އަވައްޓެރި ސްރީލަންކާގެ ފޮރިން މިނިސްޓަރު އެމްޔޫއެމް ޢަލީ ސަބްރީގެ ދައުވަތަކަށް ރާއްޖޭގެ ފޮރިން މިނިސްޓަރު މޫސާ ޒަމީރު އަންނަ ހޯމަ ދުވަހު އެ ގައުމަށް ވަޑައިގަންނަވަން މިއަދު ނިންމައިފިއެވެ.
ފޮރިން މިނިސްޓްރީން ބުނީ، ޒަމީރުގެ މި ދަތުރުފުޅުގައި ބުރާސްފަތި ދުވަހުގެ ނިޔަލަށް އެ ގައުމުގައި މަޑުކުރައްވާނެ ކަމަށެވެ.
ފާހަގަކޮށްލެވޭ ގޮތުގައި މިއީ ސަރުކާރު ބަދަލުވީފަހުން، ފޮރިން މިނިސްޓަރު އަވައްޓެރި ސްރީލަންކާއަށް ކުރައްވާ ފުރަތަމަ ދަތުރުފުޅެވެ.
މި ދަތުރުގައި އެ ގައުމުގެ ސަރުކާރުގެ އިސް ބޭފުޅުންނާއި ބައްދަލުކުރެއްވުމަށްވަނީ ހަމަޖެހިފައެވެ. އޭގެ ތެރޭގައި އެ ގައުމުގެ ރައީސް ރަނިލް ވިކްރަމަސިންހެއާއި ބޮޑު ވަޒީރު ޑިނޭޝް ގުނަވަދެނާ ހިމެނެއެވެ. އަދި، އެ ގައުމުގެ ފޮރިން މިނިސްޓަރާ ބައްދަލުކުރައްވާ ރަސްމީ ވާހަކަތައް ދެއްކުމަށް ހަމަޖެހިފައިވެއެވެ.
ރަސްމީ ވާހަކަތަކުގެ ތެރޭގައި ރާއްޖެއާއި ސްރީލަންކާއާ ދެމެދު އޮތް ޒަމާންވީ ގުޅުން ހަރުދަނާކުރުމުގެ މަޝްވަރާތައް ކުރިއަށްދާނެއެވެ. އަދި، މީގެ އިތުރުން ސްރީލަންކާގައި ދިރިއުޅޭ ދިވެހި ރައްޔިތުންނަށް ލުއިފަސޭހަ ގޮތްތައް ހޯދާ ދިނުމާ ގުޅޭގޮތުން މަޝްވަރާކުރުމަށް ވަނީ ހަމަޖެހިފައެވެ.
ފާހަގަކޮށްލެވޭ ގޮތުގައި މި މަހުގެ ކުރީކޮޅު ޒަމީރު ވަނީ އިންޑިއާއަށް ވެސް ރަސްމީ ދަތުރެއް ކުރައްވާފައެވެ.
ޒަމީރު އިންޑިއާއަށް ވެސް ވަޑައިގަތީ ދެ ގައުމުގެ ގުޅުން އިތުރަށް ހަރުދަނާކުރުމުގެ ބޭނުމުގައެވެ. އެ ދަތުރަށް ފަހުގައި ދެ ގައުމުގެ މެދުގައި އުފެދިފައި އޮތް ނުތަނަވަސްކަން ކުޑަވި ކަމަށް ވެސް އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރު ވަނީ ވިދާޅުވެފައެވެ.