ސްރީލަންކާގެ ކެންޑީގެ ގެލިއޯޔާ ޓައުންގައި އިއްޔެ އަންހެން ކުއްޖަކު މަގު މަތިން ހިނގާފައި ދަނިކޮށް ގަދަކަމުން ވޭނަކަށް އަރުވައި، ރަހީނުކޮށްފިއެވެ.
ލަންކާގެ މީޑިއާތަކުގައިވާ ގޮތުން ރަހީނުކޮށްފައިވަނީ 19 އަހަރުގެ އަންހެން ކުއްޖެކެވެ.
އެ ހާދިސާގެ ސީސީޓީވީ ފުޓެޖް ސޯޝަލް މީޑިއާގައި އާންމުވެފައިވާއިރު، ވީޑިއޯއިން ފެންނަނީ ސްކޫލް ޔުނީފޯމްގައި ތިބި ދެ ކުދިން ހިނގާފައި ދަނިކޮށް ކަޅު ކުލައިގެ ވޭނެއް އެ ކުދިން ކުރި މައްޗަށް މަޑުކުރާ މަންޒަރެވެ.
އެ ވޭނާ ދެ ކުދިން އަރާ ހަމަވުމުން، ކުއްލިއަކަށް ފިރިހެނަކު ވޭނުން ފައިބައިގެންއައިސް އެތަނުން އެއް ކުއްޖަކު ގަދަކަމުން ވޭނަށް އަރުވާ މަންޒަރު ފުޓޭޖުން ފެނެއެވެ.
އަނެއް އަންހެން ކުއްޖާ ދުވެފައި ވޭނާ ދުރަށް ދުއްވައިގަތްއިރު، މަގުމަތިން ދިޔަ ފިރިހެނަކު ވޭނާ ދިމާލަށް ދުވެފައި ގޮސް، ވޭނުގެ ތެރޭގައި ހުރި މީހާ ހުއްޓުވަން މަސައްކަތް ކުރާ މަންޒަރު ފެނެއެވެ. އެ މީހާއާއެކު ވޭން ދުއްވާ މަންޒަރު ވެސް ވީޑިއޯއިން ފެނެއެވެ.
ނަމަވެސް ރިޕޯޓްތައް ބުނާ ގޮތުގައި އަންހެން ކުއްޖާ ސަލާމަތް ކުރަން ކުރި މަސައްކަތް ކާމިޔާބެއް ނުވެއެވެ. އަދި ފަހުން އެކުއްޖާ ސަލާމަތް ކުރަން އުޅުނު މީހާވެސް ފެންނަން ނެތް ކަމަށް ރިޕޯޓުތައް ބުނެއެވެ.
ރަހީނުކުރުމަށް ބޭނުންކުރި އެ ވޭން ފަހުން ވަނީ ޕޮލޮންނާރޫވާގައި އޮއްވާ ފެނިފައެވެ.
ކޮލޮމްބޯ ގެޒެޓް ނޫހުގައިވާ ގޮތުން، އަންހެން ކުއްޖާ ރަހީނުކުރީ އޭނާއާ ދެބެންގެ ދެދަރި މީހެއް ކަމަށް ފުލުހުން ތުހުމަތު ކުރެއެވެ.
އެ އަންހެން ކުއްޖާ ހޯދުމުގެ މަސައްކަތް ފުލުހުން މިހާރު ވަރުގަދަކޮށްފައިވާ ކަމަށް ވެސް ބައެއް ނޫސްތަކުގައިވެއެވެ.