ޑްރޯން މެދުވެރިކޮށް މިދިޔަ ބުރާސްފަތި ލޮކޭޓްކޮށް، ރާއްޖޭގެ ސަރަހައްދުން އަތުލައިގަތީ ސްރީލަންކާއަށް ނިސްބަތްވާ މަސް ބޯޓެއް ކަމަށް އެމްއެންޑީއެފުން މިއަދު ބުނެފިއެވެ.
ރާއްޖޭގެ ޚާއްޞަ އިގުތިސާދީ ސަރަހައްދު ބަލަހައްޓަން ހިންގި އޮޕަރޭޝަނެއްގައި، ގާނޫނާ ޚިލާފަށް އެ ސަރަހައްދުގައި ހަރަކާތްތެރިވަމުންދިޔަ ބޭރުގެ މަސްބޯޓެއް އެއާ ކޯ ޑްރޯންގެ އެހީގައި ހޯދި ކަމަށް ބުރާސްފަތި ދުވަހު އެމްއެންޑީއެފުން ބުންޏެވެ. އެކަމަކު، އެ ދުވަހު ތަފުސީލު ހާމަކޮށްފައެއް ނުވެއެވެ.
އެމްއެންޑީއެފުން މިއަދު ބުނީ، އެއީ ސްރީލަންކާއަށް ނިސްބަތްވާ އުޅަނދެއް ކަމަށާއި އުޅަނދުގައި ތިން މީހުން ތިބި ކަމަށެވެ.
އެ އުޅަނދު މިހާރު ފުލުހުންނާ ހަވާލުކޮށްފައިވާ ކަމަށް އެމްއެންޑީއެފުން ބުންޏެވެ.
މީގެ ކުރިން ކަނޑުމައްޗަށް ގެއްލުނު ދޯންޏެއް ވެސް އެމްއެންޑީއެފުން ޑްރޯންގެ އެހީގައި ހޯދައިފައިވެއެވެ. އަދި، މީގެ ކުރިން ވެސް ރާއްޖޭގެ ޚާއްސަ އިގުތިސާދީ ސަރަހައްދުން ގަވާއިދާ ހިލާފަށް އުޅޭ މަސް ބޯޓުތައް އަތުލައިގެންފައިވެއެވެ.
ރާއްޖޭގެ ކަނޑުގެ ސަރަހައްދު ބަލަހައްޓަން ތުރުކީން ޑްރޯންތަކެއް ގެނައީ މިދިޔަ މާޗު މަހުގެ 15 ގައެވެ.
އެންމެ ޒަމާނީ އާލާތްތަކާ އެކު އުދުއްސޭ މި ޑްރޯންތައް 70 އާއި 120 ނޮޓުގެ ސްޕީޑުގައި 27 ގަޑިއިރަށް ވުރެ ގިނައިރު ދުއްވޭނެއެވެ. އަދި، 25،000 ފޫޓަށްވުރެ މަތިން ދުއްވުމުގެ ގާބިލުކަން ވެސް މި ޑްރޯންތަކުގައި ހުރެއެވެ.