަމަށް ބާރުދޭ ކޮންމެވެސް މިންވަރެއްގެ ހެކި ހުށަހަޅާފައިވާ ކަމަށް އެ އަމުރުގައިވެއެވެ.
އެ މައްސަލާގައި މީހަކު ޖާމިނުކޮށް ކަފާލާތުގެ ދަށުން ދޫކޮށްދިނުމަށް ދިފާއުން އެދިފައިވާ ކަމަށް ކޯޓު އަމުރުގައިވެއެވެ. ނަމަވެސް މީހަކު ޖާމިނުކޮށް ދޫކޮށްދިނުމަށް އެދިފައިވާ ފޯމު ފުރިހަމަނުވާ ކަމަށާއި، ޝަރުތު ފުރިހަމަވާކަން އެނގޭނެ ލިޔުމެއް ހުށަހަޅާފައިނުވާ ކަަމށް އެ އަމުރުގައިވެއެވެ.
އެހެންކަމުން ޖާމިނުވާ މީހާގެ ކިބައިގައި ފުރިހަމަ ވާންޖެހޭ ޝަރުތު ފުރިހަމަވާކަން އެނގޭނެ ލިޔުން ނެތުމުން އެފަދަ ލިޔުމަކާއެކު ހުށަހަޅައިފިނަމަ ކަފާލާތުގެ ދަށުން ޖާމިނުކޮށް މީހާ ދޫކޮށްލުމާމެދު ގޮތެއް އަލުން ކަނޑައެޅޭނެކަން އަންގާފައިވާނެ ކަމަށް ކޯޓު އަމުރުގައިވެއެވެ.
އަދި އޭނާ ބަންދުގައި ބަހައްޓަން ޖެހެނީ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާކަމަށް ފެންނާތީ ކަމަށް ކޯޓު އަމުރުގައި ބުނެފައިވެއެވެ.